၊ မီမိုးမေ ၊ (ဆေးဝါးတက္ကသိုလ်)
ရွှေဖရုံသီးကို အစိမ်းရောင်နဲ့ အဝါရောင်ဆိုပြီး အရောင်နှစ်မျိုးတွေ့ရပါတယ်။ ဗီတာမင်အေ၊ မဂ္ဂနိစ်၊ ပိုတက်ဆီယမ်၊ ဖောလိတ်စတဲ့ အာဟာရဓာတ်တွေ အများအပြားပါဝင်တာကြောင့် ကျန်းမာရေးအတွက် အောက်ပါအကျိုးကျေးဇူးတွေကို ရရှိနိုင်ပါတယ်။
(၁) ရွှေဖရုံသီးမှာ ကယ်လိုရီပါဝင်မှု လျော့နည်းတာကြောင့် အဆီများတဲ့ အစားအသောက်တွေနေရာမှာ အစားထိုးစားပေးနိုင်ပါတယ်။ ကိုယ်အလေးချိန်မတက်စေဘဲ ဆာလောင်မှုကို လျော့ကျစေပါတယ်။
(၂) ရွှေဖရုံသီးမှာ မဂ္ဂနီဆီယမ်ပါဝင်ပြီး အစာကြေညက်စေတာကြောင့် အရံဟင်းလျာအဖြစ် စားပေးသင့်ပါတယ်။
(၃) ရွှေဖရုံသီးဟာ ခန္ဓာကိုယ်ကို အေးမြစေတာကြောင့် ပူတဲ့အချိန်တွေမှာ စားသင့်ပါတယ်။
(၄) ရွှေဖရုံသီးမှာ ဗီတာမင်အေ၊ ဗီတာမင်စီနဲ့ မဂ္ဂနီဆီယမ်တို့ပါဝင်တာကြောင့် ကိုယ်ခံစွမ်းအားစနစ်ကို ကောင်းမွန်စေပါတယ်။ ကိုယ်ခံစွမ်းအားစနစ်ကောင်းမွန်နေရင် ရောဂါအများစုမဖြစ်အောင် ကာကွယ်ထားနိုင်ပါတယ်။
(၅) ရွှေဖရုံသီးဟာ သွေးတိုးတာ၊ လေဖြတ်တာနဲ့ နှလုံးရောဂါထတာတွေမဖြစ်အောင် လျှော့ချပေးနိုင်ပါတယ်။
(၆) ရွှေဖရုံသီးမှာ အမျှင်ဓာတ်အများအပြား၊ ဗီတာမင်အေနဲ့ ဗီတာမင်စီတို့ပါဝင်တာကြောင့် သွေးတွင်းမကောင်းတဲ့ ကိုလက်စထရောတွေကို လျော့ကျစေပါတယ်။ ပါဝင်တဲ့ ဗီတာမင်တွေက ရောင်ရမ်းမှုနဲ့ ဆက်စပ်နေတဲ့ရောဂါ (ဥပမာ- ရိုးဆစ်ရောင်ရမ်းနာ၊ အရိုးအဆစ်ရောင်တာနဲ့ ပန်းနာရင်ကျပ်ရောဂါ)တွေမဖြစ်အောင် ကာကွယ်ပေးနိုင်ပါတယ်။
(၇) ရွှေဖရုံသီးဟာ ကင်ဆာဖြစ်နိုင်တဲ့အန္တရာယ်ကို လျော့ကျစေပါတယ်။ အကြောင်းကတော့ ပါဝင်တဲ့အမျှင်ဓာတ်တွေဟာ ခန္ဓာကိုယ်ထဲကအဆိပ်တွေကိုကင်းစေပြီး အူမကြီးမှာ အဆိပ်တွေစုပုံမှုမဖြစ်အောင် ကာကွယ်ပေးနိုင်လို့ပါ။ အူမကြီးထဲမှာ ကင်ဆာဖြစ်စေတဲ့ အဆိပ်တွေစုနေရင် ကင်ဆာရောဂါကိုဖြစ်လာစေနိုင်ပါတယ်။
(၈) ရွှေဖရုံသီးဟာ ဆီးကျိတ်ကြီးတဲ့ လက္ခဏာတွေကို လျော့ပါစေပါတယ်။ အမျိုးသားတွေမှာ ဆီးကျိတ်ကြီးတာကြောင့် ဖြစ်တတ်တဲ့ ဆီးသွားရခက်ခဲတာနဲ့ လိင်ဆက်ဆံမှုဆိုင်ရာ အခက်အခဲတွေကို လျော့ပါးစေပါတယ်။
(၉) ရွှေဖရုံသီးမှာ ဗီတာမင်စီနဲ့ လူတင်တို့ ပါဝင်တာကြောင့် မျက်စိကျန်းမာရေးကို ကောင်းမွန်စေပါတယ်။
(၁၀) ရွှေဖရုံသီးမှာပါတဲ့ ဗီတာမင်အေက သွားပိုးစားမှုမဖြစ်အောင် ကာကွယ်ပေးနိုင်ပြီး အိုမင်းမှုကြောင့်ဖြစ်တဲ့ ဝေဒနာတွေကို လျော့ကျစေပါတယ်။
(၁၁) ရွှေဖရုံသီးဟာ ဦးနှောက်ဆဲလ်တွေရဲ့ တည်ဆောက်မှုကို အားပေးတာကြောင့် မှတ်ဉာဏ်ကောင်းမွန်အောင် ပံ့ပိုးပေးနိုင်ပါတယ်။ ဆဲလ်တွေ ထိခိုက်မှုမဖြစ်အောင်လည်း ကာကွယ်ပေးပါတယ်။
(၁၂) ရွှေဖရုံသီးမှာ ရေဓာတ်ပါဝင်မှုမြင့်မားတဲ့အပြင် ပိုတက်ဆီယမ်လည်း ပါဝင်တာကြောင့် နှလုံးကျန်းမာရေးကို ကောင်းစေပါတယ်။ ရွှေဖရုံသီးစားပေးရင် ရေများများမသောက်ရင်တောင် တစ်နေ့တာလုံး ရေဓာတ်ပြည့်ဝနေစေပါတယ်။
(၁၃) ရွှေဖရုံသီးမှာ ဖော့စ်ဖရပ်စ်နဲ့ မဂ္ဂနီဆီယမ်တို့ အလုံအလောက်ပါဝင်တာကြောင့် အရိုးတွေကို သန်စွမ်းစေပါတယ်။ အသက်ကြီးချိန်မှာ ဖြစ်တတ်တဲ့ အရိုးကြွပ်ဆတ်မှုမဖြစ်အောင် ကာကွယ်ပေးနိုင်ပါတယ်။
(၁၄) ရွှေဖရုံသီးရဲ့အရောင်က သူ့မှာ ဘယ်လောက် အာဟာရဓာတ်ပါဝင်နေသလဲဆိုတာ ဖော်ပြနေပါတယ်။ အစိမ်းရင့်ရောင်ရွှေဖရုံသီးဟာ အစိမ်းဖျော့ရောင် ရွှေဖရုံသီးထက် အာဟာရဓာတ်ပိုမိုပါဝင်ပါတယ်။ ရွှေဖရုံသီးကို စားမယ်ဆိုရင် အခွံကိုမခွာပါနဲ့။ အခွံမှာ ဘီတာကယ်ရိုတင်းလို့ခေါ်တဲ့ အင်တီအောက်ဆီးဒင့်တွေ ပါဝင်တာကြောင့် ဆဲလ်တွေကို ကာကွယ်ပေးနိုင်လို့ပါ။ မချက်ပြုတ်ခင် ရေနဲ့သေချာ ဆေးကြောပေးသင့်ပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
