ကိုထက်
နေ့စဉ် အိပ်ချိန်လုံလောက်အောင် ပေးပေမယ့် နှစ်နှစ်ခြိုက်ခြိုက် အိပ်မပျော်တဲ့အခါမှာ အိပ်ရေးမဝတာမျိုး ဖြစ်တတ်ပါတယ်။ အိပ်ရေးမဝတဲ့အခါ အလုပ်ထဲ အာရုံမစိုက်နိုင်ခြင်း၊ ပေါ့ပါးဖျတ်လတ်မှုမရှိခြင်း စတာတွေအပြင် တစ်နေ့တာဖြတ်သန်းရတဲ့ အချိန်တွေက အလွန်ပင် ခက်ခဲနေပါတယ်။ စိတ်ဖိစီးမှုတွေ ဖြစ်လွယ်စေနိုင်သလို တစ်ကိုယ်လုံး ညောင်းညာနေပြီး ခန္ဓာကိုယ်သန်စွမ်းမှုလည်း ကျဆင်းလာစေနိုင်ပါတယ်။ ဒါကြောင့် တစ်ညလုံး နှစ်နှစ်ခြိုက်ခြိုက် အိပ်ပျော်စေဖို့ အိပ်ရာမဝင်ခင် ပြုလုပ်ပေးနိုင်တဲ့ အလွယ်လေ့ကျင့်ခန်းတချို့ကို ဖော်ပြပေးလိုက်ပါတယ်။
(၁) အကြောဖြေလျှော့ခြင်း
အိပ်ရာပေါ်မှာ ပက်လက်လှန်ရင်း လှဲလျောင်းနေပါ။ ခြေထောက်နဲ့ ဒူးကွေးပြီး ဒူးထောင်ထားတဲ့ပုံစံနေနေပါ။ အဲဒီနောက် အသက်ရှူသွင်းလိုက်ပြီး ဒူးနှစ်ဖက်ကို ဝမ်းဗိုက်ပေါ်သို့ကပ်လိုက်ပါ။ လက်နှစ်ဖက်နဲ့ ခြေထောက်တွေကို ဖက်လိုက်ပါ။ ပြီးနောက် အသက်ကို ရှူထုတ်လိုက်ပြီး မူလအနေအထားသို့ ပြန်နေလိုက်ပါ။ ဒီလေ့ကျင့်ခန်းကို ၁၀ ကြိမ် သို့မဟုတ် ၁ မိနစ်ခန့် ပြုလုပ်ပေးပါ။ အသက်ကို ဝဝရှူပြီး လေ့ကျင့်ခန်းကို ဖြည်းဖြည်းပြုလုပ်ပေးဖို့ လိုပါတယ်။ ဒီလေ့ကျင့်ခန်းကို ပြုလုပ်ခြင်းဖြင့် နောက်ကျောရှိ ကျောရိုး၊ ခါးနဲ့ ပေါင်ကြောတွေကို ပြေလျော့စေပြီး အိပ်မောကျလွယ်စေနိုင်ပါတယ်။ မနက်အိပ်ရာထချိန်မှာလည်း ပြုလုပ်ပေးနိုင်ပါတယ်။
(၂) ခြေထောက်ထောင်ပြီး အသက်ရှူခြင်း
အိပ်ရာရဲ့နံရံနဲ့ ကပ်နေတဲ့နေရာမှာ ခေါင်းအုံးကိုထားလိုက်ပါ။ အဲဒီခေါင်းအုံးပေါ်သို့ တင်ပါးကိုတင်ပြီး ခြေထောက်နှစ်ချောင်းကို နံရံပေါ်မှီတင်ပြီး ထောင်ထားလိုက်ပါ။ လက်နှစ်ဖက်ကို ဘေးတစ်ဖက်တစ်ချက်စီမှာ ထားပါ။ ရင်ဘတ်ကိုဖွင့်ထားပြီး အသက်ကို မှန်မှန်ရှူပေးရမှာ ဖြစ်ပါတယ်။ ဒီအနေအထားအတိုင်း ၁ မိနစ်၊ ၂ မိနစ်ခန့် နေပေးရမှာ ဖြစ်ပါတယ်။ ဒီလေ့ကျင့်ခန်းကို ပြုလုပ်ပေးခြင်းဖြင့် ခြေထောက်နဲ့ ကျောရိုးအောက်ပိုင်း နေရာတွေကို အညောင်းပြေစေပြီး အဆုတ်ထဲကို အောက်ဆီဂျင်ပိုပြီး ပြည့်ပြည့်ဝဝ ရောက်ရှိစေနိုင်တာကြောင့် နှစ်နှစ်ခြိုက်ခြိုက်အိပ်ပျော်အောင် အထောက်အကူ ပြုပေးပါတယ်။
(၃) ကျောရိုးြွကက်သား ဖြေလျှော့ခြင်း
ဒီလေ့ကျင့်ခြင်းက အဆင့် ၂ ဆင့် ပါဝင်ပါတယ်။ ပထမအဆင့်အနေနဲ့ အိပ်ရာပေါ်မှာ ပတ်လက်လှန်လျက် လှဲလျောင်းလိုက်ပါ။ မျက်နှာသတပ်ပဝါကိုလိပ်ပြီး ခါးနဲ့ လည်ပင်းအောက်မှာ ခံထားပေးရပါမယ်။ လက်နှစ်ဖက်ကိုလည်း ဘေးဘက်မှာ ဖြေလျှော့ချထားပြီး သက်သောင့်သက်သာ နေပေးပါ။ ဒီနေအထားအတိုင်း ခြေနှစ်ဖက်ကို ကားလိုက်၊ စုလိုက်လုပ်ပါ။ ဦးခေါင်းကိုလည်း ဘေးဘယ်ညာသို့ ဖြည်းဖြည်းလွှဲနေပေးပါ။ လည်ပင်းကို အတင်းအားမစိုက်ရပါဘူး။ ဒီနည်းအတိုင်း ၁ မိနစ်ခန့် ပြုလုပ်ပေးရမှာ ဖြစ်ပါတယ်။ ဒုတိယအဆင့်အနေနဲ့ အိပ်ရာပေါ်မှာ မှောက်လိုက်ပါ။ လက်နှစ်ဖက်ကို ဘေးသို့ကပ်ထားပြီး ခြေချောင်းတွေကို ဖြေလျှော့ထားရပါမယ်။ ပဝါလိပ် ဒါမှမဟုတ် ခေါင်းအုံးကို နဖူးအောက်မှာ ခံထားပါ။ အဲဒီ အနေအထားအတိုင်း ခြေထောက်နှစ်ဖက်ကို စုလိုက်၊ ကားလိုက်ပြုလုပ်ပေးရမှာ ဖြစ်ပါတယ်။ တစ်ကိုယ်လုံးကို ဖြေလျှော့ထားပြီး ၁ မိနစ်ခန့် ပြုလုပ်ပေးပါ။
(၄) အပြီးသတ် အညောင်းဖြေခြင်း
အိပ်ရာပေါ်မှာ လှဲလျက်အနေအထားအတိုင်းနေပါ။ လက်နှစ်ဖက်ကို ဘေးမှာချထားပြီး လက်ဖဝါးတွေကို အပေါ်ဖက်မှာ ထားပါ။ ခြေထောက်နှစ်ဖက်ကို အနည်းငယ်ချဲထားပါ။ ခေါင်းအုံးအစွန်းလေးပေါ်မှာ ခေါင်းကိုတင်ထားပါ။ တစ်ကိုယ်လုံးကို ဖြေလျှော့နေလိုက်ပါ။ စိတ်ထဲကနေ တစ်နေရာချင်းစီကို သတိထားပြီး ကြွက်သားတွေကို ဖြေလျှော့ပေးပါ။ ခြေချောင်းလေးများမှစပြီး နဖူးထိ တစ်ခုချင်းစီ တွေးတွေးပြီး အကြောတွေကို ဖြေလျှော့ပေးရမှာ ဖြစ်ပါတယ်။ ခန္ဓာကိုယ်ပေါ်ကို စူးစူးစိုက်စိုက်ကြီး အာရုံမထားဘဲ ပေါ့ပေါ့ပါးပါးလုပ်ဖို့ အရေးကြီးပါတယ်။ ဒီအတိုင်း ခြေချောင်းမှ နဖူးထိ အကြိမ် ၂၀ ခန့် အကြောဖြေလျှော့ပေးပါ။ အသက်ကို မှန်မှန်ပဲ ရှူနေပေးဖို့ လိုပါတယ်။
ဒီလေ့ကျင့်ခန်းကို ယောဂကစားသူတွေ နောက်ဆုံးလေ့ကျင့်ခန်းအနေနဲ့ ပြုလုပ်လေ့ရှိကြပါတယ်။ ဒီလေ့ကျင့်ခန်း ပြုလုပ်ပေးခြင်းက သင့်ကို မြန်မြန်နဲ့ အိပ်မောကျဖို့ များစွာအထောက်အကူပြုပေးမှာ ဖြစ်ပါတယ်။
