———၊ စူး (ဆေးဝါးတက္ကသိုလ်) ၊———
ဒီလေ့ကျင့်ခန်းတွေက အိမ်မှာပြုလုပ်နိုင်ပြီး ပြေးတာထက်တောင် ကယ်လိုရီပိုကျစေနိုင်တယ်လို့ သိရပါတယ်။
(၁) ခုန်ပြီးဆွဲဆန့်လေ့ကျင့်ခန်း
ဒီလေ့ကျင့်ခန်းက အချိန် ၁၀ မိနစ်လောက် ပြုလုပ်ပေးရုံနဲ့ ကယ်လိုရီ ၁၀ဝ ကျော် လောင်ကျွမ်းစေနိုင်ပါတယ်။ ဒီလေ့ကျင့်ခန်းက လက်မောင်း၊ ရင်ဘတ်၊ တင်ပါး၊ ဝမ်းဗိုက်အပါအဝင် ခန္ဓာကိုယ်တစ်ခုလုံးနီးပါးကို ထိရောက်စေပါတယ်။ သက်လုံကောင်းစေပါတယ်။ အားသာချက်က ဘာကိရိယာမှမလိုတာပါပဲ။
ဘယ်လိုပြုလုပ်ရမလဲ
အရင်ဆုံး ဆောင့်ကြောင့်ထိုင်ပြီး လက်ဖဝါးနှစ်ဖက်ကို သင့်ခန္ဓာကိုယ်ရှေ့ ကြမ်းပြင်ပေါ်မှာ ထောက်ထားပါ။
ခုန်ပြီး ခြေထောက်တွေကို ဒိုက်ထိုးတဲ့အနေအထား ပြုလုပ်ပေးပါ။
တစ်ကြိမ်ဒိုက်ထိုးပြီး ဆောင့်ကြောင့်ထိုင်တဲ့ အနေအထား ပြန်နေပါ။
ခုန်ပြီး မတ်တပ်ရပ်ကာ လက်မောင်းတွေကို သင်မြှင့်နိုင်သလောက် ခပ်မြင့်မြင့်ကို ဆွဲဆန့်ဖို့ ကြိုးစားပေးပါ။ (ဝါသနာပါရင် ဒီအနေအထားမှာ လက်ခုပ်တီးလို့ရပါတယ်)
ဒါကို ထပ်ခါထပ်ခါ ပြုလုပ်ပေးပါ။ အချိန်တစ်မိနစ်အတွင်း အကြိမ် ၂၀ ခန့် ပြုလုပ်နိုင်ပါတယ်။ သင့်ခန္ဓာကိုယ်ရဲ့ ကြံ့ခိုင်သန်စွမ်းမှုပေါ် မူတည်ပြီး ဖြည်းဖြည်းချင်း တိုးလုပ်သွားပါ။
(၂) လက်ဝှေ့ထိုးခြင်း
လက်ဝှေ့ထိုးဖို့ မိတ်ဆွေမလိုပါဘူး။ လေထဲကို ထိုးလို့ရပါတယ်။ မိနစ် ၆၀ အတွင်း လက်ဝှေ့ထိုးတဲ့ လေ့ကျင့်ခန်းလုပ်တာက ကယ်လိုရီ ၃၅၀ ကနေ ၄၅၀ လောက် လောင်ကျွမ်းစေနိုင်ပါတယ်။ ဒီလေ့ကျင့်ခန်းက ကြွက်သားတွေကို သန်စွမ်းစေပြီး ကိုယ်အလေးချိန် လျော့ကျစေကာ နှလုံးကို ပိုကျန်းမာစေပါတယ်။ သက်လုံလည်း ပိုကောင်းစေပါတယ်။
ဘယ်လိုပြုလုပ်ရမလဲ
ခြေထောက်တွေကို ပခုံးအကျယ်အတိုင်း ချဲရပ်ပြီး လက်မောင်းတွေက ရင်ဘတ်နားမှာ လက်သီးဆုပ်ထားဟန်လုပ်ပါ။ (ပုံ ၁ အတိုင်း)
ညာခြေထောက်ကို ထုတ်ပြီး ပုံ ၂ အတိုင်း လက်သီးထိုးဟန် ပြင်ပါ။
ပုံ (၃) အတိုင်း ခြေထောက်တစ်ဖက်နဲ့ လက်တစ်ဖက်ကို ဆန့်ထုတ်ကာ လေထဲကို လက်သီးထိုးလိုက်ပါ။
တစ်ဖန် ဘက်ပြောင်းပြီး ပြုလုပ်ပေးပါ။ ဒူးတွေကို ထိန်းချုပ်နိုင်ဖို့ သတိရပါ။ ခြေတံက တဖြောင့်တည်း ဖြစ်နေရပါမယ်။
ခြေထောက်တစ်ဖက်ကို ၂ ကြိမ်ဆက်တိုက်လုပ်ပါ။ ပြီးမှ နောက်ခြေထောက်တစ်ဖက်ကို ပြောင်းလုပ်ပါ။ ၄၅ စက္ကန့် လုပ်ပြီးတိုင်း ၁၅ စက္ကန့်ခန့် အသက်ဝ၀ ရှူသွင်းပေးရပါမယ်။
(၃) ဒူးဖြင့်တိုက်ခြင်း
ဒါက ကယ်လိုရီများများ လောင်ကျွမ်းစေတဲ့ လေ့ကျင့်ခန်းတစ်မျိုးပါပဲ။ ဒါ့အပြင် ကြွက်သားဟန်ချက်ညီစေပြီး နှလုံးသွေးကြောစနစ်ကို ကျန်းမာကြံ့ခိုင်စေပါတယ်။
ဘယ်လိုပြုလုပ်ရမလဲ
မတ်တပ်ရပ်ပြီး လက်တွေကို အပေါ်မြှင့်ထားပါ။
ဘယ်ဘက်ဒူးကို မြှင့်ပြီး တပြိုင်တည်းမှာ လက်မောင်းတွေကို ဆွဲချလိုက်ပါ။ (ပုံ ၂ အတိုင်း)
ပြီးရင် ပုံ (၃) အတိုင်း ဘယ်ဒူးကိုမြှင့်ပြီး ဒူးနဲ့တိုက်တဲ့ပုံစံ လုပ်ဆောင်ပါ။
နောက်ဒူးနဲ့ ထပ်ပြီး လုပ်ပေးပါ။ ဖြည်းဖြည်းချင်း လေ့ကျင့်ခန်းအရှိန်ကိုတိုးပြီး လုပ်ဆောင်သွားပါ။
သတိပြုရန်
ပိုထိရောက်ဖို့ ကျန်းမာရေးနဲ့ ညီညွတ်တဲ့ အစားအသောက်တွေကို စားပေးပြီး အဆင်သင့်အစာတွေနဲ့ ဆီကြော်စာတွေကို ရှောင်ကြဉ်ပေးဖို့ အကြံပြုလိုပါတယ်။
