– တစ်နေ့တာအသားအရေ ထိန်းသိမ်းမှုပုံစံလေး သိချင်ပါတယ်။
မနက်စောစော ရေချိုးတယ်။ ရေချိုးပြီးရင် Beauty Water လိမ်းတယ်၊ နေကာခရင်မ်လိမ်းတယ်၊ Primer လိမ်းပြီး မိတ်ကပ်လိမ်းပါတယ်။ တစ်နေကုန်ကျတော့ အစိုဓာတ်ထိန်းနိုင်တဲ့ခရင်မ်လေးတွေ ဖျန်းပါတယ်။ ညဘက်ပြန်လာရင်တော့ မိတ်ကပ်ကိုသေချာ Make-up Remover နဲ့ ဖျက်ပါတယ်။ ပြီးရင် Skin Care အဆင့်ဆင့်ကို စနစ်တကျလိမ်းပါတယ်။ အဓိကအိုင်းခရင်မ်နဲ့ နိုက်ခရင်မ်လိမ်းဖြစ်ပါတယ်။ အေးတဲ့ရာသီဥတုဆိုရင် အစိုဓာတ်များတဲ့လိုးရှင်း ရွေးလိမ်းပါတယ်။
– အသားအရေလှပအောင် အိမ်မှာသဘာဝနည်းနဲ့ ပြုလုပ်လေ့ရှိရင်လည်း ပြောပြပေးပါလား။
တစ်ခါတလေ နွားနို့နဲ့ရေချိုးပါတယ်။ ခြေထောက်ကိုဆားကြမ်းပွတ်ပြီး အပူထွက်အောင်လုပ်ပေးပါတယ်။
– ဆံပင်သားအလှအပကိုကော ဘယ်လိုထိန်းသိမ်းလေ့ရှိပါသလဲ။
ခေါင်းလျှော်ခါနီးတိုင်း ဆံပင်ကိုရှားစောင်းလက်ပပ်နဲ့ သံလွင်ဆီရောလိမ်းပြီး ၁၀ မိနစ် – ၁၅ မိနစ်လောက် ခဏထားထားတယ်။ ပြီးမှ ခေါင်းလျှော်ပါတယ်။
– ခန္ဓာကိုယ်အလှအပကို ဘယ်လိုနည်းလမ်းတွေနဲ့ ထိန်းသိမ်းလေ့ရှိပါသလဲ။
ခန္ဓာကိုယ်အလှအပအတွက် အဓိကအစားအသောက်နဲ့ ထိန်းသိမ်းပါတယ်။ အဆီလျှော့စားပါတယ်၊ ထမင်းလျှော့စားပါတယ်၊ အချိုလျှော့စားပါတယ်။ အထူးသဖြင့် မြန်မာအင်္ကျီဝတ်တဲ့အခါ နည်းနည်းကျပ်တယ်လို့ ထင်လာတဲ့အချိန်မှာ လျှော့စားဖြစ်ပါတယ်။
– ဗိုက်မပူဘဲ ဘယ်လိုအဝတ်အစားနဲ့မဆို လှပကြည့်ကောင်းနေအောင် ထိန်းသိမ်းနေနိုင်တဲ့ လျှို့ဝှက်ချက်ရှိရင်လည်း ပြောပြပေးပါလား။
လျှို့ဝှက်ချက်တော့ မရှိပါဘူး။ စောစောကပြောသလိုပဲ ထမင်း၊ အဆီနဲ့အချိုတွေကို လျှော့စားပါတယ်။ ဒါပေမဲ့ ဒီတစ်နှစ် – နှစ်နှစ်အတွင်း ဗိုက်ပူလာတဲ့အတွက် Gym ကိုသွားပြီး Trainer နဲ့ အားကစားလုပ်ဖို့ရှိပါတယ်။
– ကျန်းမာရေးကောင်းမွန်အောင် ဘယ်လိုထိန်းသိမ်းနေထိုင်ဖြစ်သလဲ။
ကျန်းမာရေးကောင်းမွန်အောင် ကိုယ့်ကိုယ်ကိုယ် အသေးအမွှားလေးကအစ ဂရုစိုက်ပါတယ်။
ရာသီဥတုပူလာရင် ရေများများသောက်တယ်၊ ဗီတာမင်စီမှီဝဲတယ်၊ အိပ်ရေးပျက်မခံဘူး။ ဝတဲ့သူပဲဖြစ်ဖြစ် ပိန်တဲ့သူပဲဖြစ်ဖြစ် စည်းနဲ့ကမ်းနဲ့စားသင့်တာစားပြီး ရှောင်သင့်တာရှောင်မယ်ဆိုရင် ကျန်းမာရေးကောင်းနေမယ်လို့ ထင်ပါတယ်။
– စီးပွားရေးအလုပ်နဲ့ အနုပညာအလုပ်တွေကို ဟန်ချက်ညီအောင် ဘယ်လိုထိန်းချုပ်လုပ်ကိုင်ပါသလဲ။
စီးပွားရေးလုပ်ကာစ သုံးလကနေခြောက်လအတွင်းမှာ အနုပညာအလုပ်တွေကို မလုပ်နိုင်ပါဘူး။ အခုတော့ဆိုင်တစ်ဆိုင်က နှစ်နှစ်ကျော်ပြီ၊ တစ်ဆိုင်ကခြောက်လကျော်ပြီ၊ စိတ်ချရတဲ့သူတွေလည်းရှိတဲ့အတွက် အနုပညာအလုပ်တွေလည်း လုပ်နိုင်နေပါပြီ။ ခရီးတွေလည်း ထွက်လို့ရနေပါပြီ။
– စိတ်ဖိစီးမှုများတဲ့အခါ ဘယ်လိုဖြေလျှော့လေ့ ရှိပါသလဲ။
စိတ်ဖိစီးမှုများရင် သူငယ်ချင်းတွေနဲ့ အပြင်သွားတယ်။ တစ်ခါတလေကျရင် ကားမောင်းလိုက်တယ်၊ တစ်ခါတလေ ဂိမ်းကစားတယ်၊ တစ်ခါတလေ ဟာသကားကြည့်တယ်၊ ရုပ်ရှင်သွားကြည့်တယ်။ တစ်ခါတစ်ခါ ကိုယ်ယုံကြည်ရတဲ့သူကို စိတ်ညစ်တဲ့အကြောင်းတွေ ပြောလိုက်တယ်။ ဒီနည်းတွေကစိတ်သက်သာရာ ရသွားစေပါတယ်။
– ပရဟိအလုပ်တွေလည်း အခါအားလျော်စွာ လုပ်တာတွေ့ရတယ်။ ပရဟိတပြုလုပ်တဲ့အတွက် ဘယ်လိုကောင်းကျိုးတွေ ရရှိပါသလဲ။
ပရဟိတလုပ်ပြီး ကောင်းကျိုးရဖို့ဆိုတာထက် ဝါသနာပါလို့ကို လုပ်ဖြစ်နေတာပါ။ ပေါက်စီအသက် ၁၃ နှစ်ကတည်းက မွေးနေ့တိုင်းလှူဖြစ်တယ်။ အခုအသက် ၃၀ ကျော်တဲ့အထိ လှူဖြစ်နေပါတယ်။ ကိုယ့်မွေးနေ့ပွဲကို ကြီးကြီးကျယ်ကျယ်လုပ်ဖို့ထက် ပရဟိတလုပ်လိုက်ရတာကို ပိုသဘောကျပါတယ်။
– ကျန်းမာရေးနဲ့ပတ်သက်ပြီး Healthy Life စာဖတ်ပရိသတ်တွေကို အကြံပြုချင်တာလေးများရှိရင် ပြောပြပေးပါဦး။
ကျန်းမာရေးနဲ့ပတ်သက်ပြီး အဓိကကိုယ့်ကိုယ်ကိုယ် ဂရုစိုက်ဖို့အကြံပြုချင်ပါတယ်။ နေပူရင် ထီးဆောင်းရမယ်၊ ရေများများသောက်ရမယ် အဲဒီလိုနေ့စဉ်အသေးအမွှားကအစ ဂရုစိုက်ပေးမယ်ဆိုရင် ကျန်းမာရေးကောင်းတဲ့သူ ဖြစ်လာမယ်လို့ထင်ပါတယ်။ ကျန်းမာရေးနဲ့ပတ်သက်တဲ့ စာတွေကိုဖတ် ပြီး ကိုယ့်ရောဂါအလိုက် ဘယ်လိုနေထိုင်ရမယ်၊ ဘယ်လိုစားသောက်ရမယ်ဆိုတာ သိရှိဆင်ခြင်မယ်ဆိုရင် ပိုပြီးကျန်းမာရေးကောင်းတဲ့သူ ဖြစ်လာမယ်လို့ ထင်ပါတယ်ရှင့်။
