မေး။ ။ အရေးပေါ်တားဆေးကို တစ်လတည်းမှာ နှစ်ခါ-သုံးခါလောက်သုံးမိပါတယ်။ အဲဒီအခါကျတော့ ရာသီတွေက မပေါ်တော့ဘဲနဲ့ နောက်ကျသွားလိုက်၊ တစ်ခါတလေ ဆင်းချင်သလို ဆင်းလိုက်နဲ့ အဲဒါ ဘယ်လိုဖြစ်တာပါလဲဆရာ။
နှင်းနှင်း (FB)
ဒေါက်တာစိုးလွင် (သားဖွားမီးယပ်အထူးကု ဆရာဝန်ကြီး) ဖြေကြားသည်။
ဖြေ။ ။ အရေးပေါ်တားဆေးဆိုတာ တကယ့်အရေးပေါ် အခြေအနေကျမှပဲ သုံးရပါတယ်။ အတူတူနေပြီး ချက်ချင်းသုံးရင် ပိုကောင်းတယ်။ ၇၂ နာရီအတွင်း ဆိုရင်ပိုသင့်တော်တယ်။ မကောင်းတဲ့အချက်က ရာသီလာတာ နောက်ကျသွားတတ်တယ်။ ရာသီလာရမယ့်အချိန်မှာ မလာဘဲ နောက်ကျသွားတတ်တယ်။ အရမ်းနောက်ကျသွားရင်၊ တစ်ပတ်-နှစ်ပတ်အထိ နောက်ကျသွားရင်တော့ ကိုယ်ဝန်ရှိ၊ မရှိ စစ်ကြည့်ဖို့ မှာရပါတယ်။ ဒီဆေးကို တစ်လတည်းမှာ တစ်ခါတည်းမဟုတ်ဘဲနဲ့ နှစ်ခါ-သုံးခါ-လေးခါအထိ သုံးလိုက်ရင်တော့ ရာသီလာတာက တော်တော့်ကို ကိုရိုးကားယားတွေဖြစ်ကုန်တော့မှာ။
တစ်ခါသုံးရင်တောင် ရာသီနောက်ကျတတ်တယ်။ တစ်ခါသုံးတိုင်း သုံးတိုင်း Failure Rate ရှိတယ်။ ဒီဆေးက အယောက် ၁၀ဝ သုံးရင် အယောက် ၈၀ လောက်မှာပဲ ကာကွယ်နိုင်ပါတယ်။ အယောက် ၂၀ က ကလေးရသွားနိုင်ပါတယ်။ သဘောက တစ်လတည်းမှာ သုံးခါ သွားသုံးလိုက်ရင် အဆင်မသင့်ရင် ကလေးရသွားနိုင်ခြေများပါတယ်။ ဒါကြောင့် ဖြစ်နိုင်ရင် တစ်လတည်းမှာ ခဏခဏမသုံးပါနဲ့။ ကိုယ်က ကလေးမလိုချင်ဘူး၊ ရာသီက မလာသေးဘူး၊ မလာမချင်း ကိုယ်ဝန်များ ရှိသွားပြီလား၊ ရှိသွားပြီလားနဲ့ ပူပင်နေရတတ်ပါတယ်။ အရေးပေါ်အခြေအနေမှာသာ သုံးသင့်တာ ဖြစ်ပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
