ကိုမိုး
တချို့လူတွေက သီးသန့်အလုပ်လုပ်ရတာကို သဘောကျပေမယ့် တခြားသူတွေက အသင်းအဖွဲ့နဲ့ အလုပ်လုပ်ရတာကို ပိုသဘောကျပါတယ်။ ဘယ်လိုပဲဖြစ်ဖြစ် အဖွဲ့လိုက်လုပ်ဆောင်တဲ့အခါ လုပ်ဖော်ကိုင်ဖက်တွေက တစ်ဦးအပေါ်တစ်ဦးစိတ်ရှည်မှု၊ နားလည်မှုနဲ့ လေးစားမှုတွေရှိဖို့လိုပါတယ်။ အလုပ်အောင်မြင်ဖို့အတွက် အသင်းသားကောင်း တစ်ဦးအနေနဲ့ လုပ်ဆောင်နိုင်စွမ်းရှိရပါမယ်။
တစ်ကိုယ်ကောင်း မဆန်သင့်
အသင်းအဖွဲ့နဲ့လုပ်ဆောင်ရာမှာ အခွင့်အရေးရတိုင်း “ ဒါက ငါအတော်ဆုံးဆိုတာကို ပြနိုင်မယ့် အခွင့်အရေးပဲ” လို့ မတွေးပါနဲ့။
“ ငါတို့အားလုံး စွမ်းဆောင်နိုင်စွမ်းရှိတယ်ဆို တာပြနိုင်မယ့် အခွင့်အရေးကောင်းပဲ” လို့ ပြောပြီး တခြားသူတွေကိုပါ လုပ်ချင်စိတ်ပြင်းပြလာအောင် လှုံ့ဆော်ရပါမယ်။
လူတိုင်း၏ အကြံဉာဏ်ကို အသုံးချပါ
“ ငါပြောတဲ့ နည်းလမ်းအတိုင်းပဲလုပ်ပါ၊ ဒါဘယ်လိုလုပ်ရမယ်ဆိုတာ ငါပဲသေချာသိတာ” ဆိုတဲ့စကားအစား “ဒါကိုအတူစဉ်းစားပြီး လုပ်ရအောင်၊ မင်းတို့မှာ ဘယ်လိုစိတ်ကူးတွေရှိသလဲ” ဆိုပြီးပြော ဆိုလုပ်ကိုင်ပါ။
အပြစ်မရှာသင့်
လွဲမှားမှုတစ်ခုခု ကြုံတဲ့အခါ “ ဒီလိုမှားရတာ မင်းကြောင့်” ဆိုပြီး အပြစ်တင်မယ့်အစား “ ဒါက ငါတို့အားလုံးရဲ့ အမှားပဲ၊ ဒီအမှားမျိုး နောက်ထပ်မဖြစ်အောင် ဘယ်လိုလုပ်ကြမလဲ” လို့သာ ပြောပါ။
အကူအညီတောင်းရန် မကြောက်သင့်
“ အကူအညီတောင်းလိုက်ရင် ငါ့ကို ဘာမှမတတ်ဘူးလို့များ ထင်သွားမလား” ဆိုပြီး စိုးရိမ်နေ မယ့်အစား “ မင်း ဒါကိုလုပ်တတ်လား၊ ငါမလုပ် တတ်လို့ကူညီပါဦး” ဆိုပြီး အကူအညီတောင်းလိုက်ပါ။ ပိုပြီး ရင်းနှီးမှုရလာပါလိမ့်မယ်။
စိတ်ညစ်ညူးနေသူကို အားပေးသင့်
အလုပ်ထဲမှာ စိတ်ညစ်နေတဲ့သူတစ်စုံတစ် ယောက်ရှိခဲ့ရင် “ အရင်ဆုံးစိတ်ကို တည်ငြိမ်အောင်ထား၊ ပြီးမှ ဘာပြဿနာလဲဆိုတာ ငါ့ကိုပြောပြ” ဆိုပြီး အားပေးလိုက်ပါ။
အခြားသူများကို ချီးကျူးရန် မမေ့သင့်
တိုးတက်အောင်မြင်မှုတစ်ခုခု ရရှိတဲ့အခါ ချီးကျူးစကားမဆိုဘဲ နှုတ်ဆိတ်မနေပါနဲ့။ “ ဒီနေ့ ငါတို့တွေအများကြီး အောင်မြင်ခဲ့ပြီ” လို့ အားလုံးကို ပြောလိုက်ပါ။
သဘောမတူညီမှုကို ခွင့်ပြုသင့်
တစ်ခုခု အချေအတင်ဖြစ်လာရင် “ မင်းမှား နေတာ”ဆိုတဲ့ စကားမျိုး ပြောမယ့်အစား “ ဒီနေ့ တော့ ငါတို့ အားလုံး ပင်ပန်းနေပြီကွာ၊ မနက်ဖြန်ကျ ရင်ဒါကိုပြန်စဉ်းစားကြည့်ရအောင်” ဆိုပြီး ပြောပါ။
တာဝန်ကိုယ်စီ ယူပါ
အလုပ်ထဲမှာ ဘယ်သူက ဘာလုပ်ရမှန်း မသိတဲ့ အဖြစ်မျိုးမဖြစ်စေဘဲ “ ဒါက မင်းလုပ်ရမယ့် တာဝန်၊ ဒါက သူ့တာဝန်” ဆိုပြီးချမှတ်ကာ “ ငါတို့ အားလုံးတာဝန်ရှိသူတွေပဲ၊ အောင်မြင်မှုကလည်း ငါတို့အားလုံးနဲ့ဆိုင်တယ်” ဆိုတဲ့အသိစိတ်ရှိပါစေ။
Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။
