၊ မိုးမင်းထွန်း ၊ (Ref; BBC)
နေ့စဉ် ၁နာရီကြာ ကိုယ်လက်လှုပ်ရှားတာကအထိုင်များတဲ့ အလုပ်ကြောင့် စောစော အသက်ဆုံးရှုံးနိုင်တဲ့ အန္တရာယ်မှ ကာကွယ်ပေးနိုင်တယ်လို့သိပ္ပံ ပညာရှင်တွေက အကြံပြုလိုက်ပါတယ်။သုတေသီတွေက လူတစ်သန်းကျော်ရဲ့ အချက်အလက်တွေကို ဝေဖန်ဆန်းစစ်ခဲ့ကြတာပါ။တီဗီကြည့်တာက တီဗီကြည့်ရင်း သရေစာစားတာနဲ့ဆက်စပ်နေတာကြောင့် အထိုင်များတာထက်ပိုမိုအန္တရာယ်ပေးနိုင်ကြောင်းလည်းသိရပါတယ်။
လှုပ်ရှားမှုနည်းတာက နှလုံးရောဂါ၊ ဆီးချိုရောဂါနဲ့ ကင်ဆာရောဂါတချို့ကို ဖြစ်စေနိုင်ပါတယ်။ ဆေးလိပ်သောက်တာကြောင့် တစ်နှစ် သေဆုံးတဲ့ လူ ၅ ဒသမ၁ သန်းနဲ့ နှိုင်းယှဉ်ရင် အထိုင်များတာနဲ့ ဆက်စပ်တဲ့ သေဆုံးမှုက ၅ ဒသမ ၃ သန်းတောင်ရှိနေပါတယ်။သုတေသီတွေက တစ်နေ့ ၅မိနစ်အောက်ကိုယ်လက်လှုပ်ရှားတဲ့ အဖွဲ့နဲ့ တစ်နေ့ မိနစ် ၆၀ ကနေ ၇၅မိနစ်အထိ လှုပ်ရှားတဲ့အဖွဲ့ဆိုပြီး ခွဲခြားလိုက်ပါတယ်။ နောက်ထပ်၂နှစ်နဲ့ ၁၄နှစ်အကြားမှာ လူဘယ်လောက် သေဆုံးသွားသလဲဆိုတာ စူးစမ်းခဲ့ကြပါတယ်။
တစ်နေ့ ၈နာရီထိုင်အလုပ်လုပ်ရပေမယ့်ကိုယ်လက်လှုပ်ရှားမှုရှိသူတွေက တစ်နေ့နာရီနည်းနည်းသာထိုင်ရပြီး ကိုယ်လက်လှုပ်ရှားမှုမရှိသူတွေထက် အရွယ်မတိုင်ခင် သေဆုံးမှုနှုန်း လျော့နည်းတာတွေ့ရှိရပါတယ်။ အချိန်ကြာကြာထိုင်ရပြီး ကိုယ်လက်လှုပ်ရှားမှုမရှိသူတွေက အန္တရာယ်အရှိဆုံးဆိုတာကိုလည်း တွေ့ခဲ့ရပါတယ်။ဒီနေ့ခေတ်အလုပ်တွေက အချိန်အများကြီးထိုင်ရ တာများပါတယ်။
တစ်နေ့တစ်နာရီကြာ လေ့ကျင့်ခန်းလုပ်တာက လူတိုင်းအတွက် အကောင်းဆုံးပဲလို့ ဦးဆောင်သုတေသီ ကိန်းဘရစ်ချ်တက္ကသိုလ်ပါမောက္ခအာဖ့်အက်ကီလွန်းက ပြောပါတယ။် အထိုင်များသူတွေအနေနဲ့ နေ့လည်စာ စားချိန်လမ်းလျှောက်တာ၊ တစ်နာရီထိုင်ပြီးတိုင်း ၅မိနစ်လမ်းလျှောက်တာ၊မနက်စောစောပြေးတာနဲ့ အလုပ်သို့စက်ဘီးစီးသွားတာတို့လို ကိုယ်လက်လှုပ်ရှားမှုတွေကို နေ့စဉ်လုပ်သင့်ကြောင်း သုတေသီတွေက တိုက်တွန်းပါတယ်။
