‘မိဘမဲ့ကလေးကျောင်းနဲ့ စစ်ဘေးရှောင်ပြည်သူတွေ အတွက် လှူဒါန်းဖို့ရှိပါတယ်’
– Miss Myanmar World 2016 ရပြီး နောက်ပိုင်း အခုလက်ရှိ ဘာတွေဆောင်ရွက်ဖြစ်နေပါသလဲ။
ညီမ အခုလက်ရှိမှာမဂ္ဂဇင်းကာဗာ၊ ဂျာနယ်ကာဗာတွေ ရိုက်ဖြစ်တာ များပါတယ်။
– နောက်ထပ်ပြိုင်ပွဲ ဝင်ဖို့အတွက်ကော ဘယ်လိုတွေပြင်ဆင်ထားပါသလဲ။
ပြင်ဆင်ထားရမှာကတော့ အများကြီးပါပဲ။ အခု လက်ရှိက ကျန်းမာရေးအတွက်ကော ခန္ဓာကိုယ်ကျစ်လျစ်လှပဖို့ အတွက်ပါ Gym စားနေပါတယ်။ မြန်မာ့သမိုင်းကြောင်း တွေကို လေ့လာနေပါတယ်။ အင်္ဂလိပ်ဘာသာစကားပိုင်းကို ပိုကျွမ်းအောင် လေ့လာနေပါတယ်။ Talent အတွက် သီချင်း ဆိုဖြစ်ဖို့ များပါတယ်။
– အခုချိန်ကတည်းက ကျန်းမာရေးအတွက် ဘယ်လိုတွေ ဂရုစိုက်ဖြစ်နေပါသလဲ။
ညီမ ခန္ဓာကိုယ်က ဝိတ်ချဖို့လိုအပ်ပေမယ့်လည်းအစား အသောက်ကို ပုံမှန်စားပါတယ်။ ပြိုင်ပွဲပြီးကတည်းကအလုပ်တွေက ဆက်တိုက်လုပ်ဖြစ်နေတော့ အဓိက မဖျားအောင် ဂရုစိုက်နေပါတယ်။
– အသားအရေလှပဖို့ ဘယ်လိုထိန်းသိမ်းဖြစ်ပါသလဲ။
ညီမက အသားအရေအတွက် ကြေးချွတ်တာမျိုးထက် သဘာဝနည်းနဲ့ ထိန်းသိမ်းရတာကို ပိုသဘောကျပါတယ်။ အဓိကကတော့ အသီးအနှံများများစားတယ် ရေများများ သောက်ပါတယ်။
– ပင်ပန်းလာတဲ့အခါ ဘယ်လို အနားယူ ဖြစ်ပါသလဲ။
အဓိက ညီမက ညပိုင်းဆို ဖုန်းသိပ်မသုံးဘူး၊ အွန်လိုင်း သုံးတာလျှော့တယ်၊ စောစောအိပ်တယ်၊ မနက် အိပ်ရာထရင်လည်း ကြက်ဥအစိမ်းကို ပျားရည်နဲ့ ရောသောက်တယ်။
– ပရဟိတနဲ့ပတ်သက်ပြီး ဘာတွေဆောင်ရွက်ဖို့ ရှိပါသလဲ။
Miss တစ်ယောက် ဖြစ်လာပြီဖြစ်တဲ့အတွက် ပရဟိတအလုပ်နဲ့ အမြဲဒွန်တွဲမှု ရှိနေရပါမယ်။ အဓိက ဆင်းရဲချို့တဲ့တဲ့ ကလေးငယ်တွေအတွက် ပရဟိတအလုပ်တွေ ဆောင်ရွက်သွားဖို့ရှိပါတယ်။
– ညီမအခု လက်ရှိ ဆုရတဲ့အထဲကနေပြီး လှူဒါန်းသွားဖို့ ရှိပါသလား။
ညီမဆုရတဲ့ထဲကနေ လှူဒါန်းဖို့ရှိပါတယ်။ မိဘမဲ့ကလေးကျောင်းနဲ့ စစ်ဘေးရှောင်ပြည်သူတွေအတွက် လှူဒါန်းဖို့ရှိပါတယ်။ တခြားနေရာတွေမှာလည်း ညီမတက်နိုင်တဲ့ ဘက်ကနေကိုယ်တိုင်သွားရောက် လှူဒါန်းဖို့လည်းရှိပါတယ်။
– ညီမ သွားပြိုင်ရမယ့် အကြောင်းလေးကို ပြောပြပေးပါဦး။
သွားပြိုင်ရမဲ့ နေရာကတော့ မသိသေးပါဘူး။ ဖိုင်နယ်က ဒီဇင်ဘာလထဲမှာဆိုတော့ ညီမတို့က နိုဝင်ဘာလထဲက သွားရမှာဖြစ်ပါတယ်။ နိုင်ငံပေါင်းတစ်ရာပြိုင်မှာဖြစ်ပါတယ်။
– နိုင်ငံနေရာ ဒေသအပြောင်းအလဲရှိတာကြောင့် ကိုယ်ရဲ့ ကျန်းမာရေးအတွက် ဘယ်လိုပြင်ဆင်နေပါသလဲ။
အဓိက ကိုယ်ဖြစ်လေ့ဖြစ်ထရှိတဲ့ ကျန်းမာရေးချူချာမှု နဲ့ ပတ်သက်တဲ့ ဆေးဝါးတွေ ယူဆောင်သွားဖို့ရှိပါတယ်။ ညီမက အအေးကြောက်တော့ သေချာဂရုစိုက်ရပါမယ်။ ပြီးတော့ အစားအသောက် အပြောင်းအလဲရှိတဲ့အတွက် သေချာ ဂရုစိုက်ဆင်ခြင်ရပါမယ်။
– ကိုယ့်ထက် စီနီယာကျတဲ့ Miss Myanmar World က အစ်မတွေဆီမှာ ပြိုင်ပွဲဝင်ဖို့အတွက် ဘယ်လိုအကြံယူဖြစ်ပါသလဲ။
ညီမကတော့ ကိုယ့်ထက်စီနီယာ ကျတဲ့အစ်မတွေဆီမှာ အကြံတောင်း ဖြစ်ပါတယ်။
– ပြိုင်ပွဲတွေ ဝင်ပြိုင်ဖို့အတွက် Miss တစ်ယောက်အနေနဲ့ ကိုယ့်ကိုယ်ကို ယုံကြည်မှုရှိအောင် ဘာတွေလိုအပ်ပါသလဲ။
အဓိကကတော့ အဘက်ဘက်က ပြည့်စုံဖို့လိုပါတယ်။ ခန္ဓာကိုယ်ထိန်းသိမ်းမှု၊ အဝတ်အစားနဲ့ ဘာသာစကားကျွမ်းကျင်မှု အပိုင်းတွေ လိုအပ်ပါတယ်။
– Miss Myanmar World 2016 ဖြစ်ပြီးတော့ ကောလာဟလတွေ၊ အတိုက်အခိုက်တွေကြောင့် စိတ်ညစ်ခဲ့ရလား။ အဲဒါတွေကို ဘယ်လို ဖြေရှင်းတုန့် ပြန်တတ်ပါသလဲ။
ကောလာဟလတွေကတော့ ညီမ ဖြေရှင်းစရာမလိုပါဘူး။ ပြိုင်ပွဲတစ်လျှောက် ညီမ ဘယ်လို ကြိုး စားခဲ့တယ်ဆိုတာ ညီမပရိသတ်တွေက အသိဆုံးပါ။ Facebook မှာလည်း ညီမကို အားပေးတဲ့ ပရိသတ်တွေ အများကြီးရှိပါတယ်။
– ညီမကို ချစ်တဲ့ အားပေးတဲ့ ပရိသတ်တွေအတွက် ကျန်းမာရေး အကြံပြုချက်လေးပြောပေးပါ။
ပရိသတ်အားလုံး ကျန်းမာကြပါစေ။ အခုလို မိုးရာသီမှာ အအေးမမိအောင်နဲ့ မဖျားနာအောင် ဂရုစိုက်ကြပါလို့ ပြောချင်ပါတယ်။ ပြီးတော့ ညီမကိုလည်း အားပေးကြပါလို့ ပြောချင်ပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
