ပါမောက္ခဦးအေးမွန် (ခွဲစိတ်ဆရာဝန်ကြီး) မှ ဖြေကြားပေးပါသည်။
Q. ၀မ်းမှန်မှန်သွားအောင် မြန်မာဆေး၊ အင်္ဂလိပ်ဆေးတွေ သောက်တာ၊ ၀မ်းချူဘူးသုံးတာကရော ကြာရင် ဘာဖြစ်တတ်ပါသလဲ ဆရာ။
SS (FB)
A. မြန်မာဆေးတွေ၊ အင်္ဂလိပ်ဆေးတွေကို နှစ်နဲ့ချီပြီး စားလာတဲ့အခါ အူတွေက သူ့အလိုလို မညှစ်တော့ပါဘူး။ ၀မ်းသွားဖို့ ဆေးကိုပဲ မှီခိုတဲ့အနေအထား ဖြစ်သွားပါတယ်။ ၀မ်းချူတာကလည်း ဒီသဘောပါပဲ။ အသက်ကြီးသူတွေ ၀မ်းချူတာထက် အသက်ငယ်ငယ်ရွယ်ရွယ်အချိန်မှာ ၀မ်းချူတဲ့အကျင့်ဖြစ်သွားရင် ပုံမှန်အတိုင်း အူလှုပ်ရှားမှုမရှိတော့ဘဲ ၀မ်းချူမှပဲ ၀မ်းသွားသလို ဖြစ်သွားပါတယ်။ သဘာဝအတိုင်း ၀မ်းသွားတာကပဲ ကောင်းပါတယ်။ ဒီလို အကျင့်တွေရှိရင် အူကအလိုလို မညှစ်တော့တဲ့အတွက် ဒါတွေကို တစ်သက်လုံးမှီခိုရသလို ဖြစ်သွားတတ်ပါတယ်။ ၀မ်းမချုပ်အောင် လိုက်နာသင့်တဲ့ အချက်တွေကို အကြမ်းဖျင်းပြောရရင်တော့ ငယ်စဉ်ကတည်းက အချိန်မှန်မှန် ၀မ်းသွားပေးဖို့ လိုပါတယ်။ ရေများများသောက်ရမယ်၊ ဟင်းသီးဟင်းရွက်၊ အသီးအနှံများများ စားပေးရပါမယ်။ လေ့ကျင့်ခန်းလုပ်ရမယ်။ ပြီးရင် ၀မ်းသွားတာကို အာရုံစိုက်ပြီး ပုံမှန်သွားနိုင်အောင် ကျင့်ပေးရပါမယ်။
