မျက်နှာပေါ်မှာ ဝက်ခြံအဖုအပိမ့်ထွက်တာက စိတ်အနှောင့်အယှက် ဖြစ်စရာကောင်းသလို ကြည့်ရဆိုးပါတယ်။ တကယ်လို့ အရေးကြီးအခမ်းအနားတွေကို သွားစရာရှိနေချိန်မှာ ဝက်ခြံအဖုအပိမ့်တွေ အများကြီးထွက်လာရင် ပိုပြီးစိတ်ရှုပ်ရပါတယ်။ အထူးသဖြင့် မေးစေ့မှာ ဝက်ခြံပေါက်လာရင် စကားပြောရတာ၊ ပြုံးရတာတောင် အဆင်မပြေ ဖြစ်ရတတ်ပါတယ်။ ဝက်ခြံမဖြစ်စေဖို့ ကောင်းမွန်တဲ့အသားအရေ ထိန်းသိမ်းမှု၊ ကျန်းမာရေးနဲ့ ညီညွတ်တဲ့အစာ၊ ညဘက်အိပ်ရေးဝ၀အိပ်စက်မှု စတဲ့အချက်တွေက အရေးပါပါတယ်။
လူအများစုရဲ့မျက်နှာမှာ ပေါင်းစပ်အသားအရေ ရှိကြပါတယ်။ ဆိုလိုတာက ခြောက်သွေ့တဲ့အရေပြားနဲ့ အဆီပြန်တဲ့အရေပြားဆိုပြီး နှစ်ပိုင်းရှိတာမျိုးပါ။ နဖူး၊ နှာခေါင်းနဲ့ မေးစေ့က အဆီပြန်ပြီး ကျန်တဲ့အစိတ်အပိုင်းတွေက ခြောက်သွေ့နေတာဖြစ်ပါတယ်။ ဝက်ခြံက အဆီပြန်တဲ့ အရေပြားနေရာတွေမှာ အဖြစ်များပါတယ်။ များလွန်းတဲ့ အဆီတွေစုပြီး မွေးညင်းပေါက်တွေမှာ အရေပြားဆဲလ်သေတွေ စုပုံရောက်ရှိရာက ဘက်တီးရီးယားပိုးဝင်မှုဖြစ်ပြီး ဝက်ခြံဖြစ်လာတာပါ။
အပျိုဖော်၊ လူပျိုဖော်ဝင်ချိန်၊ ရာသီလာချိန်၊ ကိုယ်ဝန်ဆောင်ချိန်တွေမှာ ခန္ဓာကိုယ်ထဲ ဟော်မုန်းအတက်အကျဖြစ်ပြီး ဝက်ခြံအထွက်များတတ်ပါတယ်။ ဟော်မုန်းအပြောင်းအလဲကို ထိန်းချုပ်လို့မရသလိုပဲ ဝက်ခြံကိုလည်း ထိန်းချုပ်ရခက်ခဲပါတယ်။ တချို့လူတွေက ဝက်ခြံနဲ့ အစားအသောက် ဆက်စပ်မှုရှိတယ်လို့ ဆိုကြပါတယ်။ သကြားကြောင့် ဝက်ခြံပေါက်စေနိုင်တယ်လို့ တချို့လူတွေကဆိုပြီး တချို့က ချောကလက်၊ အာလူးချောင်းကြော်၊ ဆီကြော်စာ စတဲ့အစာတွေစားရင် မေးစေ့မှာ ဝက်ခြံထွက်လာတယ်လို့ ပြောကြပါတယ်။ ဝက်ခြံအဖုအပိမ့်ကင်းပြီး အသားအရေ ချောမွေ့ဖို့ရာအတွက် သစ်သီး၊ ဟင်းသီးဟင်းရွက်နဲ့ ငါးကို စားသင့်ပါတယ်။
တချို့ဆေးပြင်းတွေ၊ စိတ်ဖိစီးမှု၊ အဆီများတဲ့ ဆံပင်နဲ့ ဗောက်ထတာ စတဲ့အချက်တွေကလည်း ဝက်ခြံနဲ့ အဖုအပိမ့်တွေကို ဖြစ်စေနိုင်ပါတယ်။ မေးစေ့ပေါ်က ဝက်ခြံကို လက်နဲ့မညှစ်ပါနဲ့။ ဝက်ခြံကို လက်နဲ့ဆိတ်ရင် အမာရွတ်ထင်တတ်ပြီး အမာရွတ်က တော်တော်နဲ့မပျောက်ဘဲ စွဲနေတတ်ပါတယ်။ ဝက်ခြံသက်သာစေဖို့ အရေပြားအထူးကု ဆရာဝန်နဲ့ တိုင်ပင်ကုသသင့်ပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
