ပါမောက္ခဦးအေးမွန် (ခွဲစိတ်အထူးကု ဆရာဝန်ကြီး)နှင့် တွေ့ဆုံဆွေးနွေးခြင်း
မေး ။ ရင်သားအကျိတ် (Phyllodes Tumor) အကြောင်း သိပါရစေ ဆရာ။
ဖြေ ။ Phyllodes Tumor ဆိုတာ ရင်သားအကျိတ် တစ်မျိုးပါပဲ။ ဒါပေမဲ့ တွေ့နေကျ ရင်သားအကျိတ်တွေ၊ ရင်သားကင်ဆာအကျိတ်တွေတော့ မဟုတ်ပါ ဘူး။ သီးသန့် ရောဂါတစ်ခု ဖြစ်ပါတယ်။ အပွားမြန်တဲ့ ရောဂါဖြစ်ပြီး သုံးလေးပတ်အတွင်း၊ လပိုင်းမှာ အကျိတ်က ရုတ်တရက် ကြီးလာပါတယ်။
မေး ။ ရင်သားအကျိတ် (Phyllodes Tumor) က အဖြစ်များပါသလား ဆရာ။
ဖြေ ။ ဒီအမျိုးအစားက အဖြစ်တော့ မများပါဘူး၊ ရှားပါတယ်။ အဖြစ်မများပေမယ့် သိထားသင့်တဲ့ ရောဂါ တစ်ခုပဲဖြစ်ပါတယ်။ ရင်သားအကျိတ်အားလုံးရဲ့ ၁ ရာခိုင်နှုန်းပဲ ရှိပါတယ်။ တစ်နှစ်အတွင်း ရင်သားအ ကျိတ်ဖြစ်သူ အယောက် ၁၀ဝ မှာ တစ်ယောက်လောက်ပဲရှိပါတယ်။ နေ့စဉ် ခွဲစိတ်ကုသမှုပေးနေတဲ့ ဆရာတို့လို ခွဲစိတ်ဆရာဝန်ကြီးတွေတောင် တစ်နှစ်မှာ တစ်ယောက်၊ နှစ်နှစ်မှာ တစ်ယောက် . .အဲဒီ လောက်ပဲတွေ့ရပါတယ်။ ဆရာဆို မကွေးမှာတာဝန်ကျတာ ခြောက်နှစ်အတွင်း ရင်သားအကျိတ် (Phyllodes Tumor) ဖြစ်သူတွေ့တာ သုံးယောက်ပဲရှိပါသေးတယ်။
မေး ။ ရင်သားအကျိတ် (Phyllodes Tumor)က တခြား ရင်သားအကျိတ်၊ ရင်သားကင်ဆာအကျိတ်တွေ နဲ့ ဘယ်လိုခြားနားနေပါသလဲ ဆရာ။
ဖြေ ။ အမျိုးသမီးတွေမှာအဖြစ်များတဲ့ ရင်သားအကျိတ် Fibroadenoma ဆိုရင် အကြီးမမြန်ပါဘူး၊ နှစ်နဲ့ ချီပြီး ရှိနေတတ်ပါတယ်။
ရင်သားကင်ဆာအကျိတ်ဆိုရင်လည်း ဒီလောက် အကြီးမမြန်ဘူး၊ ၄-၅-၆ လအတွင်းကျမှ ခန္ဓာကိုယ်တစ်ခုလုံး၊ ချိုင်း(ဂျိုင်း)တွေအထိ အကျိတ်တွေပြန့် လာတတ်ပါတယ်။ ဒီရင်သားအကျိတ် (Phyllodes Tumor) ဆိုရင် တစ်နေရာတည်းမှာပဲ ရှိနေတတ်ပြီး ကြီးလာတတ်တယ်။ တခြားနေရာတွေကို သိပ်မပြန့်ဘူး။ ဒါက ဒီအကျိတ်ရဲ့ ထူးခြားချက်ပဲဖြစ်ပါတယ်။ သစ်ပင်ကြီးထွားလာသလို ရုတ်တရက် ထွားလာပါတယ်။
မေး ။ ရင်သားအကျိတ် (Phyllodes Tumor) ရဲ့ လက္ခဏာတွေကို သိပါရစေ ဆရာ။
ဖြေ ။ ရင်သားအကျိတ် (Phyllodes Tumor) ဖြစ်ရင် အကျိတ်အလုံး တစ်လုံးတည်းကနေ ကြီးလာတာ ဖြစ်ပါတယ်။ အကျိတ်က နည်းနည်းလည်း မာပါတယ်။ပြီးတော့ နို့သီးခေါင်း ချိုင့်ဝင်တာလည်း မရှိပါဘူး။ဒီလို လက္ခဏာတွေပေါ်တာနဲ့ ရင်သားအကျိတ် (Phyllodes Tumor) လို့ အတိအကျ ပြောလို့ မရပါဘူး။ တစ်သျှူးအသားစယူစစ်ဆေးမှု (Biopsy) ယူမှ သိနိုင်ပါတယ်။
မေး ။ ရင်သားအကျိတ် (Phyllodes Tumor) က ဘယ်အရွယ်တွေမှာ အဖြစ်များပါသလဲ ဆရာ။
ဖြေ ။ ကင်ဆာမဟုတ်တဲ့ ရင်သားအကျိတ်က အသက် ၁၅ နှစ်ကနေ ၃၀ နှစ်အတွင်း အဖြစ်များပေမယ့် ဒီ ရင်သားအကျိတ် (Phyllodes Tumor)က အသက် ၃၅ နှစ်အထက် အသက် ၄၀-၅၀ အရွယ်မှာ အဖြစ် များတာကို တွေ့ရပါတယ်။
မေး ။ ရင်သားအကျိတ် (Phyllodes Tumor) ကစိုးရိမ်ရတဲ့ ကျန်းမာရေးပြဿနာလား ဆရာ။
ဖြေ ။ အကျိတ်က အရမ်းကြီးပေမယ့် အပွားမမြန်ဘူး။ အရိုးတွေ၊ သွေးကြောတွေကို ပြန့်လေ့မရှိဘူး။ ဒီရင် သားအကျိတ်ဖြစ်ရင် ခွဲထုတ်လိုက်ရတယ်။ ဒါပေမဲ့ အဓိက ပြဿနာက ပြန်ပြန်ဖြစ်တာပါပဲ။ ခွဲပြီးရင် ဓာတ်ရောင်ခြည်ကင်တာ၊ ကင်ဆာဆေးသွင်းကုသတာ၊ ဟော်မုန်းဆေးပေးတာတို့ လုပ်ရင်လည်း သိပ် အဆင်မပြေပါဘူး။ အဓိက ကုထုံးက ခွဲတာပဲ ဖြစ်ပြီး အကျိတ်တင်မက ဘေးကတစ်သျှူးအကောင်းတွေ ကိုပါ ခွဲထုတ်ရပါတယ်။
မေး ။ ရင်သားအကျိတ် (Phyllodes Tumor) အမျိုးအစား ဘယ်နှစ်မျိုးလောက် ရှိပါသလဲ ဆရာ။
ဖြေ ။ ရင်သားအကျိတ် (Phyllodes Tumor) ကို ရောဂါဗေဒဆရာဝန်ကြီးတွေက အမျိုးအစား သုံးမျိုးထပ် ခွဲခြားထားပါတယ်။
(၁) ကင်ဆာမဟုတ်တဲ့ ရင်သားအကျိတ် (Benign Phyllodes Tumor) ၊
(၂) ရင်သားအကျိတ်ကင်ဆာ (Malignant Phyllodes Tumor) နဲ့
(၃) ဘော်ဒါလိုင်း ရင်သားအကျိတ် (Borderline Phyllodes Tumor) ဆိုပြီး ဆဲလ်တွေ၊ ပုံစံတွေ ကြည့်ပြီး သုံးမျိုးခွဲထားပါတယ်။
မေး ။ ရင်သားအကျိတ် (Phyllodes Tumor) ဖြစ်သူ နဲ့ ပတ်သက်ပြီး ဆရာ့အတွေ့အကြုံလေးကို ပြောပြပေးပါ ဆရာ။
ဖြေ ။ ရန်ကုန်ဆေးရုံကြီးမှာ ဆရာတွေ့ဖူးတဲ့ လူနာတစ်ယောက်ဆို ရင်သားအကျိတ်(Phyllodes Tumor) ဖြစ်ပြီး ပြန်ပြန်ဖြစ်လို့ ၁၃ ခါအထိ ခွဲခဲ့ရပါတယ်။ ဒီလိုထပ်တလဲလဲဖြစ်လာတော့ သွေးကြောတွေကို ထိခိုက်ပြီး အသက်အန္တရာယ်ထိခိုက်မှု ရှိပါတယ်။ အခု မကွေးဆေးရုံကြီးမှာ ကုနေတဲ့လူနာဆိုရင် အခုခွဲတာ ၆ ကြိမ်ရှိပါပြီ။ တွေ့တုန်းက ခပ်သေးသေး ခပ်မာမာအကျိတ်၊ ကြီးတာက မြန်တယ်။ အဲဒါ နဲ့ ခွဲထုတ်လိုက်တယ်။ ခွဲရတာ လွယ်ပေမယ့် ပြန်ဖြစ်လာတယ်။ ဒါနဲ့ ပြန်ခွဲလိုက်ရတယ်။ အခုဆို ၆ ကြိမ်တောင်ရှိနေပြီ။
မေး ။ ရင်သားအကျိတ် (Phyllodes Tumor) နဲ့ ပတ်သက်ပြီး အများပြည်သူကို ပညာပေးလိုတာရှိရင် သိပါရစေ ဆရာ။
ဖြေ ။ ရင်သားအကျိတ်ပေါ်လာရင် ဆရာဝန်တွေကို အမြန်ဆုံး ပြသင့်ပါတယ်။ အသက် ၃၀ အောက်အရွယ် ဆိုရင် မိသားစုမှာ ရင်သားကင်ဆာ ရာဇဝင်မရှိဘူး ဆိုတဲ့အခါ ကင်ဆာဖြစ်နိုင်ခြေ နည်းပါတယ်။ ဒါပေ မဲ့အိမ်ထောင်ရှိရှိ၊ မရှိရှိ၊ သားသမီးရှိရှိ၊ မရှိရှိ ရင်သား အကျိတ်ဖြစ်ပြီး ရုတ်တရက် အကြီးမြန်လာမယ်ဆို ရင်တော့ အမြန်ဆုံး ခွဲလိုက်ဖို့ အရေးကြီးပါတယ်။
