မိမိုး ( ဆေးဝါးတက္ကသိုလ် )
အသက်ကြီးလာတဲ့အခါ အထူးသဖြင့် အမျိုးသမီးတွေဟာ အရိုးပါး ၊ အရိုးပွရောဂါနဲ့ အရိုးအက်တာတွေ ဖြစ်နိုင်ခြေ ပိုများလာပါတယ်။ ဒါကြောင့် အရိုးအဆစ်တွေ သန်စွမ်းကျန်းမာနေစေဖို့ရာအတွက် အထူးတလည် စားသောက်သင့်တဲ့ အရာတွေကို ရေးသား လိုက်ရပါတယ်။
- ဟင်းသီးဟင်းရွက်များ
အစိမ်းရောင် ဟင်းသီးဟင်းရွက်တွေမှာ အရိုး ကျန်းမာသန်စွမ်းဖို့အတွက် လိုအပ်တဲ့ အကောင်းဆုံး သတ္တုဓာတ်တွေ ပါဝင်ပါတယ်။ ကယ်လ်စီယမ် အပြင် မဂ္ဂနီဆီယမ်၊ ဖော့စ်ဖရပ်စ်၊ ပိုတက်စီယမ်နဲ့ သံဓာတ်တွေ ပါဝင်တဲ့အတွက် အရိုးအဆစ် သန်မာစေပါတယ်။ ကိုက်လန်၊ မုန်ညင်းစိမ်း၊ဟင်းနုနယ်ရွက်၊ ပန်းဂေါ်ဖီစိမ်းစတဲ့ အစိမ်းရောင် ဟင်းသီးဟင်းရွက်တွေမှာ ကယ်လ်စီယမ်နဲ့ တခြားသတ္တုဓာတ်တွေပါ ၀င်ပါတယ်။
- ပရိုတင်းပေါများသည့် အစာများ
ပရိုတင်းဓာတ် ပါဝင်မှုများတဲ့ အစာတွေက အရိုးအဆစ်ထိခိုက်ဒဏ်ရာရတာကို သက်သာစေပါတယ်။ အရိုးအကြောစနစ် သန်စွမ်းစေဖို့ စားသင့်တဲ့ ပရိုတင်း ပါဝင်မှုများတဲ့ ကြက်ရင်ပုံသား၊ ငါး၊ ဒိန်ခဲ၊ ဥအမျိုးမျိုး၊ တိုဟူး၊ နွားနို့၊ ပဲနို့၊ အဆီနည်းအမဲသား၊ ပဲအမျိုးမျိုး၊ အစေ့အဆန်နဲ့ အခွံမာသီး စတာတွေ ဖြစ်ကြပါတယ်။
- စွပ်ပြုတ်
အရိုးသန်စွမ်းစေဖို့ ဟင်းသီးဟင်းရွက်နဲ့အသားတွေ ပါဝင်မှုများတဲ့ စွပ်ပြုတ်တွေကို သောက်သင့်ပါ တယ်။
ကောက်နှံတစ်ခုလုံးအစာ
သင့်အစာထဲမှာ ကာဗိုဟိုက်ဒရိတ်အလုံအလောက်ရဖို့ အရေး ကြီးပါတယ်။ ကာဗိုဟိုက်ဒရိတ် အရင်းအမြစ် ကောင်းကောင်းရရှိစေဖို့ ဆန်လုံးညို၊ ပေါင်မုန့်ညို၊ ခေါက်ဆွဲညို စတာတွေကို စားသင့်ပါတယ်။ မဂ္ဂနီဆီယမ် ပါဝင်မှုများတဲ့အတွက် ကယ်လ်စီယမ် စုပ်ယူမှု အားကောင်းစေပါတယ်။
- သတ္တုဓာတ်ပါဝင်မှု များသည့် အစာများ
ခန္ဓာကိုယ်ထဲမှာ သတ္တုဓာတ်မျှတနေမှသာ အရိုးအဆစ်တွေ သန်စွမ်း ကျန်းမာနေမှာပါ။ သတ္တုဓာတ် ပါဝင်မှု အများဆုံး အရင်းအမြစ်တွေက လတ်ဆတ်တဲ့ သစ်သီးဝလံနဲ့ ဟင်းသီးဟင်းရွက်တွေပဲဖြစ်ပါတယ်။ အခွံမာသီး၊ ပင်လယ်ရေညှိနဲ့ အစေ့အဆန်တွေမှာလည်း သတ္တုဓာတ်ပါဝင်မှုများပါတယ်။
- အရိုးပါစားနိုင်သော ငါးများ၊ ကြက်ရိုး
တိရစ္ဆာန်ထွက်အစာနဲ့ ပတ်သက်ရင် ကယ်လ်စီယမ်ပါဝင်မှုအများဆုံး အစာတွေက အရိုးတွေပဲ ဖြစ် ပါတယ်။ အရိုးပါ ကြိတ်ဝါးစားနိုင်တဲ့ ငါးလေးတွေ၊ ကြက်အရိုးနုတွေ စတာတွေက အရိုးသန်စွမ်းကျန်းမာစေတဲ့ အစာတွေ ဖြစ်ပါတယ်။
- ကျန်းမာရေးနှင့် ညီညွတ်သည့် အဆီများ
ကောင်းမွန်တဲ့ အဆီတွေက အရိုးတွေကို သန်စွမ်းကျန်းမာစေပါတယ်။ EPA နဲ့ DHA တို့လို ငါးကြေးဆီတွေက သင့်နေ့စဉ်အစာထဲမှာ ပါဝင်သင့်ပါတယ်။ အရိုးကျန်းမာစေတဲ့ အဆီပါဝင်တဲ့ အစာတွေက ဆယ်လ်မွန်ငါး၊ ဆာဒင်းငါး၊ တူနာငါးစတာတွေ ဖြစ်ကြပါတယ်။
Ref : HD