၊ ဇွန်ခိုင်ဦး ၊ (ဆေးဝါးတက္ကသိုလ်)
မယ်လမင်းအသုံးအဆောင်များ၊ မယ်လမင်းထမင်းဘူး၊ ဟင်းဘူးများထဲသို့ ထမင်းပူပူ၊ ဟင်းပူပူထည့်စားလျှင် ဓာတ်ပြုသွားတတ်ကြောင်း၊ ထိုသို့ဓာတ်ပြုခြင်းကြောင့် ရေရှည်တွင် ဆီးချိုရောဂါနှင့် ကင်ဆာရောဂါတို့ ဖြစ်လာနိုင်ကြောင်း အာဟာရဆိုင်ရာ အထူးကုဆရာဝန်ကြီး ဒေါက်တာဒေါ်ဝင်းဝင်းမြင့်က Healthy Life ဂျာနယ်သို့ ပြောကြားသည်။
“ မယ်လမင်းအသုံးအဆောင်တွေ၊ မယ်လမင်းထမင်းဘူး၊ ဟင်းဘူးတွေထဲ ထမင်းပူပူ၊ ဟင်းပူပူထည့်စားရင် ဓာတ်ပြုသွားပါတယ်။ အဲဒီလိုဓာတ်ပြုတာကြောင့် ရေရှည်မှာ ဆီးချိုရောဂါ ဖြစ်နိုင်ပါတယ်။ ကင်ဆာရောဂါ ဖြစ်နိုင်ပါတယ်။ ဒါကြောင့် အဓိကသုံးသင့်တာက ကြွေပန်းကန်၊ ဖန်ပန်းကန် စတာတွေဖြစ်ပါတယ်” ဟု ဒေါက်တာဒေါ်ဝင်းဝင်းမြင့်က ပြောသည်။
ယခင်က မယ်လမင်းအသုံးအဆောင်များကို လူအများသဘောကျ သုံးစွဲခဲ့သော်လည်း ရေရှည်မခံသဖြင့် အသုံးနည်းသွားကြောင်း အိမ်သုံးပစ္စည်းများရောင်းချသူ မသဉ္ဓာကပြောသည်။
“ အခုနောက်ပိုင်းမှာတော့ လူတွေက မယ်လမင်းနဲ့လုပ်ထားတဲ့ အသုံးအဆောင်တွေကို သိပ်မသုံးတော့ဘဲ ရေသောက်ရင်တောင် ဖန်ခွက်နဲ့ သောက်လာကြတာကို တွေ့ရပါတယ်၊ ထမင်းစားရင်လည်း ကြွေပန်းကန်နဲ့ စားလာကြပါတယ်” ဟု ဒေါက်တာဒေါ်ဝင်းဝင်းမြင့်က ဆိုသည်။
ပလတ်စတစ်ရေသန့်ဘူးများကို ကားထဲတွင်ထည့်ထားပြီး သောက်သုံးနေမှုများ ရှိနေသဖြင့်-
“ ဖြစ်နိုင်ရင်ရေသန့်ဘူးကို ဖန်နဲ့လုပ်ထားတဲ့ ပုလင်းတွေထဲထည့်သောက်တာက ပိုကောင်းပါတယ်။ အခုရရှိနေတဲ့ ရေသန့်ဘူးတွေက ပလတ်စတစ်နဲ့လုပ်ထားတဲ့အတွက် နေအပူဒဏ်ထိမိရင် ဓာတ်တုံ့ပြန်မှု (Reaction) တွေဖြစ်ပြီး ကျန်းမာရေးကို ထိခိုက်စေနိုင်ပါတယ်” ဟု ဒေါက်တာဒေါ်ဝင်းဝင်းမြင့်က ပြောသည်။
