မေး ။ အသည်းရောင်အသားဝါ ဘီပိုးကာကွယ်ဆေး သုံးကြိမ်ထိုးပြီး အောင်ထားသူက နောက်ကာလ ဘယ်လောက်ကြာမှာ ကာကွယ်ဆေး ထပ်မံထိုးရမှာလဲ။ ဘီပိုးကာကွယ်ဆေး မထိုးခင် ဘီပိုးအောင်၊ မအောင် စစ်ရမှာလား၊ ဘီပိုး ရှိ၊ မရှိ စစ်ရမှာလား။
ဦးသန့်ဇင်၊ ကျောက်တံတားမြို့နယ်။
ဒေါက်တာဒေါ်ခင်ပြုံးကြည်(ဥက္ကဌ၊ မြန်မာအသည်းဖောင်ဒေးရှင်း ) မှ ပြန်လည်ဖြေကြားပေးပါသည်။
ဖြေ ။ ကာကွယ်ဆေးသုံးလုံး စထိုးထားတဲ့အချိန်တုန်းက သွေးစစ်ထားတယ်၊ ဘီပိုးမရှိဘူးလို့ အဖြေထွက်ထားတယ်ဆိုရင် ငါးနှစ်ပြည့်လို့ ထပ်ထိုးချိန်မှာ ဆေးစစ်စရာမလိုတော့ပါဘူး။ တချို့ကျတော့ ဘီပိုးရှိ၊ မရှိ မစစ်ရဲလို့ မစစ်ဘဲ ကာကွယ်ဆေးကိုပဲ သုံးကြိမ်ပြည့်အောင် ထိုးလိုက်တာရှိတယ်။ ဒီလိုလူတွေကျတော့စိတ်မချရဘူး။ ပြန်စစ်ဖို့လိုပါတယ်။ အကောင်းဆုံးက ဘီပိုးကာကွယ်ဆေး သုံးကြိမ်ထိုးပြီး နှစ်လအကြာမှာ ပဋိပစ္စည်း(Antibodies) ထွက်၊ မထွက် ပြန်စစ်လိုက်ရင် အကောင်းဆုံးပါပဲ။ ၁၀ ကျော်ရင် ကောင်းပါတယ်။ တချို့ဆို ၁၀ဝ၀ ကျော်တောင်ထွက်တယ်၊ ဒီလိုလူတွေက Mpory သိပ်ကောင်းတဲ့အတွက် ပြန်ထိုးစရာတောင် မလိုပါဘူး။
ကမ္ဘာ့ကျန်းမာရေးအဖွဲ့ရဲ့ လမ်းညွှန်ချက်အရ ဘီပိုးကာကွယ်ဆေး သုံးလုံးထိုးပြီး ငါးနှစ်ပြည့်ချိန်မှာ လူတိုင်း ထိုးစရာမလိုဘူးလို့ သိရပါတယ်။ ဘယ်လို လူတွေက Booster ထပ်ထိုးဖို့ လိုသလဲဆိုတော့ မိသားစုထဲမှာ ဘီပိုးရှိသူတစ်ဦးရှိရင် ငါးနှစ်တစ်ခါ ပြန်ထိုးသင့်တယ်၊ ပြီးတော့ ဘီပိုးလူနာတွေ၊ သွေးတွေနဲ့ ထိတွေ့နေရတဲ့ ဆရာဝန်၊ သူနာပြုစတဲ့ ကျန်းမာရေးဝန်ထမ်းတွေ၊ သွေးမကြာခဏ သွင်းနေရတဲ့ သွေးရောဂါသည်တွေ၊ ကျောက်ကပ်မကောင်းလို့ သွေးပြန်ပြီး သန့်စင်နေရတဲ့သူတွေ(Kidney Dialysis) ဒီလို လူတွေကျတော့ ငါးနှစ်တစ်ကြိမ် ပြန်ထိုးသင့်ပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
