———၊ ငွေကြယ်စင်ယံ ၊———
တချို ့အလုပ်တွေဟာ စိတ်ဓာတ်ကျနိုင်ဖို့ အလားအလာများနေပါတယ်။ အချိန်ပြည့် အလုပ်လုပ်ရသူတွေကို တစ်နှစ်တာလေ့လာခဲ့တဲ့ မှတ်တမ်းအရ စိတ်ဓာတ်ကျနိုင်ခြေအများဆုံး အလုပ်အကိုင် ၁၀ခုကို အောက်ပါအတိုင်း လေ့လာတွေ့ရှိခဲ့ရပါတယ်။
(၁) ဘိုးဘွားရိပ်သာ သို့မဟုတ် ကလေးပြုစုရေးဝန်ထမ်းများ
လူတွေကို ပြုစုစောင့်ရှောက်ရသူတွေရဲ ့ ၁၁ ရာခိုင်နှုန်းနီးပါးဟာ ဒီအလုပ်ကြောင့် အကြီးအကျယ် စိတ်ဓာတ်ကျနေပါတယ်။ သူတို့လုပ်ရတဲ့ အဓိက အလုပ်တွေက ပြုစုစောင့်ရှောက်နေရသူကို အစားအသောက်ကျွေးတာ၊ ရေချိုးပေးရတာနဲ့ ပြုစုပေးမှုကို အသိအမှတ်ပြုနိုင်၊ ကျေးဇူးမတင်နိုင်သူတွေကို စောင့်ရှောက်ရတဲ့အလုပ်ပါ။ အကြောင်းကတော့ သူတို့ပြုစုစောင့်ရှောက်ပေးရသူတွေဟာ အလွန်အမင်း နာမကျန်းဖြစ်နေတာကြောင့်နဲ့ အလွန်ငယ်ရွယ်သေးတာကြောင့်ပဲ ဖြစ်ပါတယ်။ ဖျားနေတဲ့သူတွေနဲ့ မသိနားမလည်သေးတဲ့ ကလေးငယ်တွေကို ပြုစုစောင့်ရှောက်ရတာဟာ ပြုစုပေးရသူအများစုအတွက် စိတ်ဖိစီးမှုဖြစ်စရာ ကောင်းနေတတ်ပါတယ်။
(၂) စားသောက်ဆိုင်က ဝန်ထမ်းများ
အဆင့်မြင့်အသက်မွေးဝမ်းကြောင်း အလုပ်မဟုတ်ပေမယ့် စားသုံးသူတွေအတွက် စားသောက်ဖွယ်ရာတွေကို ပြင်ဆင်ပေးနေရသူတွေဟာလည်း စိတ်ဓာတ်ကျနိုင်ခြေမှာ ဒုတိယအဆင့်လိုက်ပါတယ်။ ဒီအလုပ်လုပ်ရသူတွေရဲ ့ ၁၀ ရာခိုင်နှုန်းဟာ စိတ်ဓာတ်ကျဝေဒနာကို အဓိကခံစားရတတ်ပြီး သူတို့ထဲက အများစုဟာ အမျိုးသမီးတွေဖြစ်နေပါတယ်။ အကြောင်းကတော့ သူတို့အပေါ် ဆက်ဆံတဲ့ စားသုံးသူတွေ အများစုက ရိုင်းပျတတ်ကြပြီး တစ်ခါတလေ ကိုယ်ထိလက်ရောက်ကျူးလွန်တာမျိုးတောင် ရှိတတ်တဲ့အတွက် အားအင်ကုန်ခမ်းပြီး ပင်ပန်းနေချိန်မှာ အခြေအနေအရပ်ရပ်ကို သည်းခံနိုင်ဖို့ ခက်ခဲတတ်တာကြောင့် ဖြစ်ကြောင်း သူတို့က ဆိုပါတယ်။
(၃) လူမှုရေးလုပ်ငန်းလုပ်သူများ
ဘာကြောင့်များ လူမှုရေးလုပ်ငန်း လုပ်သူတွေက စိတ်ဓာတ်ကျနိုင်ခြေ အများဆုံးစာရင်းမှာ ထိပ်နားရောက်နေရတာလဲလို့ တွေးကောင်းတွေးချင်စရာပါ။ လူကုန်ကူးခံရတဲ့ ညှင်းပန်းနှိပ်စက်ခံရသူ ကလေးငယ်တွေ၊ အမျိုးသမီးတွေနဲ့ မိသားစုတွေနဲ့ ဆက်စပ်လုပ်ဆောင်နေရတာဟာ စိတ်ဖိစီးမှုများစေပါတယ်။ လူမှုရေးအလုပ်တွေ လုပ်တာက ကောင်းတဲ့အလုပ်လို့ ဆိုနိုင်ပေမယ့် စွန့်လွှတ်နိုင်ပြီး စိန်ခေါ်မှုကို လက်ခံနိုင်မှသာ လုပ်သင့်ကြောင်း လုပ်ကိုင်နေသူတွေက ဆိုပါတယ်။
(၄) ကျန်းမာရေးဝန်ထမ်းများ
ဆရာဝန်တွေ၊ သူနာပြုဆရာမတွေ စတဲ့ ကျန်းမာရေးဝန်ထမ်းတွေဟာ လူတွေရဲ ့ အသက်ရှင်သန်ရေးအတွက် နေ့ရောညပါ အချိန်နာရီတွေ အများကြီးပေးပြီး လုပ်ကိုင်နေရသူတွေပါ။ သူတို့အနေနဲ့ နေ့တိုင်းနေ့တိုင်း ဖျားနာခြင်း၊ ထိခိုက်ဒဏ်ရာရခြင်း၊ သေဆုံးခြင်းနဲ့ လူနာရှင် မိသားစုဝင်တွေနဲ့ တွေ့ဆုံရခြင်း စတဲ့ အလုပ်တွေအများကြီးကို လုပ်ကိုင်နေရတာကြောင့် စိတ်ဖိစီးမှုများရတဲ့ အလုပ်ထဲမှာ ပါဝင်နေတာဖြစ်ပါတယ်။
(၅) ပန်းချီဆရာ၊ ဖျော်ဖြေတင်ဆက်သူနှင့် စာရေးဆရာ
ဒီအလုပ်တွေဟာ ပုံမှန်မဟုတ်တဲ့ဝင်ငွေတွေ၊ မသေချာတဲ့ အချိန် နာရီတွေနဲ့ အထီးကျန်မှုတွေနဲ့ ဆက်စပ်နေတာကြောင့် ဒီလိုဖန်တီးနေရသူတွေရဲ ့ ၉ ရာခိုင်နှုန်းဟာ စိတ်ဓာတ်ကျမှုကို ခံစားနေရကြောင်း လေ့လာမှုအရ သိရပါတယ်။
(၆) ဆရာ၊ ဆရာမ
ဆရာ၊ ဆရာမတွေခံစားရတဲ့ စိတ်ဖိစီးမှုကလည်း မနည်းလှပါဘူး။ ဆရာ၊ ဆရာမအများစုဟာ ကျောင်းမှာစာသင်ပြီးလည်း အိမ်မှာ အလုပ်လုပ်ကြရပါတယ်။ ဆရာ၊ ဆရာမတွေအနေနဲ့ ကျောင်းသား၊ ကျောင်းသူတွေ၊ သူတို့ရဲ ့မိဘအုပ်ထိန်းသူတွေနဲ့ အဆင့်အတန်းမီအောင် ကြိုးစားနေရတဲ့ ကျောင်း စတဲ့ အကြောင်းပေါင်းစုံကြောင့် စိန်ခေါ်မှုအမျိုးမျိုးကို ရင်ဆိုင်နေရပါတယ်။
(၇) အုပ်ချုပ်ရေးဆိုင်ရာဝန်ထမ်း
လူများစွာ၊ အလုပ်များစွာကို အုပ်ချုပ်ရတဲ့သူတွေဟာလည်း အလုပ်ရဲ ့တောင်းဆိုချက်နဲ့ ယူရတဲ့တာဝန်တွေက များလွန်းတာကြောင့် စိတ်ဖိစီးမှု ဖြစ်ရတတ်ပါတယ်။
(၈) အခြေခံကျပန်းအလုပ်သမား
အခြေခံအလုပ်သမားတွေဟာ အချိန်အတိအကျမရှိဘဲ လုပ်ကိုင်ရသလို နေရာမရွေး၊ အလုပ်မရွေး လုပ်ကိုင်ရကာ ပင်ပန်းဆင်းရဲတဲ့ အလုပ်ကြမ်းတွေအတွက် လုပ်ခနည်းနည်းပဲရတတ်ပါတယ်။ အန္တရာယ်ရှိတဲ့ အဆောက်အဦပေါ် တက်ရတာလို၊ ညစ်ပတ်တဲ့ အမှိုက်သရိုက်တွေ ရှင်းရတာလို သူများမလုပ်ချင်တဲ့ အလုပ်တွေကို လုပ်ရတာကြောင့် စိတ်ဖိစီးမှုဖြစ်ရတာပါ။
(၉) ဘဏ္ဍာရေးအကြံပေးသူနှင့် စာရင်းကိုင်
ကိုယ့်ဝင်ငွေ၊ ထွက်ငွေစာရင်းကို လုပ်ရင်တောင် လက်ကျန်ငွေနဲ့ မကိုက်ရင် စိတ်ညစ်ရသေးတာ၊ သူများတွေရဲ့ ငွေပေါင်းများစွာကို တွက်ချက်ကိုင်တွယ်ရတာ ဘယ်လောက်အထိ စိတ်ဖိစီးမှုများမယ်ဆိုတာ တွေးမိရုံနဲ့တင် သိသာပါတယ်။
(၁၀) အရောင်းဝန်ထမ်းများ
အရောင်းဝန်ထမ်းတွေရဲ့ စိတ်ဓာတ်ကျနိုင်ခြေက အလုပ်အကိုင်တွေထဲမှာ နံပါတ် ၁၀ နေရာမှာ ရှိပါတယ်။ ဒီအလုပ်က ဝင်ငွေဘယ်လောက်ရမလဲ၊ ဝယ်သူဘယ်လောက်လာမလဲ. . မသေချာမရေရာဘဲ အရောင်းဆိုင်မှာတင် နာရီပေါင်းများစွာ စောင့်ဆိုင်းနေရတာကြောင့် စိတ်ဖိစီးမှု ဖြစ်စေပါတယ်။ ဝယ်သူတွေက ပစ္စည်းမျိုးစုံပြခိုင်းပြီး မဝယ်တဲ့အခါမှာလည်း စိတ်ဖိစီးရပြန်ပါသတဲ့။
