———၊ စူး (ဆေးဝါးတက္ကသိုလ်) ၊———
တစ်နေ့လုံး လုပ်ငန်းခွင်မှာ အလုပ်လုပ်ရသူတွေဟာ နေ့ခင်းအချိန်ရောက်လာရင် ပင်ပန်းနွမ်းနယ်မှုကို ခံစားရတတ်ပါတယ်။ အဲဒီအချိန်မှာ ပင်ပန်းနွမ်းနယ်မှုတွေကင်းဝေးပြီး လန်းဆန်းလာစေဖို့ အောက်ပါနည်းလမ်းတွေကို လိုက်နာပေးသင့်ပါတယ်။
(၁) အပြင်ထွက်ပြီး နေ့ခင်းအလင်းရောင်နှင့် အချိန် ၁၀ မိနစ်ခန့် ထိတွေ့ပါ
နေ့လယ်စာကို အပြင်ထွက်ပြီးစားတာက ပိုကောင်းပါတယ်။ ဒါမှ ပြင်ပအလင်းရောင်နဲ့ ထိတွေ့မှုရှိမှာ ဖြစ်လို့ပါ။ နေ့ခင်းအလင်းရောင်နဲ့ ထိတွေ့မှုမရှိရင် ခန္ဓာကိုယ်က မယ်လတိုနင်ပမာဏ ထွက်ရှိနှုန်း များလာပြီး အိပ်ငိုက်စေနိုင်လို့ပါ။
(၂) စိတ်တက်ကြွမှုကို ပေးနိုင်သော ပရိုတင်းဓာတ်ကို ရွေးပါ
တူနာငါးသုပ်ကို စားပေးတာက တူနာငါးညှပ်ထားတဲ့ ဆင်းဒဝှစ်ချ်ကို စားတာထက် စွမ်းအင်ကို ပိုရရှိစေပါတယ်။ တူနာငါးနဲ့ ဟင်းသီးဟင်းရွက်တွေကို ရောသုပ်ပြီး စားတာက ပရိုတင်းဓာတ်နဲ့ ဗီတာမင်သတ္တုဓာတ်တွေကို ရရှိစေကာ တက်ကြွလန်းဆန်းစေပါတယ်။
(၃) လက်ဖက်ရည်သောက်ပါ
ညနေခင်းမှာ လက်ဖက်ရည်သောက်ပေးပါ။ လက်ဖက်စိမ်းလက်ဖက်ရည်လို ဆေးဖက်ဝင်လက်ဖက်ရည်ကို သောက်တာက ခုခံအားစနစ်ကို ကောင်းမွန်စေပါတယ်။
(၄) ဖုန်းခေါ်ပါ
သင့်ချစ်သူ ဒါမှမဟုတ် သင့်အိမ်ထောင်ဖက်၊ သင့်ကလေး၊ သင့်မိဘ စတဲ့ သင်ချစ်တဲ့သူတစ်ဦးထံကို ဖုန်းခေါ်ပြီး သတိရကြောင်းပြောပါ။ အချိန်ငါးမိနစ်လောက်ပေးပြီး ဒီလိုလုပ်ဆောင်တာက စိတ်တက်ကြွမှုကို ပေးစွမ်းနိုင်ပြီး အလုပ်ကို ဆက်လက်ပြီးမြောက်အောင် လုပ်နိုင်စွမ်းရှိစေပါတယ်။
(၅) စားပွဲကို ရှင်းသကဲ့သို့ အီးမေးကိုလည်း ရှင်းပါ
စားပွဲနဲ့ အီးမေးကို ရှင်းလင်းတာက အလုပ်လုပ်တဲ့အခါ စိတ်အနှောင့်အယှက်ဖြစ်နှုန်းနည်းပြီး စိတ်ကြည်လင်လန်းဆန်းစေပါတယ်။
(၆) လက်ထဲသို့ ပက်ပါးမင့်အဆီထည့်ပါ
လက်ထဲကို ပက်ပါးမင့်အဆီအနည်းငယ်ထည့်ပြီး မျက်နှာပေါ်(မျက်လုံးပေါ်မအုပ်ရပါ) အုပ်ပေးပါ။ ပက်ပါးမင့်ဟာ စွမ်းအင်ကောင်းစေတဲ့ ရနံ့ဖြစ်ပါတယ်။
(၇) အကြောဆန့်ပါ
ပခုံးတွေကို ရှေ့နောက်ဆွဲဆန့်ပေးရင်း အသက်ပြင်းပြင်း ရှူသွင်း/ ရှူထုတ်တာကို လုပ်ဆောင်ပေးပါ။ ပျင်းရိနေရင် နှစ်ကြိမ်လောက်လုပ်ပေးပါ။
(၈) အမည်းရောင်ချောကလက် မှီဝဲပါ
အမည်းရောင်ချောကလက်မှာ အင်တီအောက်ဆီးဒင့်၊ အမျှင်ဓာတ်နဲ့ မဂ္ဂနီစီယမ်တို့ များစွာပါဝင်နေပါတယ်။ ဒါပေမဲ့ တစ်ခါစားရင် လေးထောင့်ကွက်တစ်ကွက်ထက် ပိုမစားပါနဲ့။
(၉) အနံ့အရသာစူးသော ပီကေဝါးပါ
ပူရှိန်းအရသာရှိတဲ့ ပီကေကို ဝါးစားတာက ဦးနှောက်ကို တက်ကြွတဲ့ခံစားမှု ရရှိစေပါတယ်။ ပီကေဝါးတာကြောင့် တံတွေးအထွက်များကာ သွားပိုးပေါက်တွေ ဖြစ်စေနိုင်တဲ့ ဘက်တီးရီးယားပိုးတွေ ကင်းစေပါတယ်။
(၁၀) နေ့လယ်ခင်းမှာ အုပ်စုလိုက် ပူးပေါင်းလုပ်ဆောင်ပါ
သင့်အနေနဲ့ တစ်ယောက်တည်း အလုပ်လုပ်ရသူဖြစ်ရင်တောင် နေ့ခင်းပိုင်းမှာ အုပ်စုလိုက် ပူးပေါင်းဆွေးနွေးတာတို့၊ အစည်းအဝေးလုပ်တာတို့ လုပ်ပေးပါ။ တစ်ဦးနဲ့တစ်ဦး ထိတွေ့လုပ်ဆောင်မှုကြောင့် ကိုယ်လုပ်တဲ့အလုပ်မှာ ပိုပြီး ထိထိရောက်ရောက် လုပ်ဆောင်နိုင်ပါလိမ့်မယ်။
(၁၁) အခန်းထဲမှာ သစ်ပင်စိုက်ပါ
လုပ်ငန်းခွင်က သင့်နေရာတစ်ဝိုက်မှာ သစ်ပင်ထားရှိတာက စိတ်ခံစားမှုကို ကောင်းမွန်စေပါတယ်။ လေ့လာမှုအရ သစ်ပင်ထဲမှာ Rosemary ပင်က စိတ်ကို လန်းဆန်းစေတယ်လို့ ဆိုပါတယ်။