၊ ကိုထက် ၊
လက်ကိုင်ဖုန်းကိုင်ဆောင်သူတွေဟာ သူတို့ရဲ့ဖုန်းလေးတွေကို အမြင်ဆန်းသစ်စေဖို့၊ အကြမ်းခံစေဖို့ စတဲ့ ရည်ရွယ်ချက်အမျိုးမျိုးနဲ့ ဖုန်းကာဗာတွေ တပ်လေ့ရှိကြပါတယ်။ အထူးသဖြင့် မိန်းကလေးအများစုဟာ သူတို့ဖုန်းလေးတွေကို အလှဆင်တဲ့အနေနဲ့ ဖုန်းကာဗာမျိုးစုံကို ဝယ်ယူအသုံးပြုလေ့ရှိကြပါတယ်။ ရွေးချယ်စရာပုံစံမျိုးစုံရှိတဲ့အထဲကနေ မိမိစိတ်တိုင်းကျကာဗာပုံစံတွေကို ရွေးချယ်ထားတာဖြစ်တဲ့အတွက် သင်ရွေးချယ်ထားတဲ့ ဖုန်းကာဗာအမျိုးအစားဒီဇိုင်းက သင့်စိတ်နေစိတ်ထားကို တစ်စိတ်တစ်ပိုင်း ဖော်ပြနေပါတယ်။
– သင်က ရိုးရိုးရှင်းရှင်းနဲ့ အကြမ်းခံတဲ့ ဖုန်းကာဗာကို သဘောကျရင် ဖော်ဖော်ရွေရွေနေတတ်သူပါ
အနုအရွအလှအပလေးတွေက ဖုန်းရဲ့လုပ်ငန်းဆောင်တာတွေအတွက် အရေးမကြီးပါဘူး၊ ဖုန်းကို ပိုပြီးကြံ့ခိုင်နေဖို့က ပိုအရေးကြီးတယ်လို့တွေးပြီး အကြမ်းခံတဲ့ ဖုန်းကာဗာရွေးတတ်သူတွေက အေးအေးဆေးဆေးနေတတ်သူပါ။ ပေါင်းသင်းဆက်ဆံရေးကောင်းပြီး စဉ်းစားတွေးခေါ်တတ်သူတွေလည်း ဖြစ်ပါတယ်။ လူအများရဲ့ ယုံကြည်အားကိုးခြင်းကိုလည်း ခံရသူဖြစ်ပြီး အရှိကိုအရှိအတိုင်းပြောတတ်၊ လုပ်တတ်သူတွေပါ။ ဇွဲလုံ့လ ရှိသူတွေဖြစ်ပြီး အလုပ်ကြိုးစားသူတွေ ဖြစ်ကြပါတယ်။
– သင်က ပြောင်ပြောင်လက်လက်ဖုန်းကာဗာတွေကို သဘောကျရင် အလိုက်အထိုက် ပေါင်းသင်းတတ်သူပါ
ရောင်စုံ ကျောက်လေးတွေ၊ စတစ်ကာလေးတွေနဲ့ ပြောင်ပြောင်လက်လက် ဖုန်းကာဗာ ဒီဇိုင်းတွေကို သဘောကျတဲ့သူတွေဟာ စိတ်ခံစားချက်ကို ဦးစားပေးသူတွေဖြစ်ကြပါတယ်။ မိမိနဲ့ စရိုက်မတူတဲ့ သူတွေနဲ့လည်း ဟန်ဆောင်ပေါင်းသင်းနိုင်စွမ်းရှိကြပါတယ်။ သူများတွေနဲ့ မတူဘဲ ကွဲပြားတဲ့နေထိုင်ပုံ စရိုက်တွေ ရှိတတ်ကြပါတယ်။ လွယ်လွယ်နဲ့ အရှုံးမပေးတတ်ဘဲ ခရီးသွားရတာ၊ စွန့်စားရတာတွေကို သဘောကျလေ့ရှိကြပါတယ်။
– သင်က တိရစ္ဆာန်ပုံလေးတွေပါတဲ့ ဖုန်းကာဗာကို သဘောကျရင် စိတ်ဓာတ်ကြံ့ခိုင်သူပါ
ဖုန်းကာဗာလေးမှာ ကျားသစ်ကွက်တွေ၊ မြင်းကျားအကွက်တွေ ဒါမှမဟုတ် ပန်ဒါဝက်ဝံပုံစံလေးတွေ၊ ကြောင်ပုံလေးတွေပါတာကို သဘောကျနှစ်သက်သူတွေဟာ ပွင့်ပွင့်လင်းလင်း၊ လွတ်လွတ်လပ်လပ် ပြောဆိုတတ်သူတွေဖြစ်ကြပါတယ်။ ချက်ချင်း ဆုံးဖြတ်ချက်ချနိုင်စွမ်းလည်း ကောင်းကြပါတယ်။ ပေါင်းသင်း ဆက်ဆံရေးကောင်းပေမယ့် ခေါင်းမာတတ်ကြပါတယ်။ အခက်အခဲတွေ ရင်ဆိုင်ရတာကို သဘောကျပြီး စွန့်စားလိုစိတ်ရှိသူတွေ ဖြစ်ပါတယ်။
– သင်က အရောင်စုံနဲ့ ဒီဇိုင်းဆန်းတဲ့ ဖုန်းကာဗာကို သဘောကျရင် ဆန်းသစ်တဲ့ အတွေးအခေါ်ရှိသူပါ
သူများတွေအတွက် မျက်စိနောက်စေမယ့် ဒီဇိုင်းရှုပ်ရှုပ်တွေကိုမှ သဘောကျတယ်ဆိုသူတွေက တမူထူးခြားဆန်းသစ်တဲ့အတွေးရှိသူတွေဆိုတာ သေချာပါတယ်၊ ပေါ့ပေါ့ပါးပါးနေတတ်ပြီး ခေတ်မီစတိုင် ကျတာကို သဘောကျသူတွေပါ။ မိမိကိုယ်ကိုယ် ယုံကြည်မှုရှိပြီး စိတ်ခံစားချက်တွေကို မျိုသိပ်ထားလေ့မရှိဘဲ သူများကို မျှဝေခံစားတတ်ကြပါတယ်။ လူချစ်လူခင်ပေါများပြီး သူများတွေရဲ့ အခက်အခဲတွေကိုလည်း ဝင်ရောက်ဖြေရှင်းပေးတတ်သူတွေပါ။
– သင်က ကာတွန်းရုပ်ပါတဲ့ ဖုန်းကာဗာကို သဘောကျရင် သနားကြင်နာတတ်သူပါ
ဖုန်းကာဗာပေါ်မှာ ကာတွန်းရုပ်ပုံလေးတွေပါတာကို သဘောကျနှစ်သက်သူတွေဟာ အပူအပင်ကင်းကင်း နေတတ်သူတွေဖြစ်ကြပါတယ်။ စိတ်သဘောထားကောင်းကြပြီး ကြင်နာတတ်သူတွေဖြစ်ပါတယ်။ သီချင်းနားထောင်ရတာနဲ့ ခရီးသွားရတာကို အလွန်သဘောကျတတ်ကြပါတယ်။ စောင့်ကြည့်လေ့လာပြီးမှ ဆုံးဖြတ်ချက်ချတတ်သူတွေလည်း ဖြစ်ကြပါတယ်။ ခင်မင်စရာကောင်းပြီး သူငယ်ချင်းတွေကိုလည်း ချစ်ခင်သူတွေပါ။
– သင်က အပွင့်အခက်လေးပါတဲ့ ဖုန်းကာဗာကို သဘောကျရင် အကောင်းမြင်တတ်သူပါ
အပွင့်တွေ၊ အခက်တွေပါတဲ့ ဖုန်းကာဗာကို သဘောကျတဲ့သူတွေဟာ ဘယ်အရာကိုမဆို အကောင်း မြင်စိတ်နဲ့သာ ကြည့်တတ်သူတွေဖြစ်ကြပါတယ်။ ပွင့်လင်းတဲ့စရိုက်နဲ့ ပျော်ပျော်နေတတ်တဲ့အတွက် လူတိုင်းရဲ့ ခင်မင်မှုကို ရထားသူတွေဖြစ်ကြပါတယ်။ ခရီးသွားရတာကို ဝါသနာပါပြီး အမြဲလိုလို ရွှင်လန်းတက်ကြွစွာ နေတတ်သူပါ။ စိတ်ကူးယဉ်ဆန်တတ်ပြီး မိသားစုနဲ့ အပေါင်းအသင်းတွေအပေါ် သံယောဇဉ်ကြီးသူ တွေဖြစ်ကြပါတယ်။
