—၊ ဒေါက်တာဒေါ်ဝင်းဝင်းမြင့် (အာဟာရဆိုင်ရာအထူးကု ဆရာဝန်ကြီး)မှ ဖြေကြားပေးပါသည်။ ၊—
Q. ကလေးတွေကို ဘယ်အရွယ်မှာ ဒိန်ချဉ် စတင်ကျွေးသင့်ပါသလဲ။
NuNu(FB)
A. ကလေးအသက်ရှစ်လပြည့်ပြီဆိုတာနဲ့ ကလေးကို ဒိန်ချဉ်စတိုက်လို့ ရပါပြီ။ ပြီးရင် နို့နဲ့နို့ထွက်ပစ္စည်းတွေကို စကျွေးနိုင်ပါပြီ။ ဘယ်လိုကျွေးမလဲဆိုတော့ ညနေသုံးနာရီ ရောက်ပြီဆိုတာနဲ့ ကလေးကို ဒိန်ချဉ်လေးတစ်ဇွန်း(ထမင်းစားဇွန်းတစ်ဇွန်း)ကျွေးရင် ရပါပြီ။ ဒိန်ချဉ်ကို တစ်ပတ်မှာသုံးရက် (ဥပမာ- တနင်္လာ၊ ဗုဒ္ဓဟူး၊ သောကြာစသဖြင့်) စတင်ကျွေးလို့ရပါပြီ။ ဒါ့အပြင် ချိစ်၊ ဒိန်ခဲလေးတွေကိုလည်း တစ်ပတ်မှာသုံးရက် (ဥပမာ-အင်္ဂါ၊ ကြာသာပတေး၊ စနေ စသဖြင့် ဒိန်ချဉ်ကျွေးတဲ့ရက်နဲ့မတူအောင်) စတင်ကျွေးဖို့ လိုပါတယ်။ ဒိန်ချဉ်ကို ဘာလို့ကျွေးရသလဲဆိုတော့ ဒိန်ချဉ်က ကလေးငယ်လေးတွေအတွက် အစာအိမ်အူလမ်းကြောင်းကို ကျန်းမာစေပါတယ်။ အစာအိမ်အူလမ်းကြောင်းမှာ ကောင်းတဲ့ပိုးတွေကို မွေးပေးလိုက်တဲ့အတွက် ကလေးငယ်တွေမှာ ဝမ်းသွားတာ၊ ဝမ်းလျှောတာ၊ ဝမ်းပျက်တာတွေကို ကာကွယ်ပါတယ်။ ဒါကြောင့် ကလေးအသက် ရှစ်လပြည့်ပြီဆိုတာနဲ့ ဒိန်ချဉ်ကို စတင်ကျွေးလို့ရပါပြီ။