၊ မိုးမင်းထွန်း ၊
အိန္ဒိယနိုင်ငံမှ အသက် ၁၈နှစ်အရွယ် ဆာဘယ်လ်ပါဗီးဟာ Osteogenesis Imperfecta အမည်ရတဲ့ ရှားပါးမျိုးဗီဇရောဂါတစ်မျိုး ခံစားနေရပါတယ်။ အရိုးကြွပ်ဆတ်တဲ့ရောဂါလို့ ခေါ်ဝေါ်ကြ ပြီး ဝေဒနာရှင်တွေရဲ့အရိုးတွေဟာ ဖွဲ့စည်းပုံမမှန်ဘဲ ကျိုးလွယ်တတ်ကြပါတယ်။
သူဟာ မွေးကတည်းက အရေပြားပါးနေခဲ့ပြီး သီတင်းပတ်အနည်းငယ်အကြာမှာတော့ အရိုးတွေ ချည့်နဲ့နေတာကို တွေ့ရှိခဲ့ရပါတယ်။ ကယ်လ်ဆီယမ် ပမာဏများများနဲ့ တခြားဆေးဝါးတွေ သောက်ခိုင်း ခဲ့ပေမယ့် ရောဂါဟာ အချိန်နဲ့အမျှပိုဆိုးလာခဲ့ပါတယ်။ သူ့ခန္ဓာကိုယ်ရှိ အရိုးတွေရဲ့ ၉၀ရာခိုင်နှုန်းကျိုးဖူးပြီး စားတာ၊ လမ်းလျှောက်တာ၊ ထိုင်တာ၊ အိပ်တာတို့ကို တစ်ယောက်တည်းမလုပ်နိုင်တော့ပါဘူး။ မိခင်ဖြစ်သူက မနက်မိုးလင်းကတည်းက ညအထိ သူ့ကိုပြုစုနေရပါတယ်။
ခါဂျီရှဝါအရိုးဆေးရုံမှ အရိုးခွဲစိတ် ဆရာဝန် ဒေါက်တာ မန်နော့ကူးမားချောင်ဒါရီကတော့ ဆာဘယ်လ်ရဲ့အရိုးတွေက ကျိုးလွယ်တဲ့အပြင် ကျိုးတဲ့နေရာပေါ်မှာ ပလတ်စတာအသုံးပြုလို့မရတာကြောင့် အနာကျက်ဖို့ခက်ခဲကြောင်း ပြောပါတယ်။ ဒီလို ရောဂါမျိုးဟာ ဖြစ်ခဲပြီး ဆွေမျိုးနီးစပ်အိမ်ထောင်သည် တွေရဲ့သားသမီးတွေမှာ အဖြစ်များကြောင်း ပြောပြပါတယ်။ ဆာဘယ်လ်ရဲ့မိဘတွေက တစ်ဝမ်းကွဲ မောင်နှမတွေဖြစ်ကြောင်း သိရပါတယ်။
ဆာဘယ်လ်ဟာ တစ်ချိန်လုံးနာကျင်နေပြီး ခန္ဓာကိုယ်ကျုံ့လာနေကာ အရပ်လည်း နောက်ထပ် ရှည်မလာတော့ပါဘူး။ ကုထုံးမရှိသေးတာကြောင့် အခက်တွေ့နေပြီး ကမ္ဘာ့တစ်နေရာရာမှာ ကုထုံးပေါ်လာပြီး သမီးဖြစ်သူရဲ့ရောဂါပျောက်ကင်းဖို့ မိဘတွေက ဆုတောင်းနေကြပါတယ်။
(Ref;TS)
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)