———၊ စူး (ဆေးဝါးတက္ကသိုလ်) ၊———
အခုချိန်မှာ အအေးမိဝေဒနာ အဖြစ်များနေကြပါတယ်။ အအေးမိတဲ့အခါ ကိုယ်ခံအားစနစ် အားနည်းသူတွေဟာ ပြန်လည်နေကောင်းဖို့ ခက်ခဲတတ်ပါတယ်။ ဒါကြောင့် အိမ်မှာပဲဖြစ်ဖြစ်၊ အလုပ်မှာပဲဖြစ်ဖြစ် လက်ကိုမကြာခဏ ဆေးကြောသင့်ပါတယ်။ အအေးမိဖျားနာတဲ့အခါမှာ အမြန်ဆုံးသက်သာစေဖို့ လိုက်နာသင့်တဲ့ အိမ်တွင်းကုထုံးတွေကိုလည်း မျှဝေပေးလိုက်ပါတယ်။
သဘာဝဆေး (၁) ပရုတ်ဆီ
အအေးမိတဲ့အခါ ပရုတ်ဆီကို ရင်ဘတ်နဲ့လည်ပင်းတ၀ိုက်မှာ ခပ်ပါးပါး ပွတ်လိမ်းပေးပါ။ ပရုတ်ဆီမှာပါတဲ့ မန်သော်အနံ့က နှာခေါင်းကတစ်ဆင့် အသက်ရှူလမ်းကြောင်းထဲဝင်ပြီး အအေးမိဝေဒနာ သက်သာစေပါတယ်။ အိပ်ရေး၀၀ အိပ်မောကျစေပါတယ်။
သဘာဝဆေး (၂) ချင်း(ဂျင်း)ရေနွေးကြမ်း
ချင်း(ဂျင်း)ရေနွေးကြမ်းက အသက်ရှူလမ်းကြောင်းဝေဒနာကို သက်သာစေပါတယ်။ ချင်း(ဂျင်း)လက်တစ်ဆစ်စာပမာဏကို ထောင်းပြီး ရေနွေးပူပူထဲထည့်ကာ မိနစ်အနည်းငယ်ကြာမှ သောက်ပေးပါ။ ချင်းရေနွေးကြမ်းထဲကို ပျားရည်လက်ဖက်စားဇွန်းတစ်ဇွန်း ဒါမှမဟုတ် သံပုရာရည် လက်ဖက်စားဇွန်းတစ်ဇွန်း ထည့်သောက်ပေးရင် အရသာပိုကောင်းစေပါတယ်။
သဘာဝဆေး (၃) ရေနွေးငွေ့
ရေနွေးကို ဇလုံတစ်ခုထဲထည့်ပြီး ဦးခေါင်းပေါ် မှာ တဘက်စနဲ့အုပ်ကာ ရေနွေးငွေ့ရှူပေးပါ။ ဒါဆိုရင် အအေးမိဝေဒနာ လက္ခဏာတွေကို သက်သာလျော့ပါးစေမှာ ဖြစ်ပါတယ်။ ရေနွေးထဲ ပင်စိမ်းဆီနဲ့ ချင်း(ဂျင်း)ထောင်းအနည်းငယ်ထည့်ပြီး ရှူရှိုက်ပေးရင် ပိုကောင်းပါတယ်။
သဘာဝဆေး (၄) ကြက်စွပ်ပြုတ်
ကြက်စွပ်ပြုတ်မှာပါတဲ့ ပရိုတင်းဓာတ်က ကိုယ်ခံအားစနစ်ကို မြင့်တက်စေပြီး အအေးမိဝေဒနာကို ပြန်လည်သက်သာနိုင်ခြေ မြန်စေပါတယ်။
သဘာဝဆေး (၅) ကြက်သွန်ဖြူ
တစ်နေ့တာအတွင်း ကြက်သွန်ဖြူများများ စားပေးရင် ဗိုင်းရပ်စ်တားအစွမ်းရှိတာကြောင့် အအေးမိဝေဒနာကို သက်သာစေပါတယ်။ ကြက်သွန်ဖြူမှာ ရောင်ရမ်းမှုကျစေတဲ့ အစွမ်းရှိကာ အသက်ရှူလမ်းကြောင်းပွင့်စေပြီး ကိုယ်ခံအားစနစ်ကို ကောင်းမွန်စေပါတယ်။