ဒေါက်တာဒေါ်ဝင်းဝင်းမြင့် (အာဟာရဆိုင်ရာ အထူးကု ဆရာဝန်ကြီး)
မြန်မာလူမျိုးအများစုဟာ နံနက်စာအနေနဲ့ မုန့်ဟင်းခါးကို နှစ်ခြိုက်စွာ စားသုံးလေ့ရှိကြပါတယ်။ မုန့်ဟင်းခါးက မြန်မာလူမျိုးတွေရဲ့ ရိုးရာအစားအစာတစ်မျိုးဆိုရင်လည်း မမှားပါဘူး။
– ဘယ်လို ကောင်းကျိုးရှိသလဲ
သန့်သန့်ရှင်းရှင်း ချက်ပြုတ်ထားတဲ့ မုန့်ဟင်းခါးက မြန်မာလူမျိုးတွေ စားသင့်တဲ့အစာထဲမှာ ပါဝင်ပါတယ်။ ငါးနဲ့ချက်ထားရင် ပရိုတင်းဓာတ်နဲ့ တခြားအာဟာရဓာတ်တွေ ပါဝင်ပါတယ်။
– ဘယ်လောက်ပမာဏ စားသင့်သလဲ
သွေးတွင်း ကိုလက်စထရောများတဲ့သူတွေနဲ့ ဆီးချိုရောဂါရှိသူတွေက မုန့်ဟင်းခါးကို ငါးဖယ်၊ ဘဲဥအကာ စတာတွေနဲ့ စားလို့ရပါတယ်။ ဒါပေမဲ့ အကြော်၊ အနှစ်ပါတဲ့ဘဲဥ စတာတွေထည့်ပြီး မစားသင့်ပါဘူး။
– ဘယ်သူတွေ မစားသင့်ဘူးလဲ
ဆီးချိုရောဂါရှိတဲ့သူတွေက မုန့်ဟင်းခါးကို စားလို့ရပါတယ်။ ငါးဖယ်ထည့်စားနိုင်ပါတယ်၊ ဒါပေမဲ့ အကြော်ထည့် မစားသင့်ပါဘူး။ မုန့်ဟင်းခါးချက်တဲ့အခါ အချိုမှုန့် ဒါမှမဟုတ် ကြက်သားမှုန့် ထည့်လိုက်ရင် အဲဒီအချိုမှုန့်၊ ကြက်သားမှုန့်တွေနဲ့ မတည့်တဲ့အတွက် အန်တာ၊ ခေါင်းကိုက်တာတို့ ဖြစ်တတ်ပါတယ်။ ဒါကြောင့် အချိုမှုန့်၊ ကြက်သားမှုန့်တွေနဲ့ မတည့်တဲ့သူတွေ၊ ဆီးချိုရောဂါရှိသူတွေနဲ့ သွေးတိုးရောဂါရှိသူတွေဆိုရင်တော့ အချိုမှုန့်နဲ့ ကြက်သားမှုန့်မပါတဲ့ မုန့်ဟင်းခါးကို ရွေးစားသင့်ပါတယ်။
– ကယ်လိုရီ ဘယ်လောက်ပါသလဲ
မုန့်ဟင်းခါးတစ်ပွဲမှာ ကယ်လိုရီ ၁၆၀ ရှိပါတယ်။ အကြော်တစ်ခု ထည့်လိုက်မယ်ဆိုရင် ကယ်လိုရီ ၇၀ ထပ်တိုးသွားမယ်၊ ဘဲဥတစ်ခြမ်း ထည့်လိုက်ရင် ကယ်လိုရီ ၆၀ ထပ်တိုးသွားမယ်၊ အဲဒီတော့ မုန့်ဟင်းခါးကို အကြော်နဲ့ ဘဲဥနဲ့ စားလိုက်မယ်ဆိုရင် ကယ်လိုရီ ၂၀ဝ ကျော် ရရှိသွားပါတယ်။