ငွေကြယ်စင်ယံ
အသက်ကြီးတယ်ဆိုတာ သတ်မှတ်ချက်တစ်ခုပါပဲ။ အသက် ကြီးလာတဲ့အခါ ခန္ဓာကိုယ် အစိတ်အပိုင်းတွေ ပြောင်းလဲသွားပါတယ်။ အဲဒီလို ပြောင်းလဲသွားတာတွေကို ကောင်းကောင်း ထိန်းညှိနိုင်ဖို့ သင့်ခန္ဓာကိုယ်ရဲ့ ကျန်းမာရေးနဲ့ နုပျိုမှုတို့ကို ထိန်းသိမ်းစောင့်ရှောက်နိုင်တဲ့ အလေ့အကျင့်ကောင်းတွေ လို အပ်နေပါတယ်
(၁) အကောင်းမြင်တတ်ခြင်း
အကောင်းမြင်တတ်တဲ့ စိတ်ရှိသူက ဘယ်လောက်ပဲ အသက် ကြီးလာပါစေ၊ နုပျိုနေမှာပါ။ လေ့လာမှုတစ်ခုအရ အသက်ကြီးတာကို ဉာဏ်ပညာကြီးမြင့်တယ်၊ ကျေနပ်စရာ ကောင်းတယ်လို့ ခံယူတတ်သူတွေက အသက်ကြီးတာက အသုံးမကျဘူး၊သူ တစ်ပါးကို မှီခိုနေရတယ်လို့ ထင်နေသူတွေထက် မသန် စွမ်းဖြစ်ခဲ့ရင်တောင် အမြန်ပြန်ကောင်းလာနိုင်တယ်လို့ သိရပါတယ်။
(၂) ကောင်းမွန်စွာ စားတတ်ခြင်း
ကျန်းမာရေးနဲ့အညီ စားသောက်တတ်တဲ့ အ ကျင့်ကို ငယ်ငယ်ကတည်းက ကျင့်ယူထားဖို့ လိုပါတယ်။ ခန္ဓာကိုယ်ကျန်းမာပြီး အာဟာရဓာတ်မျှတစေဖို့ ပန်းကန်ပြားထဲမှာ အစားအသောက် အစုံအလင်ရှိသင့်ပါတယ်။ လတ်ဆတ်တဲ့ သစ်သီးဝလံ၊ ဟင်းသီးဟင်းရွက်၊ ကောက်နှံတစ်ခုလုံးအစာနဲ့အဆီနည်း အသား စတာတွေကို နေ့စဉ် စားသင့်သလို အခွံမာသီး၊ အစေ့အဆန် စတာတွေကိုလည်း သရေစာအ ဖြစ် စားသင့်ပါတယ်။ ဒီလို စားတဲ့အပြင် ဆားလျှော့ စားတာကြောင့်နှလုံးရောဂါထခြင်း(Heart Attack)၊ လေဖြတ်တာနဲ့ အရွယ်မတိုင်ခင် အိုမင်းတာတို့မဖြစ်အောင် တွန်းလှန်ပေးပါတယ်။
အိုမီဂါ ၃ ဖက်တီးအက်ဆစ်ပါဝင်တဲ့ အစာစားတာကြောင့် အသားအရေကနေ မရှိမဖြစ်ဆီ ထွက်ရှိစေပြီး နုပျိုကြည့်ကောင်းစေပါတယ်။
ကာဗိုဟိုက်ဒရိတ်၊ သကြားနဲ့ အဆီအအိမ့်များများ စားတာ ကြောင့် အိုမင်းမှုဖြစ်စဉ်ကို မြင့်တက်စေနိုင်တဲ့အတွက် အသင့်အတင့်ပဲ စားပါ။
(၃) အသင့်အတင့်က သော့ချက်
ဘာပဲဖြစ်ဖြစ် သာမန်ထက်လွန်ကဲလာရင် ကျန်းမာရေးကို ထိ ခိုက်စေနိုင်ပါတယ်။ အစားအသောက်ကို အလွန်အကျွံ စားသောက်တာက ဘဝ သက်တမ်းတိုစေပြီး နှလုံးရောဂါနဲ့ အမျိုးအစား (၂) ဆီးချိုသွေးချိုတို့ကို ဖြစ်စေနိုင်ပါတယ်။ ကျန်းကျန်းမာမာ အိုမင်းပြီး အသက်ရှည်ရှည်နေရစေဖို့ နေ့စဉ် ဟင်းသီးဟင်းရွက် နှစ်ခွက်ခွဲ၊ သစ်သီး တစ်ခွက်ခွဲ- နှစ်ခွက်၊ ကောက်နှံစာ (ဥပမာ ဆန်လုံးညို၊ အညို ရောင်ခေါက်ဆွဲ)နှစ်ခွက်၊ နို့နဲ့နို့ထွက်ပစ္စည်း သုံးခွက်နဲ့ ပရိုတင်းပါတဲ့ အသားတစ်ခွက်တို့ကို စားပေးဖို့ လိုအပ်ပါတယ်။
(၄) လှုပ်ရှားမှုကို ပုံမှန် လုပ်ဆောင်ခြင်း
ကျက်သရေရှိရှိ အိုမင်းလာဖို့ရာအတွက် အခရာကျတဲ့ အရာက တက်တက်ကြွကြွ လှုပ်ရှားမှု လုပ်ဆောင်ဖို့ပဲ ဖြစ်ပါတယ်။ အသက်ကြီးလာတဲ့အခါ ကြွက်သားတွေဟာ ခပ်မြန်မြန် လျော့ရဲလာပါတယ်။ အဲဒီလို မဖြစ်အောင် အလေးလေ့ကျင့်ခန်းလုပ်တာက ကြွက်သားထုထည်နဲ့ သန်စွမ်းမှုကို တိုးစေပါတယ်။ တက်တက်ကြွကြွ ကိုယ်လက်လှုပ်ရှားမှု လုပ်တာကြောင့် အသက်ကြီးလို့ဖြစ်တဲ့ မှတ်ဉာဏ်ဆုံးရှုံး မှုဝေဒနာ မကျရောက်အောင် ကာကွယ်ပေးပြီး သင် ယူလေ့လာမှုနဲ့ ဆိုင်တဲ့ ဦးနှောက်အစိတ်အပိုင်း ဟစ်ပိုကမ်းပပ်စ်ကို သန်စွမ်းစေပါတယ်။
(၅) ကောင်းမွန်သော ပေါင်းသင်းဆက်ဆံရေးကို တည်ဆောက်ခြင်း
မိသားစုဝင်တွေ၊ ဆွေမျိုးသားချင်းတွေ၊ မိတ်ဆွေသူငယ်ချင်းတွေနဲ့ ကောင်းမွန်တဲ့ ပေါင်းသင်း ဆက်ဆံရေးကို ထိန်းထားနိုင်တာက အသက်ရှည်စေပါတယ်။ လေ့လာမှုအရ အပေါင်းအသင်းမိတ်ဆွေ များသူတွေဟာ မိတ်ဆွေမများသူတွေထက် အသက်ရှည်ရှည်နေရနိုင်ခြေ ၅၀ ရာခိုင်နှုန်း ပိုများတယ်လို့ သိရပါတယ်။
(၆) ခရမ်းလွန်ရောင်ခြည်အန္တရာယ် ကာကွယ်ခြင်း
နေဒဏ်ကို အလွန်အမင်း ခံရတာကြောင့် အရေးကြောင်းထင် ပြီး အရေပြားကင်ဆာ ဖြစ်စေနိုင်ပါတယ်။ ငယ်ငယ်ကတည်းက နေကာခရင်မ်လိမ်းတဲ့ အကျင့်ရှိတာကြောင့် အရေပြား အိုမင်းမှု ဖြစ်စဉ်ကို ကြန့်ကြာစေနိုင်ပါတယ်။ နေရောင်ခြည်ကြောင့် အရိုးတွေ သန်စွမ်းစေတဲ့ ဗီတာမင်ဒီကို ရရှိစေပါတယ်။ ဒါပေမဲ့ နံနက်ခင်း နေခြည်နုနုကိုပဲ ခံယူသင့်ပါတယ်။ ဗီတာမင်ဒီကို ကြက်ဥ/ဘဲဥနဲ့ ဆယ်လ်မွန်ငါးလို ငါးသေတ္တာငါး စားတာ ကြောင့် ရရှိနိုင်ပါတယ်။
(၇) အိပ်ရေးဝ၀ အိပ်စက်အနားယူခြင်း
အရွယ်ရောက်သူအများစုဟာ အိပ်ချိန်နောက်ကျတတ်သလို အိပ်ချိန်နည်းတတ်ပါတယ်။ အိပ်ရေးဝ၀အိပ်စက်အနားယူမှုမရှိရင် အဝလွန်ရောဂါ၊ နှလုံးရောဂါနဲ့ ဆီးချိုသွေးချိုရောဂါတို့ ဖြစ်စေနိုင်တယ်လို့ လေ့လာမှုအရ သိရပါတယ်။ အသက်ကြီးသူတွေအတွက် တစ်ရေးအိပ်စက်အနားယူတာက မှတ်ဉာဏ် ကောင်းစေပါတယ်။ အိပ်ရေးဝတာက အရေပြား ကျန်းမာရေးကောင်းစေပါတယ်။ အကြောင်းကတော့ အိပ်စက်စဉ်အတွင်း ခန္ဓာကိုယ်ကနေ ကြီးထွား ဟော်မုန်း ထွက်ရှိကာ အသားအရေ နုပျိုတင်းရင်းစေတဲ့ ကော်လာဂျင်နဲ့ အီလက်စတင် ပရိုတင်းတွေကို ပြန်လည် ထိန်းသိမ်းနိုင်တာကြောင့်ပါ။ ဒါ့အပြင်အိပ်ရေးပျက်တာကြောင့် ဦးနှောက်ကို မြန်မြန်အိုမင်းစေပြီး ဦးနှောက်ရဲ့ လုပ်ငန်းဆောင်တာတွေကို ထိခိုက်စေနိုင်ပါတယ်။
Ref: HD
