၊ လရိပ်မေ ၊
ခြေသလုံး၊ ပေါင်နဲ့တင်ပါးဆုံကြွက်သားတွေ သန်မာစေမယ့် ကိရိယာလွတ်အိမ်တွင်းလေ့ကျင့်ခန်းတချို့ဖြစ်ပါတယ်။ ဒီလေ့ကျင့်ခန်းတွေမလုပ်ခင် သွေးပူလေ့ကျင့်ခန်း၊ အကြောလျှော့လေ့ကျင့်ခန်း အနည်းငယ်ပြုလုပ်ပေးသင့်ပါတယ်။
– ခြေထောက်ဆန့်ပြီး ခုန်ခြင်း
ဘယ်ဘက်ခြေထောက်ကို ဒူးကွေးပြီး ရှေ့သို့ထုတ်ထားပါ။ ညာခြေထောက်ကို နောက်မှာထားပြီး ညာဒူးခေါင်းကို ဘယ်ဒူးခေါင်းထက်နိမ့်အောင် နေရပါမယ်။ လက်နှစ်ဖက်ကို အနောက်ဘက်သို့ ဆန့်ထားပါ။ ရှေ့ထုတ်ထားတဲ့ ဘယ်ခြေထောက်ကိုအားပြုပြီး အရှိန်ပါအောင် လက်တွေကိုမြှောက်ကာ ခုန်လိုက်ပါ။ ပြန်အကျမှာ ညာခြေထောက်နဲ့ အရင်ထိပြီး မူလပုံစံ အနေအထားပြန်နေရပါမယ်။ ဘယ်ခြေထောက်နဲ့ ၁၀ ကြိမ်ခုန်ပြီး ညာခြေထောက်နဲ့ ၁၀ ကြိမ်ပြုလုပ်ပေးပါ။
– ခြေထောက်ကွေးပြီး ခုန်ခြင်း
မတ်တပ်ရပ်အနေအထားနေပါ။ ဒူးနှစ်ဖက်ကို အနည်းငယ်သာကွေးထားပြီး လက်နှစ်ဖက်ကို နောက်သို့ပစ်ထားပါ။ ဒီပုံစံအတိုင်းခုန်လိုက်ပြီး ဒူးတွေကိုကွေးကာ အရှေ့ဘက်သို့တိုးလိုက်ပါ။ အားစိုက်ပြီး ခုန်ပေးဖို့လိုပါတယ်။ ဒီအတိုင်း အကြိမ် ၃၀ခုန်ပေးရမှာဖြစ်ပါတယ်။ ဒီလေ့ကျင့်ခန်းက တခြားလေ့ကျင့်ခန်းတွေထက် ပိုပြီးမောတတ်တဲ့တွက် ၁၀ ခါခုန်ပြီး တစ်မိနစ်ခန့်နားလိုက်၊ ခုန်လိုက်ပြန်လုပ်ပေးသင့်ပါတယ်။
– ပေါင်အပြင်ပိုင်း လေ့ကျင့်ခြင်း
ခန္ဓာကိုယ်ကို ညာဖက်သို့စောင်းပြီး ဘေးတိုက်လှဲလျောင်းနေရပါမယ်။ ဦးခေါင်းကို လက်နဲ့ထောက်ထားပါ။ ခြေထောက်တွေကိုထပ်ပြီး ဆန့်တန်းထားပါ။ ဒီအနေအထားအတိုင်း ဘယ်ဘက်ခြေထောက်ကို အပေါ်ဘက်သို့ ဖြည်းဖြည်းချင်း မြှောက်ပေးရပါမယ်။ ပြီးရင်ပြန်ချပါ။ ဒီလေ့ကျင့်ခန်းကို အကြိမ် ၃၀ ပြုလုပ်ပြီး ဘယ်ဘက်သို့ ပြောင်းလုပ်ပေးရပါမယ်။ ဒီလေ့ကျင့်ခန်းပြုလုပ်ပေးရင် ပေါင်အပြင်ပိုင်းကြွက်သားတွေ သန်မာစေမှာဖြစ်ပါတယ်။
– ပေါင်အတွင်းပိုင်း လေ့ကျင့်ခြင်း
ခန္ဓာကိုယ်ကို ညာဖက်သို့စောင်းပြီး ဘေးတိုက်လှဲပြီးနေရပါမယ်။ ဦးခေါင်းကို လက်နဲ့ထောက်ထားပါ။ ခြေထောက်တွေကို ဆန့်ထားပါ။ ဘယ်ဘက်ခြေထောက်ကိုကွေးပြီး ခန္ဓာကိုယ်အရှေ့ဘက်မှာထောက်ထားပါ။ လက်တစ်ဖက်နဲ့ ယင်းခြေထောက်ကို ဆွဲထိန်းထားပြီး ကျန်ခြေတစ်ဖက်ကို အပေါ်မြှောက်လိုက်၊ ပြန်ချလိုက်ပြုလုပ်ပေးရပါမယ်။ ဖြည်းဖြည်းမှန်မှန်မြှင့်လိုက်၊ ချလိုက်ပြုလုပ်ပေးပါ။ အကြိမ် ၃၀ပြုလုပ်ပြီး တစ်ဖက်ပြောင်းကာ ပြုလုပ်ပေးပါ။
– အလေးဖြင့် လေ့ကျင့်ခြင်း
မတ်တပ်ရပ် အနေအထားနေပေးရပါမယ်။ ခြေနှစ်ဖက်ကိုစုထားပြီး လက်နှစ်ဖက်နဲ့ အလေးတုံး တစ်တုံးစီကိုင်ကာ ဘေးကပ်ထားပါ။ ဦးစွာ ဘယ်ခြေထောက်ကို နောက်သို့ထုတ်လိုက်ပြီး ညာခြေကို ဒူးကွေးပြီး ရှေ့သို့ ထုတ်လိုက်ပါ။ အသက်ကိုပြင်းပြင်းရှူပြီး ဘယ်ခြေကို ရှေ့သို့ထုတ်ပြီး ညာခြေကို နောက်သို့ပြန်ပို့လိုက်ပါ။ ဒီနည်းအတိုင်း ဘယ်ညာအကြိမ် ၃၀ ပြောင်းပေးရမှာဖြစ်ပါတယ်။ အလေးတုံးမရှိရင် ရေအပြည့်ထည့်ထားတဲ့ ၁ လီတာရေသန့်ဘူးနဲ့ ပြုလုပ်ပေးနိုင်ပါတယ်။
– အလေးဖြင့် လက်လွှဲခြင်း
မတ်တပ်ရပ်အနေအထားနေပါ။ ဘယ်ဘက်လက်မှာ အလေးတုံးကိုင်ပြီး ညာဘက်ကို ခါးထောက်ထားပါ။ ညာခြေထောက်ကို ဘေးသို့ကားလိုက်ပြီး ခါးကိုအရှေ့သို့ကိုင်းလိုက်ပါ။ ကျောကို ဖြောင့်ဖြောင့်ထားထားဖို့ လိုပါတယ်။ ဘယ်ဘက်လက်နဲ့ ညာခြေထောက် ခြေကျင်းဝတ်ကိုထိလိုက်ပါ။ အဲဒီနောက် ပြန်မတ်လိုက်ပါ။ ဒီလေ့ကျင့်ခန်းကို အကြိမ် ၃၀ ပြုလုပ်ပြီး လက်တစ်ဖက်ပြောင်းလုပ်ပေးပါ။
– မှောက်လျက် ခြေထောက်မြှောက်ခြင်း
လက်ထောက်ပြီး မှောက်လျက် အနေအထားနေရပါမယ်။ ဘယ်ခြေထောက်ကိုဒူးထောက်ထားပြီး ညာခြေထောက်ကို ဆန့်ထားပေးပါ။ ညာခြေထောက်ကို ဆန့်လျက်အနေအထားအတိုင်း အပေါ်ဖက်သို့ မြှောက်ပေးလိုက်ပါ။ အဲဒီနောက် ဖြည်းဖြည်းချင်းပြန်ချပေးပါ။ ဒီလေ့ကျင့်ခန်းကို အကြိမ် ၃၀ ပြုလုပ်ပေးပြီး ခြေထောက်တစ်ဖက် ပြောင်းလုပ်ပေးရမှာဖြစ်ပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
