———၊ မီမိုးမေ (ဆေးဝါးတက္ကသိုလ်) ၊———
လက်သည်းတွေက ရေထိဖန်များတာ၊ ခြောက်လွန်းတာ၊ လက်သည်းဖျက်ဆေး အလွန်အမင်း သုံးတာတွေကြောင့် ကျိုးပဲ့ထိခိုက် လွယ်စေနိုင်ပါတယ်။ ဒါကြောင့် လက်သည်းခြေသည်း ကျန်းမာသန်စွမ်းစေဖို့အတွက် သဘာဝအိမ်တွင်းကုထုံးတွေနဲ့ ထိန်းသိမ်းကြရအောင်။
(၁) သခွားသီးသုံးပါ
လက်သည်းတွေ မကြာခဏ ကြွပ်ဆတ်နေတယ်ဆိုရင် သခွားသီးကြိတ်ရည်ထဲ စိမ်ပေးပါ။ သခွားသီးမှာ ဗီတာမင်အေ၊ ဗီတာမင်အီး၊ ဗီတာမင် B1, B2, B3 နဲ့ ဗီတာမင် C တို့ ပါဝင်ရုံမျှမက ကယ်လ်ဆီယမ်နဲ့ သံဓာတ်ပါဝင်တာကြောင့် သခွားသီးကြိတ်ရည်ထဲမှာ တစ်နေ့ အချိန် ၅ မိနစ် စိမ်ပေးသင့်တာပါ။
(၂) ဆော်ဒါမှုန့်နဲ့ သံပရာရည်သုံးပါ
လက်သည်းကို သံပရာသီးစိတ်နဲ့ပွတ်ပြီး အချိန် ၁၀ မိနစ်ခန့်ထားပါ။ လက်သည်းတွေ ပိုပြီး ကြည်လင်ရှင်းသန့်နေချင်ရင်တော့ ဆော်ဒါမှုန့်နဲ့ သံပရာရည်ကို ခပ်ပျစ်ပျစ်ရအောင် မွှေပြီး သွားတိုက်တံနဲ့ တို့ယူကာ လက်သည်းတွေကို ပွတ်တိုက်ပေးရမှာပါ။
(၃) ဘိုင်အိုတင်ပါသော အစာများစားပါ
လက်သည်းတွေ အရှည်မြန်စေဖို့ ဗီတာမင်ဘီ တစ်မျိုးဖြစ်တဲ့ ဘိုင်အိုတင်ဓာတ် ပါဝင်မှုများတဲ့ အစားအသောက်တွေကို စားပေးပါ။ လေ့လာမှုတစ်ခုအရ ဘိုင်အိုတင်ဓာတ်က အားနည်းနေတဲ့ လက်သည်းတွေကို သန်စွမ်းတဲ့ လက်သည်းတွေအဖြစ် ရက်သတ္တပတ်အနည်းငယ်အတွင်း ပြောင်းလဲပေးနိုင်တယ်လို့ သိရပါတယ်။ ဘိုင်အိုတင်ပါတဲ့ အစာတချို့က အခွံမာအစေ့အဆန်၊ ပန်းဂေါ်ဖီ၊ ဥအမျိုးမျိုး၊ ငှက်ပျောသီးနဲ့ မှိုတို့ဖြစ်ကြပါတယ်။
(၄) အုန်းဆီနဲ့ နှိပ်နယ်ပါ
အုန်းဆီက လက်သည်းတွေကို အားဖြည့်ပေးပြီး အစိုဓာတ်ထိန်းပေးသလို လက်သည်းပန်းကုံးတွေကိုလည်း ကျန်းမာစေပါတယ်။ အုန်းဆီအစက် အနည်းငယ်ကို လက်သည်းမှာလိမ်းပြီး နှိပ်နယ်ပေးတာကြောင့် လက်သည်းတွေကို သန်စွမ်းစေပါတယ်။
(၅) ပန်းသီးရှလကာရည်ထဲ စိမ်ပါ
လက်သည်းတွေက ပိုးဝင်နေတယ်ဆိုရင် ရေနဲ့ပန်းသီးရှလကာရည်တို့ကို ဆတူရောပြီး လက်သည်းတွေကို မိနစ် ၃၀ ကြာ စိမ်ပေးပါ။ ဒါမှမဟုတ် ဂွမ်းစလေးနဲ့ ပန်းသီးရှလကာရည်ကို ဆွတ်ပြီး ပိုးဝင်နေတဲ့ လက်သည်းတွေပေါ် သုတ်လိမ်းလို့လည်း ရပါတယ်။
(၆) ကြက်သွန်ဖြူ
ကြက်သွန်ဖြူမှာ ပိုးသတ်အစွမ်းရှိတာကြောင့် ဖန်းဂတ်စ်မှိုတွေကို ကင်းစင်စေပါတယ်။ ကြက်သွန်ဖြူကို ထောင်းပြီး မှိုစွဲနေတဲ့ လက်သည်းတွေပေါ် သုတ်လိမ်းလို့ရပါတယ်။
