၊ ငွေကြယ်စင်ယံ ၊
အနည်းငယ်ပြန်းထန်တဲ့ လေ့ကျင့်ခန်းလှုပ်ရှားမှုတွေပြုလုပ်မှသာ ခန္ဓာကိုယ်ရှိ အဆီပိုတွေ လောင်ကျွမ်းကုန်မှာ ဖြစ်ပါတယ်။ လေ့ကျင့်ခန်းပြုလုပ်ဖို့ အချိန်များများမပေးနိုင်သူတွေအတွက် နည်းလမ်းမှန်မှန်နဲ့ နေ့စဉ် အချိန် ၁၅ မိနစ်လောက်ပေးရုံနဲ့ အဆီပိုတွေလောင်ကျွမ်းစေမယ့် လေ့ကျင့်ခန်းတချို့ကို ဖော်ပြပေးလိုက်ပါတယ်။ ဒီလေ့ကျင့်ခန်းတွေမပြုလုပ်မီ သွေးပူလေ့ကျင့်ခန်း ၅ မိနစ်ခန့်ပြုလုပ်ပေးသင့်ပါတယ်။ ခြေ၊ လက်၊ ခါးနဲ့ လည်ပင်း အကြောလျှော့လေ့ကျင့်ခန်းတွေ ပြုလုပ်ပေးထားသင့်ပါတယ်။
လေ့ကျင့်ခန်း (၁)
ခြေချောင်းတွေကိုရှေ့သို့ထုတ်ထားပြီး ခြေထောက်နှစ်ဖက်ကို ချဲပြီးရပ်ပါ။ ဒူးတွေကို ၉၀ ဒီဂရီခန့်ကွေးပြီး ဆောင့်ကြောင့်ထိုင်တဲ့ပုံစံ ပြုနေပါ။ လက်နှစ်ဖက်ကို ရှေ့သို့ဆန့်ထားလိုက်ပါ။ ထိုပုံစံအတိုင်း လက်တွေကို အပေါ်သို့မြှောက်လိုက်ပြီး ခြေထောက်ကို ဆန့်ထုတ်ကာ အပေါ်သို့ခုန်လိုက်ပါ။ ထို့နောက် ဖြည်းဖြည်း ညင်သာစွာပြန်ကျပြီး မူလပုံစံအတိုင်းပြန်နေလိုက်ပါ။ ဒီနည်းအတိုင်း ၁၂ ကြိမ်ပြုလုပ်ပေးရမှာဖြစ်ပါတယ်။
လေ့ကျင့်ခန်း (၂)
လက်ထောက်မှောက်အနေအထားနေပေးပါ။ ခါးနဲ့ လည်ပင်းကို ဖြောင့်ဖြောင့်ထားပါ။ ဝမ်းဗိုက် ကြွက်သား တွေကိုတင်ထားပေးပါ။ အသက်ကိုရှူသွင်းလိုက်ပြီး ဘယ်လက်ကို ညာပုံခုံးကိုထိအောင် ကွေးလိုက်ရမှာ ဖြစ်ပါတယ်။ အသက်ရှူထုတ်ပြီး လက်ကို ပြန်ချလိုက်ပါ။ ဒီအတိုင်း ၁၂ ကြိမ်ပြုလုပ်ပေးပြီး နောက်လက်တစ်ဖက်ပြောင်းကာ ပြုလုပ်ပေးရမှာဖြစ်ပါတယ်။
လေ့ကျင့်ခန်း (၃)
ခြေနှစ်ဖက်ကိုစုပြီး ဆောင့်ကြောင့်ထိုင်လိုက်ပါ။ နောက်ကျောနဲ့ လည်ပင်းကို ဖြောင့်ဖြောင့်ထားပါ။ လက်နှစ်ဖက်ကိုအရှေ့ကြမ်းပြင်ကိုထောက်ထားပြီး ခြေထောက်အဖျားကို အားပြုနေပါ။ ခြေထောက်ကို ဆန့်ထုတ်ပြီး မြင့်မြင့်ခုန်လိုက်ပါ။ ပြန်ကျလာချိန်တွင် မူလအနေအထားအတိုင်းနေပြီး နောက်တစ်ကြိမ် ပြန်ခုန်ပါ။ ဒီနည်းအတိုင်း ၁၂ ကြိမ်ပြုလုပ်ပေးရမှာဖြစ်ပါတယ်။
လေ့ကျင့်ခန်း (၄)
လက်ထောက်မှောက်အနေအထား နေပေးပါ။ လက်နှစ်ဖက်ကိုကွေးပြီး တံတောင်တွေနဲ့ ထောက်ထားပေးရမှာ ဖြစ်ပါတယ်။ ထိုအနေအထားတိုင်း ညာဖက်ဒူးကိုကွေးပြီး ရှေ့သို့တိုးလိုက်ပါ။ ပြီးနောက် မူလအနေအထား ပြန်နေပါ။ ဒီနည်းအတိုင်း ၁၂ကြိမ်ပြုလုပ်ပြီး ခြေထောက်တစ်ဖက်ပြောင်းကာ ပြုလုပ်ပေးရမှာဖြစ်ပါတယ်။
လေ့ကျင့်ခန်း (၅)
တစ်ဝက်ဆောင့်ကြောင့်ထိုင် အနေအထားနေပေးပါ။ ထို့နောက်လက်ကိုလွှဲကာ အားပြုပြီး ဘေးတိုက်ညာဖက် သို့ခုန်လိုက်ပါ။ ထို့နောက်တခါ ဘယ်ဘက်ကိုခုန်ပါ။ ဒီအတိုင်း ၁၂ ကြိမ်ပြုလုပ်ပေးရမှာဖြစ်ပါတယ်။
လေ့ကျင့်ခန်း (၆)
လက်ထောက်မှောက် လေ့ကျင့်ခန်းပြုလုပ်တဲ့ အတိုင်းနေပေးပါ။ ခါး၊ နောက်ကျောနဲ့ လည်ပင်းတွေကို ဖြောင့်ဖြောင့်ထားပေးပါ။ ထိုအနေအထားအတိုင်း ညာဖက်လက်ကိုမြှောက်ပြီး ဘေးသို့ဆန့်တန်းလိုက်ပါ။ ညာခြေထောက်ကိုလည်း ဘေးသို့ကားလိုက်ပြီး ခန္ဓာကိုယ်ဟန်ချက်ကိုထိန်းထားပါ။ ထို့နောက် နောက်တစ်ဖက်ပြောင်းလုပ်ပေးပါ။ ဒီနည်းအတိုင်း ၁၂ ကြိမ်ပြုလုပ်ပေးရမှာဖြစ်ပါတယ်။
လေ့ကျင့်ခန်း (၇)
တစ်ဝက်ဆောင့်ကြောင့်ထိုင်အနေအထားနေပါ။ လက်တွေကိုရှေ့မှာထားထားပါ။ အသာအယာခုန်လိုက်ပြီး ဒူးနှစ်ဖက်ကိုကွေးကာ လက်နဲ့ ဆွဲထိန်းပြီး ရင်ဘတ်နားသို့ ကပ်လိုက်ပါ။ ထို့နောက် ပြန်အကျမှာ မူလအနေအထားအတိုင်းနေပါ။ ဒီနည်းအတိုင်း ၁၂ ကြိမ်ပြုလုပ်ပေးရမှာ ဖြစ်ပါတယ်။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
