Healthy Life Ad
Life Style

ဆေးဝါးမပါဘဲ လေးလကျော်အတွင်း ကိုယ်အလေးချိန် ပေါင် ၅၀ လျှော့ချနိုင်ခဲ့တဲ့ ဦးမြတ်သူ

– ဇွန်ခိုင်ဦး (ဆေးဝါးတက္ကသိုလ်)

မြတ်နိုးသူ ဆောက်လုပ်ရေးလုပ်ငန်း၏ မန်နေးဂျင်းဒါရိုက်တာဖြစ်သူ ၄၃နှစ်အရွယ် ဦးမြတ်သူသည် အ၀လွန်ခြင်းအတွက် ယခင်က ရေတိုဝိတ်လျှော့နည်းများကိုသုံးပြီး ၀ိတ်လျှော့ခဲ့ဖူးသူဖြစ်သည်။

“အရင်တုန်းက သုံးခေါက်လောက် ၀ိတ်လျှော့ဖူးပါတယ်။ ဒါပေမဲ့ ၀ိတ်ကျတာ မသိသာဘူး၊ စိတ်ကလည်း အရမ်းပင်ပန်းတယ်၊ ဘာဖြစ်လို့လဲဆိုတော့ အသီးတွေပဲစားပြီး ထမင်းလုံးဝ မစားနဲ့ဆိုတာမျိုး၊ လေ့ကျင့်ခန်း အပြင်းအထန်လုပ်ဆိုတာမျိုး ဆိုတော့ ခဏပဲလုပ်နိုင်တယ်၊ ရေရှည်မှာ ဘယ်လိုမှ မလုပ်နိုင်တော့ မအောင်မြင်ခဲ့ပါဘူး။ ၁၀ ရက်လောက်လည်း လုပ်ပြီးရော အစားဖြတ်တဲ့ဒဏ်ကို မခံနိုင်တော့ဘဲ စိတ်အလိုမကျတာတွေဖြစ်လာပါတယ်။ အဲဒီတော့ နောက်ပိုင်း ၀ိတ်လျှော့ရတာကို စိတ်ပျက်သွားတယ်။ ၀ိတ်ကျအောင် ဆေးတွေလည်းသောက်ဖူးတယ်။ ဒါပေမဲ့ အစားအသောက် မထိန်းတော့ ပြန်ဝတာပါပဲ” ဟု ဦးမြတ်သူက ပြောသည်။

လေးဖက်နာရောဂါကြောင့် အိပ်ရာထဲ ခြောက်လလောက် လှဲနေရသည်အထိ ဆိုးရွားစွာ ဝေဒနာခံစားခဲ့ရသော ဦးမြတ်သူသည် ထိုကာလအတွင်း ကိုယ်အလေးချိန်များစွာ မြင့်တက်လာခဲ့ရာ ၂၈၇ ပေါင်အထိ ဖြစ်သွားခဲ့သည်။ “ကိုယ်အလေးချိန် ဒီလောက်အထိ တက်ခဲ့ရတာက ကျန်းမာရေးအသိကို တိတိကျကျ မသိခဲ့လို့ပါ။ အဲဒီတော့ စားသောက်နေထိုင်မှုပုံစံက မှားနေခဲ့ပါတယ်။ အ၀လွန်တော့ ရောဂါတွေဖြစ်လိုက်၊ ဆေးခန်းပြလိုက် လည်နေခဲ့တာပါ။

အရင်က ဘယ်လို စားသောက်ခဲ့သလဲဆိုတော့ ထမင်းကတော့ နည်းနည်းပဲ စားပါတယ်၊ ဒါပေမဲ့ မြန်မြန်စားတယ်၊ အာလူးကြော်၊ ဟမ်ဘာဂါ၊ ပီဇာ စတဲ့ သရေစာတွေကို အရမ်းကြိုက်ပါတယ်။ အပြင်စာကလည်း အင်မတန်စားတယ်၊ အချဉ်၊ အခါးတွေကို လုံးဝမကြိုက်ဘူး။ အသားပဲ ဟင်းထင်တာ၊ အရွက်စိမ်းတွေဆို လုံးဝမကြိုက်ဘူး။ သရေစာကတော့ မျက်လုံးမှိတ်မှပဲ ပါးစပ်ပိတ်တော့တယ်။ ကျွန်တော်က ထမင်းကိုနည်းနည်းပဲ စားတော့ ‘ငါ ၀တာ ၀တယ်၊ နည်းနည်းပဲစားပြီး ၀နေတာဆိုတော့ မတတ်နိုင်ဘူး’လို့ ထင်ခဲ့တယ်။

ကိုယ်အလေးချိန် ၂၈၇ပေါင်အထိဖြစ်သွားတဲ့ အခါမှာ ကျန်းမာရေးကချူခြာလာပါတယ်၊ အသက် ရှူရတာလည်း မ၀တော့ဘူး၊ အဲဒါနဲ့ နှလုံးအထူးကု ဆရာဝန် ဒေါက်တာဦးသန်းထိုက်အောင်ဆီ သွားပြတော့ ကိုယ်အလေးချိန်လျှော့ဖို့ လိုတယ်ဆိုပြီး အာဟာရဆိုင်ရာ ဆရာဝန်ကြီး ဒေါက်တာဒေါ်ဝင်းဝင်းမြင့်နဲ့ မိတ်ဆက်ပေးခဲ့ပါတယ်။

အခုတစ်ခေါက်မှာတော့ စိတ်ပင်ပန်းတာ သိပ်မဖြစ်ခဲ့ဘူး။ အစားအသောက်ကို စနစ်နဲ့ စားတတ်သွားလို့ပါ။ အစားအသောက်ဆိုလည်း ဘယ်အရာက ကယ်လိုရီများတယ်၊ ဘယ်အရာဆိုရင် စားသင့်တယ်ဆိုတာ သိသွားတယ်။ ဆရာမ ဒေါ်ဝင်းဝင်းမြင့်က လေ့ကျင့်ခန်းကိုလုပ်ပါ၊ ဒါပေမဲ့ ဖြည်းဖြည်းချင်းပဲ စခိုင်းပါတယ်။ အဲဒီတော့ ကိုယ်လုပ်နိုင်တဲ့ အတိုင်းအတာအတွင်း ဖြစ်တဲ့အတွက် စိတ်ပျက်မသွားပါဘူး”ဟု ဦးမြတ်သူက ပြောသည်။

ဦးမြတ်သူသည် ၁-၄-၂၀၁၆ ရက်နေ့ကစပြီး ကိုယ်အလေးချိန် လျှော့ချမှုကို တိကျစွာပြုလုပ်ခဲ့ရာ ၁-၈-၂၀၁၆ ရက်နေ့တွင် ၂၄၃ ပေါင်၊ ၁၉-၈-၂၀၁၆ ရက်နေ့တွင် ၂၃၇ ပေါင် အထိ လျော့ကျသွားခဲ့ရာ တစ်လလျှင် ပျမ်းမျှ ၁၀ ပေါင်ကျော် လျော့ကျခဲ့ပြီး လေးလကျော်အတွင်း ပေါင် ၅၀ အထိ လျော့ကျသွားခဲ့ကြောင်း သိရသည်။

“တကယ်လုပ်မယ်ဆိုရင် ကိုယ်အလေးချိန်က တစ်လမှာ ၁၅ ပေါင်လောက် ကျနိုင်ပါတယ်။ ဒါပေမဲ့ ကျွန်တော်က အစားအသောက်မက်တော့ ညစာကို အမြဲတမ်းမဆင်ခြင်ဖြစ်ပါဘူး။ အဲဒီအတွက် နှစ်ရက် တစ်ပေါင်လောက် မကျတော့ပါဘူး။ စစချင်း ၁၀ ရက်-၁၅ ရက်လောက်အတွင်းမှာတော့ နည်းစနစ်တကျ မစားသောက်တတ်သေးတဲ့အတွက် ဒုက္ခရောက်ခဲ့တယ်။ နောက်ပိုင်းကျတော့ စနစ်တကျ နေထိုင်စားသောက်တတ်လာတဲ့အတွက် အတော်လေး အဆင်ပြေသွားပါတယ်။ ၀ိတ်တကယ်ကျတဲ့အတွက် လူကလည်း နေရထိုင်ရတာပေါ့ပါးလာတယ်။ အပြင်စာကို လုံးဝနီးပါးမစားတော့ပါဘူး။ ငြင်းလို့မရတဲ့ ပွဲလမ်းသဘင်တွေမှာ စားရင်တောင် အရင်က အသားပဲရွေးစားပေမယ့် အခုကျတော့ အသီးအရွက်တွေကို ဦးစားပေးစားတယ်” ဟု ဦးမြတ်သူက သူ၏ စားသောက်မှုပုံစံကို ပြောပြခဲ့သည်။

“အရင်က အစာစားရင် မ၀ါးဘူး၊ မျိုချတာဆိုတော့ ခဏလေးနဲ့ ကုန်သွားတယ်။ အခုကျတော့ ဆရာမက နာရီဝက်ကြာအောင်စားလို့ ပြောပေမယ့် ၁၅မိနစ် အနည်းဆုံးကြာအောင် စားတယ်၊ ဟင်းချိုကို အရင်ဆုံးစားတဲ့အကျင့်လုပ်တယ်၊ ထမင်းတစ် လုတ်စားပြီးတိုင်း ၁ကနေ ၃၀ အထိရေတယ်။ အဓိကက အစာကို ကြေညက်အောင် အချိန်ယူစားပါတယ်။ တစ်နေကုန်မှာလည်း ငါးမုန့်ကြော်၊ အာလူးကြော်၊ စမူဆာ စတဲ့ ဆီကြော်မုန့်တွေ အကုန်ရှောင်ပါတယ်။ အရင်က အချိုရည်ကို ကြိုက်လည်း ကြိုက်တော့ တစ်နေ့ကို နှစ်ဘူး-သုံးဘူးလောက်သောက်ပါတယ်။

အခုတော့အဆိပ်လို့ သဘောထားပြီး လုံးဝကို လှည့်မကြည့်တော့ပါဘူး။ ရေနဲ့ ရေနွေးကြမ်းကိုပဲသောက် တော့တယ်။ ဘီယာ၊ အရက်ကလည်း မသောက်တာ နှစ် ၂၀ လောက်ရှိသွားပါပြီ။ လက်ဖက်ရည်၊ ကော်ဖီတောင် မသောက်တော့ဘူး။ အပြင်စာကို သိပ်မစား တော့ဘူး။ အခုဆိုရင် ရေနွေးကြမ်းကို ခါးခါးလေး သောက်တယ်။ ဆရာမက ဘယ်အစာက ကယ်လိုရီများတယ်၊ မစားသင့်တဲ့ အထဲမှာပါတယ်ဆိုပြီး ကယ်လိုရီတက်တဲ့ အစာ၊ ကယ်လိုရီနည်းတဲ့ အစာတွေကို သိအောင် ပြောပြပေးလိုက်တယ်။ အဲဒီအခါမှာ နည်း နည်းစားပေမယ့် ဘယ်အစာဆိုရင် ကယ်လိုရီတက် နိုင်တယ်၊ ဘယ်အစာဆိုရင် များများစားလည်း ကယ်လိုရီမတက်ဘူးဆိုတာ ခွဲခြားသိသွားပါတယ်”ဟု ဦး မြတ်သူက ပြောသည်။

လွန်ခဲ့သော သုံးနှစ်က သွေးတိုးခြင်း၊ ဆီးချို ရောဂါအကြိုအဆင့် ဖြစ်ခြင်း၊ အသက်ရှူမ၀ခြင်း၊ သွေးတွင်းအဆီများခြင်းနှင့် လေးဖက်နာဝေဒနာတို့ ခံစားခဲ့ရသော်လည်း ယခု ကိုယ်အလေးချိန် ပေါင် ၅၀ ကျပြီးနောက်ပိုင်းတွင် ထိုဝေဒနာများ သိသာစွာ လျော့ပါးသက်သာသွားခဲ့ကြောင်း သိရသည်။

မလိုအပ်တဲ့ အပိုဝန် ပေါင် ၅၀ လောက် လျော့သွားတဲ့အခါ လူကလည်းပေါ့ပါးသွားတယ်။ အရင်ကဆို ကြာကြာ တောင်မတ်တတ်မရပ်နိုင်ဘူး။ လမ်းလျှောက်ရမှာကို ကြောက်နေခဲ့တာ။ အခုကျတော့ လမ်းလျှောက်ရတာကို အားကစားတစ်ခုလို မဟုတ်ဘဲ ကောင်းကျိုးရှိတယ်ဆိုတဲ့ အသိနဲ့ လျှောက်ကိုလျှောက်ချင်နေတာ. . .

“မလိုအပ်တဲ့ အပိုဝန် ပေါင် ၅၀ လောက်လျော့သွားတဲ့အခါ လူကလည်း ပေါ့ပါးသွားတယ်။ အရင်ကဆို ကြာကြာတောင် မတ်တတ်မရပ်နိုင်ဘူး။ လမ်းလျှောက်ရမှာကို ကြောက်နေခဲ့တာ။ အခုကျတော့ လမ်းလျှောက်ရတာကို အားကစားတစ်ခုလို မဟုတ်ဘဲ ကောင်းကျိုးရှိတယ်ဆိုတဲ့အသိနဲ့ လျှောက်ကို လျှောက်ချင်နေတာ။ အခုနောက်ပိုင်းကျတော့ ရောဂါမဖြစ်အောင် ကာကွယ်ဖို့ ၀ိတ်လျှော့ရမယ်ဆိုတဲ့ အသိရှိသွားခဲ့ပါတယ်”ဟု ဦးမြတ်သူကဆိုသည်။

“ဆရာမက လေ့ကျင့်ခန်းကို စိတ်ပျော်လာအောင် အရင်လုပ်ဆိုပြီး တစ်ရက်ကို တစ်နာရီခွဲပဲ လမ်းလျှောက်ခိုင်းပါတယ်။ အဲဒါတောင် ဆက်တိုက် မလျှောက်ခိုင်းပါဘူး။ ၁၅ မိနစ်လျှောက်ပြီး နား၊ ပြီးမှ ၁၅ မိနစ်လျှောက် . . တစ်နေကုန်မှာ တစ်နာရီခွဲပြည့်ရင် တော်ပြီလို့ ပြောခဲ့တယ်။ စစချင်းတုန်းက တစ်နာရီခွဲ ပြည့်အောင် လျှောက်နိုင်ဖို့ တော်တော်အား ထုတ်ခဲ့ရတယ်။ အခုကျတော့ တစ်နေ့ကို နှစ်နာရီခွဲတောင် လမ်းလျှောက်နိုင်ခဲ့ပါတယ်။ ရေလည်း ကူးပါတယ်။ အရင်က လမ်းလျှောက်ရင်တောင် အိပ်ချင် မူးတူးလျှောက်ခဲ့ပေမယ့် အခုတော့ လက်တွေလွှဲယမ်းပြီး တက်တက်ကြွကြွနဲ့ ချွေးထွက်တဲ့အထိ လျှောက်ပါတယ်။ ဒီလိုလေ့ကျင့်ခန်းတွေလုပ်ရင် နေရတာ လန်းဆန်းတယ်၊ နာတဲ့ဒဏ်လည်း မခံစားရတော့ပါဘူး”ဟု ဦးမြတ်သူက လေ့ကျင့်ခန်းလုပ်ခြင်းကြောင့် ရရှိသည့် ကောင်းကျိုးကို မျှဝေခဲ့သည်။

ဦးမြတ်သူဝိတ်လျှော့နိုင်ခဲ့ခြင်း၏ အဓိက တွန်းအားမှာ ဇနီးသည်၏ အားပေးမှုဟု သူကဆိုသည်။
“အဓိက ၀ိတ်ချဖြစ်တဲ့ တွန်းအား ၁၀၀ ရာခိုင်နှုန်းက ကျွန်တော့် အမျိုးသမီးကြောင့်ပါပဲ။ သူက ကျွန်တော့်ကို အသက်ရှည်ကျန်းမာစေချင်တယ်၊ လှလည်း လှစေချင်တယ်။ ၀တဲ့အခါ ဘယ်အ၀တ်အစားနဲ့မှ မတော်တော့ဘူး။ အဆင်ဘယ်လောက်လှလှ ၀တ်လို့မရတော့ဘဲ တော်တာဝယ်ဝတ်ရတဲ့ဘ၀ ဖြစ်သွားခဲ့တယ်။ သူငယ်ချင်းတွေနဲ့ ဂေါ့ဖ်ရိုက်ရင်တောင် သူများတွေလို ပေါ့ပေါ့ပါးပါး မသွားလာနိုင်တဲ့ ဘ၀မျိုးဖြစ်ပြီး ပေါင်းသင်းဆက်ဆံရေးမှာပါ နောက်မှာ ကျန်ခဲ့ပါတယ်။ အမျိုးသမီးက အစားအသောက်တွေကို ဆရာမရဲ့ ညွှန်ကြားချက်အတိုင်း ပြင်ဆင်ပေးတယ်။ ဟင်းရည်ဆိုလည်း မထပ်အောင် စားချင်စဖွယ် ပြင်ဆင်ပေးတယ်။

ကိုယ့်လို ကျန်းမာရေးအသိမရှိတာမျိုး မဖြစ်အောင် သားကိုလည်း ဆရာမဆီ ခေါ်သွားတိုင်း ကျန်းမာရေးအသိရှိလာအောင် သင်ပေးထားတယ်။ အဲဒီအတွက် သားကလည်း အသီးအရွက်တွေ စားတတ်တဲ့အကျင့်ရလာပါပြီ”ဟု ဦးမြတ်သူကပြောသည်။ အရပ် ၅ ပေ ၇ လက်မရှိသော ဦးမြတ်သူအတွက်ရှိသင့်သည့် ပုံမှန်ကိုယ်အလေးချိန်သည် ၁၄၀ ပေါင်ပတ်ဝန်းကျင်ဖြစ်သော်လည်း နောင် ၆ လအတွင်း ၁၉၀-၂၀၀ ပေါင်ကြားရှိသည်အထိ လျှော့ချသွားမည်ဟု ဆုံးဖြတ်ထားပြီး ပေါင် ၂၀၀ မကျော်အောင် အမြဲထိန်းထားမည်ဟု ဦးမြတ်သူကဆိုသည်။

အ၀လွန်ခြင်း၊ ၀ခြင်းတို့ကြောင့် ကိုယ်အလေးချိန် လျှော့ချလိုသူများအတွက် –

“အသက်လည်းရှည်ချင်တယ်၊ ကျန်းကျန်းမာမာလည်း နေချင်တယ်၊ စတိုင်ကျပြီး စမတ်လည်း ကျချင်တယ်ဆိုရင်တော့ ၀နေတာက ဘယ်ဘက်ကကြည့်ကြည့် မကောင်းပါဘူး။ မိသားစုဘက်က ကြည့်လည်း မကောင်းဘူး။ လူမှုရေးဘက်ကကြည့်လည်း မကောင်းဘူး၊ စီးပွားရေးဘက်ကကြည့်လည်း မကောင်းဘူး။ ကျန်းမာရေးမကောင်းရင် ကိုယ်တစ်ယောက်တည်း ထိခိုက်တာမဟုတ်ပါဘူး၊ မိသားစုမှာလည်း ထိခိုက်သလို စီးပွားရေး၊ လူမှုဆက်ဆံပေါင်းသင်းရေးမှာလည်း ထိခိုက်ပါတယ်။ အဘက်ဘက်မှာ ဆုံးရှုံးပါတယ်။ အဲဒီအတွက် အ၀လွန်သူတွေကော ၀တဲ့သူတွေပါ ကျန်းမာရေးနဲ့အညီ နေထိုင်စားသောက်ပြီး ၀ိတ်လျှော့သင့်တယ်လို့ ထင်ပါတယ်။

ဒီအ၀လွန်တာကြောင့် ရှစ်လ-ကိုးလလောက် အိပ်ရာထဲက မထနိုင်လောက်အောင် နာဖူးခဲ့ပြီးပြီ။ အခု ပေါင် ၅၀ လောက် ကျပြီးချိန်မှာ ကျန်းမာရေးကလည်း ပုံမှန်ကောင်းလာတယ်၊ မိသားစုကလည်း ပျော်ရွှင်မှုရလာတယ်၊ စီးပွားရေးမှာလည်း လုပ်နိုင်ကိုင်နိုင်တဲ့ စိတ်စွမ်းအား ရှိလာတယ်၊ အဲဒီအတွက် ဘယ်လို ဖိအားဒဏ်တွေပဲလာလာ ခံနိုင်ရည် ပိုရှိလာပါတယ်။ အစစအရာရာ ပိုမို အဆင်ပြေလာတာကိုတော့ ကျွန်တော်ရဲ့ ကိုယ်တွေ့ပါပဲ။

တစ်လ ၀ိတ်လျှော့ဖို့ နောက်ကျရင် ၁၀ ပေါင် ကျရမယ့်အစား မဆင်ခြင်ဘဲနေလို့ ၁၀ ပေါင် ထပ်တက်လာတဲ့အတွက် ပေါင် ၂၀ နစ်နာပါတယ်။ ဒါကြောင့် ချက်ချင်းပဲဝိတ်လျှော့ပါလို့ စေတနာနဲ့ တိုက်တွန်းချင်ပါတယ်”ဟု ဦးမြတ်သူက အကြံပေးစကား ပြောကြားလိုက်ပါသည်။

(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)

Most Popular

Healthy Life Ad
To Top