၊ လရိပ်မေ ၊
ကိုယ်ဟန်အနေအထားကောင်းမွန်ဖို့က ဘာကြောင့် အရေးကြီးတာလဲလို့ မေးလာရင် ကြည့်ကောင်းစေလို့ အရေးကြီးတာဖြစ်ကြောင်း ဖြေရမှာပါ။ ဒါ့အပြင် ကိုယ်ဟန်အနေအထားကောင်းမွန်တဲ့အခါ ခါးသန်စွမ်းကျန်းမာပြီး သွေးလှည့်ပတ်မှုကောင်းမွန်စေပါတယ်။ အထိုင်များတဲ့ အလုပ်လုပ်တဲ့အခါ ခါးနောက်ကျော ပျော့ပျောင်းသန်စွမ်းစေဖို့နဲ့ ကိုယ်ဟန်အနေအထား ကောင်းမွန်စေဖို့ လေ့ကျင့်ခန်းတွေကို မှန်မှန်လုပ်ပေးသင့်ပါတယ်။
(၁) သွေးပူလေ့ကျင့်ခန်း
– ပက်လက်လှန်လှဲလျောင်းပြီး လက်သီးဆုပ်ကာ လက်မောင်းတွေကို အပေါ်ဆန့်ထုတ်ပါ။
– ဒူးကွေးပြီး ရင်ဘတ်ဆီ ဆွဲယူပါ။
– မူလပုံစံ ပြန်နေပါ။
– ဒီလေ့ကျင့်ခန်းကို အကြိမ်များများ ပြန်လုပ်ပေးရပါမယ်။
(၂) ခါးကြွက်သား ဆွဲဆန့်လေ့ကျင့်ခန်း
– ခြေသလုံးတွေကို ဆွဲယူပြီး ပေါင်ကို ရင်ဘတ်ဆီ ထိကပ်ပေးပါ။
– ဦးခေါင်းမြှင့်ပြီး ဒူးတွေကို မေးစေ့ဆီ ဆွဲယူပါ။ ဒူးတွေကြားထဲ မေးစေ့ထားနိုင်ဖို့ ကြိုးစားပါ။
– ဒီအနေအထားကို ၂၀-၃၀ စက္ကန့်ကြာ ထိန်းထားပါ။
(၃) ခန္ဓာကိုယ် ကွေးညွတ်သည့် လေ့ကျင့်ခန်း
– ညာခြေထောက်ကို ဘယ်ဘက်ဒူးခေါင်းပေါ် တင်ထားပါ။
– ဦးခေါင်းကို ညာဘက်လှည့်ပြီး ညာဘက်ဒူးကို ကြမ်းပြင်ပေါ် ချထားပါ။ ပခုံးသားတွေကို ဖိနှိပ်ချထားရပါမယ်။
– ဒီလေ့ကျင့်ခန်းကို တခြားခြေထောက်တစ်ဖက်ပြောင်းလုပ်ပေးပါ။
(၄) ကြောင်ကိုယ်ဟန်လေ့ကျင့်ခန်း
– ကြမ်းပြင်ပေါ်မှာ လေးဖက်ထောက်ကာ လက်နှစ်ဖက်ကို ပခုံးနဲ့ တစ်တန်းတည်းထားပါ။
– ခါးကို မြှင့်လိုက်၊ ပြန်ကွေးလိုက်လုပ်ပါ။
– ဒီလေ့ကျင့်ခန်းကို ၁၀ ကြိမ် ပြန်လုပ်ပေးပါ။
(၅) ခါးရိုးဆွဲဆန့်လေ့ကျင့်ခန်း
– ပက်လက်လှန်လှဲလျောင်းပြီး ညာပေါင်ပေါ်ဘယ်ခြေထောက်တင်ပါ။
– ဘယ်ဘက်ဒူးကို အပြင်ထုတ်ကာ ညာဘက်ပေါင်ကို သင့်ဆီဆွဲယူပါ။
– တခြားခြေထောက်သုံးပြီး ဒီလေ့ကျင့်ခန်းကို ပြန်လုပ်ဆောင်ရပါမယ်။
(၆) ခြေထောက်ကွေးလေ့ကျင့်ခန်း
– ပက်လက်လှန်လှဲလျောင်းပြီး သစ်သားပုံးတစ်ခုပေါ်ခြေထောက်တွေကို ၉၀ ဒီဂရီအနေအထားနဲ့တင်ပါ။
– ခန္ဓာကိုယ်အပေါ်ပိုင်းကို ဒူးတွေဆီ ဖြည်းဖြည်းချင်း မြှင့်လိုက်ပါ။ လက်နှစ်ဖက်နဲ့ ကိုယ်နေဟန်ကို ထိန်းပါ။
– ဦးခေါင်းကို ဖြည်းဖြည်းချင်း မြှင့်ပေးပါ။
(၇) ပခုံးဆွဲဆန့်လေ့ကျင့်ခန်း
– ဘယ်ဘက်ခြေထောက်ကို ညာဘက်ဒူးပေါ် တင်ပါ။
– ညာဘက်ပခုံးကို ဘယ်ဒူးပေါ် ဆွဲယူပါ။
– ခြေထောက်ပြောင်းလုပ်ပါ။
(၈) ပေါင်မြှင့်လေ့ကျင့်ခန်း
– ဘေးစောင်းလှဲလျောင်းပြီး ဘယ်ဘက်လက် တံတောင်ဆစ်က ကြမ်းပြင်ပေါ် ထောက်ထားပါ။ ဒူးကွေးလိုက်ပါ။
– ညာဘက်လက်ကို ပေါင်ပေါ်တင်ပြီး ပေါင်တွေကို မြှင့်ထားပါ။
– ဒီလေ့ကျင့်ခန်းကို ဟိုဘက်၊ ဒီဘက်လှည့်ပြီး ၁၀ ကြိမ်စီ လုပ်ဆောင်ပါ။
(၉) ထိုင်လျက်လေ့ကျင့်ခန်း
– ဒူးတုပ်ထိုင်ပါ။ ဝမ်းဗိုက်နေရာမှာ ဖက်လုံး အသေးတစ်ခုထားပြီး လက်နောက်ပစ်ကာ ကွေးလိုက်ပါ။
– ခေါင်းနဲ့ နောက်ကျောကိုမြှင့်ပြီး ပြန်မတ်ပါ။ တင်ပါးကို မမြှင့်ပါနဲ့။
(၁၀) ဝမ်းဗိုက်လေ့ကျင့်ခန်း
– မှောက်လျက်အိပ်ပြီး ဝမ်းဗိုက်နဲ့တင်ပါး ကြွက်သားတွေကို တောင့်တင်းထားပါ။
– လက်မောင်းကို အရင်ဆုံး ဆွဲဆန့်ကာ လက်မောင်းနဲ့ ပခုံးကိုဖြည်းဖြည်းချင်း မြှင့်ပေးပါ။
– ဒီအနေအထားအတိုင်း ၂၀-၃၀ စက္ကန့်ကြာ နေပေးပါ။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
