—–၊ ဇွန်ခိုင်ဦး(ဆေးဝါးတက္ကသိုလ်) ၊——
အရိုးရဲ့သိပ်သည်းဆ ကျလာတာကြောင့် အရိုးတွေကြွပ်ဆတ်လွယ်၊ ကျိုးလွယ်တဲ့အခြေအနေကို အရိုးပါးတယ်လို့ ခေါ်ပါတယ်။ အသက် ၅၀ ကျော်တဲ့ သွေးဆုံးပြီးအမျိုးသမီးတွေမှာ အရိုးပါးရောဂါ အဖြစ်များတတ်ပါတယ်။ အရိုးပါးရောဂါအကြောင်း သိသင့်တဲ့အချက်တွေကို အမှန်အတိုင်းမသိဘဲ လူတွေကြားမှာ ပျံ့နှံ့နေတဲ့ အယူအဆတွေကြား စိတ်ညစ်မနေရအောင် အမှန်သိစေဖို့ ဖော်ပြလိုက်ရပါတယ်။
အယူအဆ(၁)- အရိုးပါးရောဂါက အသက်ကြီးတာကြောင့်ဖြစ်တဲ့ သဘာဝဖြစ်စဉ်တစ်ရပ်ပါ။
အမှန် – အရိုးပါးရောဂါက အသက်ကြီးတာကြောင့် ဖြစ်နိုင်ခြေပိုများလာတယ် ဆိုပေမယ့် ဒါက မလွှဲမရှောင်သာ ဖြစ်တာမျိုးတော့ မဟုတ်ပါဘူး။ အရိုးပါးတာ၊ အရိုးကျိုးတာမျိုးမဖြစ်အောင်လည်း ကာကွယ်နိုင်တဲ့ နည်းလမ်းတွေ အများကြီးရှိကြောင်း ဂျွန်ဟော့ပ်ကင်းဆေးရုံက ဆိုပါတယ်။ ကယ်လ်စီယမ်နဲ့ ဗီတာမင်မှီဝဲတာနဲ့ လေ့ကျင့်ခန်းလုပ်တာတွေကို လုပ်ဆောင်သင့်ပါတယ်။
အယူအဆ(၂) – အမျိုးသမီးတွေပဲ အရိုးပါးရောဂါ ဖြစ်နိုင်တယ်။
အမှန် – အမျိုးသမီးတွေက အရိုးပါးရောဂါ အဖြစ်များတယ်ဆိုပေမယ့် အမျိုးသားတွေကလည်း အရိုးပါးရောဂါ ဖြစ်နိုင်ခြေ ရှိပါတယ်။ စစ်တမ်းအရပြောရရင် အမေရိကန်အမျိုးသား ငါးဦးအနက် တစ်ဦးဟာ အရိုးပါးရောဂါ ဖြစ်နိုင်ခြေရှိပြီး အမျိုးသမီးသုံးဦးအနက် တစ်ဦးဟာ အရိုးပါးရောဂါ ဖြစ်နိုင်ခြေရှိတယ်လို့ သိရပါတယ်။
အယူအဆ(၃) – အသက်ကြီးတဲ့သူတွေကသာ အရိုးပါးရောဂါဖြစ်မှာကို စိုးရိမ်သင့်ပါတယ်။
အမှန် – မိန်းကလေးတွေမှာ အသက် ၁၈ နှစ်နဲ့ ယောကျာ်းလေးတွေမှာဆိုရင် အသက်၂၀ မှာ အရိုးထုထည်ရဲ့ ၉၀ ရာခိုင်နှုန်းအထိ ဖွံ့ဖြိုးနေပါတယ်။ အရိုးထုထည်ကောင်းအောင် တည်ဆောက်ဖို့ စောတယ်ဆိုတာ မရှိပါဘူး။ ဒါကြောင့် အခုပဲ အရိုးပါးရောဂါ ဖြစ်မှာစိုးရိမ်ပြီး မဖြစ်အောင် ကောင်းမွန်တဲ့ အာဟာရမှီဝဲတဲ့ အလေ့အထကို ခံယူသင့်ပါတယ်။
အယူအဆ(၄) – အရိုးထုထည်က စတင်လျော့ကျပြီးပြီဆိုတာနဲ့ ပြန်တည်ဆောက်နိုင်ဖို့ မလွယ်ပါဘူး။
အမှန် – အရိုးပါးရောဂါ ဖြစ်ပြီးသားသူတွေက ပုံမှန်အရိုးသိပ်သည်းဆကို ပြန်ရဖို့ မလွယ်ပါဘူး။ ဒါပေမဲ့ အရိုးပါးရောဂါ ရှိပြီဆိုတာနဲ့ ဘဝတစ်သက်တာလုံး အရိုးထုထည် လျော့ပါးသွားမှာပဲလို့တော့ မဆိုနိုင်ပါဘူး။ အရိုးပါးရောဂါအတွက် ဆေးဝါးသောက်သုံးတာဟာ အရိုးထုထည်ကို တစ်နှစ်အတွင်းမှာ ရာခိုင်နှုန်းနည်းနည်းစီ မြင့်တက်လာတတ်ပါတယ်။
အယူအဆ(၅) – အရိုးတွေ အားနည်းလာတဲ့အခါမှာ အရိုးပါးရောဂါ ဖြစ်လာပြီလို့ ဆိုနိုင်တယ်။
အမှန် – ကံမကောင်းတာကတော့ အရိုးပါးရောဂါ မဖြစ်ခင်မှာ မစစ်ဆေးဘဲ ကြိုမသိနိုင်ပါဘူး။ များသောအားဖြင့် အရိုးကျိုးမှသာ အရိုးပါးရောဂါရှိမှန်း သိကြတာဖြစ်ပါတယ်။ အသံတိတ်ရောဂါ ဖြစ်တာကြောင့် အရိုးသိပ်သည်းဆကို စစ်ဆေးကြည့်မှသာ ရောဂါ ရှိ၊မရှိ ကြိုတင်သိနိုင်ပါတယ်။
အယူအဆ(၆) – လဲမကျခင်အထိ အရိုးပါးရောဂါကြောင့် နောက်ဆက်တွဲဖြစ်တဲ့ အရိုးကျိုးမှာ မပူရပါဘူး။
အမှန် – လူအများစုဟာ လဲကျတာကြောင့် အရိုးကျိုးအက်နိုင်ပါတယ်။ ဒါပေမဲ့ တချို့လူတွေမှာတော့ အရိုးတွေအားနည်းရာက ကျိုးနိုင်ပါတယ်။ အိပ်ရင်းနဲ့ ပြင်းထန်တဲ့ဖိအားကြောင့်ပါ အရိုးကျိုးတာမျိုး ဖြစ်တတ်ပါတယ်။ သင့်အနေနဲ့ အရိုးပါးရောဂါရှိရင် ကိုယ်နေဟန်ထားမမှန်ဘဲ ယိုင်နဲ့တာကြောင့် အရိုးအက်တာမျိုး ဖြစ်တတ်ပါတယ်။
အယူအဆ(၇) – အရိုးပါးရောဂါက ပြင်းထန်တဲ့ ကျန်းမာရေးအခြေအနေ မဟုတ်ပါဘူး။ အဆိုးဆုံးအဆင့်က အရိုးကျိုးရုံလောက်ပါပဲ။
အမှန် – အရိုးပါးရောဂါဟာ ပြင်းထန်ဆိုးရွားတဲ့ ကျန်းမာရေးအခြေအနေဖြစ်ပြီး တစ်ခါတစ်ရံ အသက်အန္တရာယ်ရှိတဲ့ အခြေအနေဖြစ်ပါတယ်။ အရိုးပါးရောဂါကြောင့် တင်ပဆုံရိုးကျိုးနိုင်ပြီး တင်ပဆုံရိုးကျိုးပြီးနောက် ကုသမှုမခံယူရင် လူ၂၅ ရာခိုင်နှုန်းခန့်ဟာ အချိန်ခြောက်လ-၁၂ လအတွင်းမှာ သေဆုံးရတတ်ပါတယ်။ တင်ပဆုံရိုးအစားထိုးတဲ့ ခွဲစိတ်ကုသမှုဟာလည်း အခန့်မသင့်ပါက မေ့ဆေးကြောင့် နောက်ဆက်တွဲပြဿနာဖြစ်တာ၊ နှလုံးရောဂါထတာ၊ ပိုးဝင်တာ၊ အဆုတ်အမြှေးပါးရောင်ရမ်းတာ စတဲ့ ကျန်းမာရေးပြဿနာတွေကို ဖြစ်စေတတ်ပါတယ်။ လေ့လာမှုတွေအရ အသက် ၅၀ အရွယ် အမျိုးသမီးတွေဟာ အရိုးပါးရောဂါကြောင့် တင်ပဆုံရိုးကျိုးပါက ရင်သားကင်ဆာလိုပဲ သေဆုံးနိုင်ခြေ မြင့်မားနေတတ်ကြောင်း သိရပါတယ်။ ဒါကြောင့် အရိုးပါးရောဂါကို ပေါ့ပေါ့တန်တန် သဘောမထားဘဲ ဆေးကုသမှုခံယူဖို့ လိုပါတယ်။
