မီမိုးမေ (ဆေးဝါးတက္ကသိုလ်)
ထမင်းတွေအများကြီးစားလို့ပဲဖြစ်ဖြစ်၊ အဆီအအိမ့်တွေ အစားများလို့ဖြစ်ဖြစ်၊ ဘီယာအသောက်များလို့ဖြစ်ဖြစ် ဗိုက်ပူနေပြီဆိုရင် ဗိုက်ချပ်ရပ်စေဖို့ လိုက်နာသင့်တဲ့ အဆင့်လေးရပ်ရှိပါတယ်။
အဆင့် (၁) သင်စားနေကျအစာကို ပြန်စဉ်းစားပါ
သင်စားတဲ့ အစားအသောက်ထဲမှာ သကြားနဲ့ ကာဗိုဟိုက်ဒရိတ် (ထမင်း၊ ခေါက်ဆွဲ၊ ပေါင်မုန့်) စတာတွေများနေသလား ဆန်းစစ်ပါ။ များနေရင် လျှော့စားသင့်ပါတယ်။ ဆော်ဒါအချိုရည်သောက်မယ့်အစား ရေနွေးကြမ်းသောက်ပေးပါ။ အချိုစာတွေအစား အခွံမာသီးနဲ့ သစ်သီးတွေ စားပေးပါ။ သကြားအစား ပျားရည်သုံးပါ။ ဟင်းသီးဟင်းရွက်နဲ့ အမျှင်ဓာတ်များများစားပေးပါ။
အဆင့်(၂)အပိုကိုယ်အလေးချိန်ကို လျှော့ချပါ
တစ်နေ့မှာ မိနစ် ၃၀ ခန့် ပြေးပါ။ မကြာခင် သင့်ကိုယ်လုံးအနေအထား ပြောင်းလဲလာပါလိမ့်မယ်။ အစပိုင်းမှာတော့ မိနစ် ၃၀ ပြေးနိုင်ဖို့ ဘယ်လွယ်ပါ့မလဲ။ လမ်းလျှောက်လိုက်၊ ပြေးလိုက် လုပ်ပေးပါ။ ပြေးတာက လမ်းလျှောက်တာထက် ကယ်လိုရီ နှစ်ဆခွဲပိုမိုလောင်ကျွမ်းစေပါတယ်။
တစ်ပတ်မှာ ၂-၃ ကြိမ်ခန့်၊ တစ်ကြိမ်မှာ မိနစ် ၃၀ ရေကူးပါ။ တစ်နာရီကြာ ရေကူးတာကြောင့် ကယ်လိုရီ ၅၀ဝခန့်လောင်ကျွမ်းစေနိုင်ပါတယ်။
စက်ဘီးစီးတာက ကိုယ်အလေးချိန်လျော့ကျလိုသူတွေလုပ်သင့်တဲ့ အခြေခံလေ့ကျင့်ခန်းတစ်ခုပါ။ တစ်ပတ်မှာ ၂-၃ ကြိမ်ခန့် ဘေးကင်းတဲ့နေရာမှာ စက်ဘီးစီးပေးပါ။
အဆင့် (၃) ဝမ်းဗိုက်သန်စွမ်းစေမည့် လေ့ကျင့်ခန်းလုပ်ပါ
ဝမ်းဗိုက်သန်စွမ်းစေတဲ့ လေ့ကျင့်ခန်းလုပ်တာက ဗိုက်ချပ်စေရုံသာမက ကိုယ်အလေးချိန်အပိုကိုပါ လျော့ကျစေပါတယ်။ အဝလွန်နေရင် ဗိုက်လည်းကျ၊ ကြွက်သားလည်း သန်စွမ်းမှုရှိစေမယ့် လေ့ကျင့်ခန်းကို ရွေးချယ်ပါ။
ဗိုက်ရှပ်လေ့ကျင့်ခန်း
ဒီလေ့ကျင့်ခန်းကိုလုပ်နိုင်ဖို့ အရင်ဆုံး အဆုတ်ထဲက လေတွေကို ရှူထုတ်ပြီး ဝမ်းဗိုက်ကို ကျောပြင်ဆီ ရှပ်ထားပါ။ ၁၅-၃၀ စက္ကန့်လောက် အသက်ရှူအောင့်ထားပါ။ ဒီလေ့ကျင့်ခန်းကို တစ်နေ့ ၃-၄ကြိမ်ပြုလုပ်ပေးရင် နောက်ပိုင်းမှာ သိသိသာသာ ဗိုက်ချပ်စေပါတယ်။
ဒိုက်ထိုးလေ့ကျင့်ခန်း
ဝမ်းဗိုက်ချပ်ရပ်စေတဲ့ ထိရောက်တဲ့ လေ့ကျင့်ခန်းပါ။ တစ်နေ့မှာ ၂-၃ ကြိမ် ပြုလုပ်ပါ။ တစ်ကြိမ်လုပ်ရင် စက္ကန့် ၃၀ ကြာပြုလုပ်ပေးပါ။ ဖြည်းဖြည်းချင်းပြုလုပ်တဲ့ လေ့ကျင့်ခန်းကို တိုးမြှင့်ပေးပါ။ ကယ်လိုရီလောင်ကျွမ်းစေတဲ့အပြင် ဝမ်းဗိုက်ကြွက် သားကို သန်စွမ်းကျစ်လျစ်စေပါတယ်။ ခါးနာတာ ကိုလည်းသက်သာစေပါတယ်။
အဆင့် (၄) ကြွက်သားတည်ဆောက်ပါ
ဒီလေ့ကျင့်ခန်းက ဗိုက်ချပ်ရပ်စေပြီး တင်ပါးတွေကို သန်စွမ်းကျစ်လျစ်စေပါတယ်။ ပက်လက်လှန်လှဲလျောင်းပြီး လက်တွေကို ကြမ်းပြင်ပေါ်ချထားပါ။ သင့်ကိုယ်ဘေးမှာချထားရင်း ခြေထောက်ကို ဖြည်းဖြည်းချင်းမြှင့်လိုက်ပါ။ ပြီးရင် ပြန်ချပါ။ ၁၀-၁၅ ကြိမ်ပြုလုပ်ပေးရပါမယ်။ ရက် ၃၀ အတွင်း သိသာတဲ့ တိုးတက်မှုကိုရရှိစေမှာဖြစ်ပါတယ်။
အကြံပြုချက်
လေ့ကျင့်ခန်းလုပ်ပြီးချိန်မှာ ရေအေးနဲ့ ရေချိုးပါ။ ရေအေးက ကြွက်သားနာကျင်မှုဖြစ်စေတဲ့ လက်တစ်အက်စစ်ပမာဏ လျော့ကျအောင် မတတ်နိုင်ပါဘူး။ ဒါပေမဲ့ အပိုကယ်လိုရီကို လောင်ကျွမ်းအောင်အားပေးပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
