မေး. အရေပြားယားယံတာက ရောဂါရှိလို့ပါလား သိချင်ပါတယ်ခင်ဗျ။
ဦးမြမောင်၊ တွံတေး။
ပါမောက္ခဒေါ်မြတ်စန္ဒာကျော် (အရေပြားအထူးကု ဆရာဝန်ကြီး)မှ ဖြေကြားပေးပါသည်။
ဖြေ. ယားတာက အရေပြားနဲ့ဆိုင်သလို တစ်ကိုယ်လုံးမှာရှိတဲ့ ရောဂါတွေနဲ့ဆိုင်ပါတယ်။ စိတ်ကြောင့် လည်းယားတတ်ပါတယ်။ ဒါကြောင့် အရေပြားယားတယ်ဆိုတဲ့ လူနာတွေလာရင် မေးမြန်းတဲ့ မေးခွန်းတွေကအရေကြီးပါတယ်။ ဘယ်နေရာက စယားသလဲ။ တစ်နေရာတည်း ယားတာလား၊ တစ်ကိုယ်လုံး ယားတာလား။ ဘယ်အချိန် ယားတတ်သလဲ။ ညယားတာက ဝဲဖြစ်တတ်ပါတယ်။ သံကောင်ရှိရင်လည်း ယားတတ်ပါတယ်။ ယားတာက ရာသီနဲ့လည်းဆိုင်တတ်ပါတယ်။ ဥပမာ-ဆောင်းမှာ ပိုယားရင် အရေပြားခြောက်သွေ့လို့ ဖြစ်တတ်တယ်။
ဘာအလုပ်လုပ်လဲ။ ဥပမာ- ဘိလပ်မြေကိုင်သူဆိုရင် ဘိလပ်မြေနဲ့မတည့်လို့ ယားတတ်ပါတယ်။ အိမ်မွေးတိရိစ္ဆာန်လေးတွေရှိရင် ဓာတ်မတည့်မှုဖြစ်လို့ အရေပြားယားတာမျိုး ဖြစ်တတ်ပါတယ်။ အသက်ကြီးသူတွေက အရေပြားခြောက်သွေ့တတ်တယ်။ ဒါကြောင့် အရေပြားထိန်းသိမ်းဖို့ လိုအပ်လှပါတယ်။ အခုနောက်ပိုင်း အရေပြားထိန်းပစ္စည်းတွေနဲ့ အလှပြင်ပစ္စည်းတွေက အသစ်တွေပေါ်တော့ စမ်းသုံးရင်း အရေပြားဓာတ်မတည့်ဖြစ်ပြီး ဆေးခန်းလာပြသူတွေလည်းများပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
