ကိုထက်
တစ်နေကုန်ထိုင်နေရတဲ့ သူတွေအတွက် ရုံးခန်းထဲမှာပဲ လေ့ကျင့်နိုင်မယ့် လေ့ကျင့်ခန်းတွေကို ဖော်ပြလိုက်ပါတယ်။
ဝမ်းဗိုက်ကြွက်သားများအတွက် လေ့ကျင့်ခန်း
လိုအပ်တာကတော့ ခြေထောက်ခိုင်တဲ့ စားပွဲတစ်လုံးပဲဖြစ်ပါတယ်။ ပုံမှာပြထားတဲ့အတိုင်း ထိုင်ခုံပေါ်မှာ ထိုင်ပြီး လက်တွေကိုစားပွဲပေါ်တင်ထားပါ။ အဲဒီနောက် လက်မောင်းနဲ့ ဝမ်းဗိုက်ကြွက်သားတွေကို အားပြုပြီး ခြေထောက်ကို ကြမ်းပြင်နဲ့ကွာသွားတဲ့အထိ မတင်လိုက်ပါ။ အဲဒီ့နောက် ဖြည်းဖြည်းချင်း ထိုင်ခုံပေါ်ကို ပြန်ထိုင်လိုက်ပါ။ ဒီလေ့ကျင့်ခန်းကို ထပ်ခါထပ်ခါ လုပ်ပေးရင် ဝမ်းဗိုက်ကြွက်သားတွေအပြင် လက်မောင်းနဲ့ခြေထောက် ကြွက်သားတွေကိုပါ သန်မာစေနိုင်ပါတယ်။
ခြေထောက်ကြွက်သားများအတွက် လေ့ကျင့်ခန်း
ဦးစွာ ထိုင်ခုံပေါ်မှာ ထိုင်ပြီး လက်ပိုက်တဲ့အနေအထားနဲ့ နောက်ကို မှီပြီးထိုင်လိုက်ပါ။ အဲဒီနောက် ခြေထောက်တွေကို ရှေ့သို့ဆန့်ထုတ်တာ မဟုတ်ဘဲ ပေါင်ကြွက်သားတွေကို အားပြုပြီး အပေါ်သို့ မြှင့်တင်လိုက်ပါ။ အဲဒီအနေအထားအတိုင်း ကြာနိုင်သမျှ ကြာကြာနေပြီးမှ ပြန်ချပေးပါ။ ဒီလေ့ကျင့်ခန်းကို ပြုလုပ်ပေးခြင်းဖြင့် ခြေထောက်ကြွက်သားတွေကို သန်မာစေနိုင်ပါတယ်။
ရင်ဘတ်ကြွက်သားများအတွက် လေ့ကျင့်ခန်း
ခုံပေါ်မှာ ခါးကိုမတ်မတ်အနေအထားထိုင်ပါ။ ခြေထောက်တွေကို ကြမ်းပေါ်မှာ သေသေချာချာ ထိချထားပါ။ လက်ဖဝါးနှစ်ဖက်ကို လက်အုပ်ချီနေတဲ့ အနေအထားအတိုင်း အားနဲ့ ပူးနိုင်သမျှပူးထားပါ။ ၁၅ စက္ကန့် ခန့်ပြုလုပ်ပြီး ခဏပြန်နားပါ။ မကြာခဏ ပြန်ပြန်လုပ်ပေး ခြင်းဖြင့် ရင်ဘတ်ကြွက်သားတွေကို သန်မာစေနိုင်ပါတယ်။
ဒူးဆစ်များအတွက် လေ့ကျင့်ခန်း
ထိုင်ပြီး အလုပ်လုပ်နေရင်းနဲ့ အနည်းငယ် ကိုယ်ကိုကြွလိုက်ပါ။ မတ်တပ်မရပ်လိုက်ပါနဲ့။ ဒူးကို ကွေးထားပြီး ထိုင်ခုံကနေ ကိုယ်ကိုသာ အနည်းငယ် ထလိုက်ပါ။ အကောင်းဆုံး အနေအထားကတော့ ဒူးကို ၉၀ ဒီဂရီကွေးထားပါ။ ထိုင်တဲ့ အချိန်ကြာသွားတိုင်း မကြာခဏလုပ်ပေးပါ။
လက်မောင်းနှင့် ကျောရိုးများအတွက် လေ့ကျင့်ခန်း
ပုံမှာပြထားတဲ့အတိုင်း ထိုင်ခုံပေါ်မှာ ထိုင်မနေဘဲ လက်နဲ့ပဲထောက်ပြီး အားပြုထားပါ။ ဦးစွာ တံတောင်ဆစ်တွေကို ကွေးချပြီး လက်မောင်းနဲ့ကြမ်းပြင် တစ်တန်းတည်းဖြစ်သွားတဲ့အထိ ကိုယ်ကို ဖြည်းဖြည်းချင်း နှိမ့်ချပေးပါ။ ခြေထောက်တွေကို ထောက်မထားပါနဲ့။ အဲဒီနောက် လက်ကိုဆန့်ပြီး ကိုယ်ကို ပြန်မတင်လိုက်ပါ။
