———၊ လရိပ်မေ ၊———
ဒီနေ့ခေတ်မှာ လူအများစုက အလုပ်စားပွဲနဲ့ ထိုင်ခုံမှာပဲ အချိန်ကြာကြာနေရလေ့ရှိပါတယ်။ အိမ်ပြန်ရောက်တော့လည်း တီဗီကြည့်တာ၊ ဖုန်းပွတ်တာတွေနဲ့ အချိန်ကုန်ပြန်ပါတယ်။ ဒီလိုမျိုး လှုပ်ရှားမှုမရှိဘဲ ကြာလာတဲ့အခါ ကျန်းမာရေးအပေါ် သက်ရောက်မှုရှိနိုင်တာကြောင့် ထိုင်ရင်းနဲ့ အလုပ်စားပွဲမှာပဲ ပြုလုပ်နိုင်မယ့် ယောဂကျင့်စဉ်တွေကို မျှဝေပေးလိုက်ပါတယ်။
လက်ကောက်ဝတ်နှင့် လက်ချောင်းဆွဲဆန့်သည့် ယောဂကျင့်စဉ်
(၁) ကုလားထိုင်ပေါ်မှာ မတ်မတ်ထိုင်ပါ။
(၂) လက်မောင်းတွေကို ရှေ့ဘက်သို့ ဆန့်တန်းထုတ်ထားပါ။
(၃) လက်ကောက်ဝတ်တွေကို အပေါ်အောက် စက်ဝိုင်းပုံစံ လှည့်လည်လှုပ်ရှားပေးပါ။
(၄) အဲဒီနောက် ထိုင်ခုံလက်ရမ်းပေါ် လက်တွေတင်ပြီး လက်ကောက်ဝတ် ဆွဲဆန့်လုပ်ပေးပါ။
လက်မောင်းမြှင့်သည့် ယောဂကျင့်စဉ်
(၁) ကျောမတ်ပြီး ထိုင်ခုံပေါ်ထိုင်ပါ။
(၂) အသက်ရှူသွင်းပြီး လက်မောင်းနှစ်ဖက်ကို ဘေးဆန့်တန်းရာက မျက်နှာကျက်ဆီ ဆန့်မြှင့်လိုက်ပါ။
(၃) ဘယ်ညာလက်ဖဝါးတွေကို ဦးခေါင်းပေါ်မှာ အတူတူထိကပ်ပေးပါ။
(၄) ပခုံးတွေကို ကျောဘက်ဆီ ပြန်လျှောလိုက်ပါ။
(၅) ဒီအနေအထားအတိုင်း အသက်ရှူသွင်း၊ ရှူထုတ် ၅ ကြိမ်လုပ်ပေးပါ။
ခန္ဓာကိုယ်ဆွဲဆန့် ယောဂကျင့်စဉ်
(၁) ကျောမတ်ပြီး ထိုင်ခုံပေါ်ထိုင်ပါ။
(၂) အသက်ရှူထုတ်ပြီး လက်မောင်းတွေကို ဦးခေါင်းပေါ်မြှင့်ကာ လက်နှစ်ဖက်ထိဆုံပြီး လက်ချောင်းတွေကို ဆွဲဆန့်လုပ်ပေးပါ။
(၃) အသက်ရှူသွင်းပြီး ခန္ဓာကိုယ်ကို ညာဘက်စောင်းကာ အသက်ပြင်းပြင်းရှူသွင်းပေးပါ။
(၄) မူလအနေအထား ပြန်နေပါ။
(၅) ဘယ်ဘက်ကို ထပ်မံလုပ်ပါ။
(၆) ၁၀ ကြိမ်ပြန်လုပ်ပါ။
ခန္ဓာကိုယ်စောင်းပေးသည့် ယောဂကျင့်စဉ်
(၁) ကျောမတ်ပြီး ထိုင်ခုံပေါ်ထိုင်ပါ၊ ခြေဖဝါးတွေကို ကြမ်းပြင်ပေါ်ချထားပါ။
(၂) အသက်ရှူသွင်းပြီး ပြန်ရှူထုတ်စဉ်မှာ ကိုယ်ကို ဘယ်လှည့်၊ ညာဘက်လှည့် လုပ်ပေးပါ။
(၃) လှည့်တဲ့အချိန်မှာ သေချာလှည့်နိုင်အောင် လက်ကိုအားပြုပါ။
(၄) အသက်ပြင်းပြင်းရှူသွင်းပြီး မူလအနေအထားကို ပြန်နေပါ။
(၅) ဆန့်ကျင်ဘက်အနေအထားနဲ့ ထပ်မံပြုလုပ်ပါ။
ထိုင်-ထယောဂကျင့်စဉ်
(၁) ထိုင်ခုံပေါ်ထိုင်ပြီး ဒူးတွေကို ၉၀ ဒီဂရီကွေးကာ ကြမ်းပြင်ပေါ်မှာ ခြေဖဝါးတွေကို အပြားလိုက်ချပေးပါ။
(၂) အသက်ရှူသွင်းပြီး လက်အားမသုံးဘဲ လက်နှစ်ဖက်ကို ရှေ့ဆန့်တန်းတဲ့ အနေအထားနဲ့ မတ်တပ်ရပ်လိုက်၊ ပြန်ထိုင်လိုက် လုပ်ပေးပါ။
(၃) အသက်ပြင်းပြင်းရှူသွင်းပါ။
(၄) ပြန်ထိုင်တဲ့အခါ ကျောကို ဖြောင့်မတ်အောင် ထားပေးရပါမယ်။
(၅) ၅-၁၀ ကြိမ် ထပ်မံလုပ်ပါ။