ဒေါက်တာမိုးအောင်ကျော်နိုင် (အထွေထွေရောဂါအထူးကု ဆရာဝန်ကြီး) မှ ဖြေကြားပေးပါသည်။
Q. ဟိုတနေ့က မီးစက်နှိုးပြီး စာသင်တာ အငွေ့က စာသင်ခန်းထဲဝင်သွားလို့ ဆရာမကော ကလေးတွေပါ သတိလစ်သွားတယ်လို့ သိရပါတယ်။ အဲဒါ ဘာကြောင့် ဖြစ်နိုင်ပါသလဲ ဆရာ။
A. ဒါက ကာဗွန်မိုနောက်ဆိုက်ငွေ့အဆိပ်သင့်ခြင်း (CO Poisoning) ကြောင့် ဖြစ်တာပါ။ အလုံပိတ်အခန်းထဲမှာ လေလုံနေတယ်။ အဲဒီအချိန်မှာ မီးစက်ဖွင့်လို့ထွက်လာတဲ့ ဓာတ်ငွေ့တွေက ကာဗွန်မိုနော့ဆိုက်ငွေ့တွေဖြစ်ပြီး ရှူမိသူတွေရဲ့ ခန္ဓာကိုယ်ထဲ ဝင်ရောက်ချိန်မှာ အောက်ဆီဂျင်နေရာ ဝင်သွားရာက အဆိပ်သင့်ပါတယ်၊ အဲဒီအခါ ခေါင်းကိုက်မယ်။ ခေါင်းမူးမယ်။ အားနည်းလာမယ်။ ဗိုက်အနေရခက်မယ်။ အန်မယ်။ အဲဒါကို ချက်ချင်းဆွဲထုတ်ပြီး အောက်ဆီဂျင်မြန်မြန်မပေးနိုင်ဘူးဆိုရင် အသက်အန္တရာယ်ရှိနိုင်ပါတယ်။ ကလေးတွေ၊ အသက်ရှူလမ်းကြောင်း အားနည်းသူတွေဆိုရင် အထူးသတိထားသင့်ပါတယ်။ ဒါကြောင့် မီးစက်ကို အလုံခန်းထဲမှာထားပြီး ဘယ်တော့မှမဖွင့်ရပါဘူး။ မီးစက်ကို လေဝင်လေထွက်ရှိတဲ့နေရာ၊ အပြင်မှာထားရပါမယ်။ ကိုယ်နေတဲ့နေရာကို မီးစက်ကထွက်တဲ့ အငွေ့တွေမဝင်အောင် စီစဉ်ထားသင့်ပါတယ်။ ဒါကို အသိပညာ ရှိထားသင့်ပါတယ်။
