၊ ကိုထက် ၊
ကျွန်တော်တို့ဟာ ခန္ဓာကိုယ်နောက်ပိုင်းကို မမြင်ရတဲ့အတွက် မေ့လျောနေပြီး ခန္ဓာကိုယ်အရှေ့ပိုင်းကိုသာ ပိုမိုကြည့်ကောင်းဖို့ အားထည့်နေတတ်ကြပါတယ်။ ခါးကိုင်းတာ၊ ကုန်းတာနဲ့ နေထိုင်မှု ပုံစံမမှန်တာတွေကြောင့် ခန္ဓာကိုယ်နောက်ပိုင်းမှာ ကြည့်မကောင်းတဲ့ အဖုအထစ်တွေ၊ ကြွက်သားအတွန့်အခေါက်တွေ ဖြစ်ပေါ်လာတတ်ပါတယ်။ ဒီလိုမဖြစ်ရလေအောင် အိမ်တွင်းအလွယ်တကူပြုလုပ်နိုင်တဲ့ လေ့ကျင့်ခန်းတွေကို ဖော်ပြပေးလိုက်ပါတယ်။
ခါးရှေ့ကိုင်း လေ့ကျင့်ခန်း
ခြေထောက်နှစ်ဖက်ကိုကပ်ပြီး မတ်မတ်ရပ်ပါ။ လက်နှစ်ဖက်ကိုလည်း ဘေးကပ်လျက်အနေအထားနေရပါမယ်။ ပြီးရင် ဒူးနှစ်ဖက်ကို လုံးဝမကွေးဘဲ ခါးကိုပဲ အရှေ့သို့ ကိုင်းချလိုက်ပါ။ လက်ဖဝါးနှစ်ဖက်ကို ကြမ်းပြင်ပေါ်ရောက်တဲ့အထိ ကွေးပေးရပါမယ်။ ဒီအနေအထားအတိုင်း ၂ စက္ကန့်ခန့်နေပြီး ပြန်မတ်လိုက်ပါ။ ဒီလေ့ကျင့်ခန်းကို ၁၅ ကြိမ်ပြုလုပ်ပေးရပါမယ်။
ခါးဘေးကိုင်း လေ့ကျင့်ခန်း
ခြေထောက်နှစ်ဖက်ကိုကပ်ပြီး မတ်မတ်ရပ်ပါ။ လက်နှစ်ဖက်ကိုလည်း ဘေးနှစ်ဖက်သို့ ကပ်ထားပါ။ လက်တစ်ဖက်ကို မြှောက်လိုက်ပြီး လက်ဖဝါးကို ဦးခေါင်းနောက်မှာကပ်လိုက်ပါ။ ကျန်လက်တစ်ဖက်မှာ အလေးတုံး ဒါမှမဟုတ် ရေအပြည့်ပါတဲ့ ရေသန့်ဘူးတစ်ဘူးကိုကိုင်ပြီး အောက်သို့နှိမ့်ချပေးပါ။ ခါးကိုနှိမ့်ချလိုက်တဲ့ လက်ဖက်သို့ အနည်းငယ်ကိုင်းပေးလိုက်ရမှာဖြစ်ပါတယ်။ အဲဒီနောက် ပုံမှန်အနေအထားပြန်နေပါ။ ဒီလေ့ကျင့်ခန်းကို ၁၅ ကြိမ်ပြုလုပ်ပြီး နောက်တစ်ဖက်သို့ ပြောင်းလုပ်ပါ။
လက်ထောက်မှောက် လေ့ကျင့်ခန်း
မှောက်လျက်အနေအထားနဲ့ လက်နှစ်ဖက်ကို ကြမ်းပေါ်ထောက်ထားရပါမယ်။ ခါး၊ ဦးခေါင်းနဲ့ ခြေထောက်တွေကို တန်းတန်းထားရပါမယ်။ တံတောင်ဆစ်တွေကိုကွေးပြီး ခန္ဓာကိုယ်ကို အောက်နိမ့်ချလိုက်ပါ။ ပြီးနောက် မူလအနေအထားရောက်အောင် ပြန်တွန်းတင်ပေးပါ။ ဒီလေ့ကျင့်ခန်းကို အကြိမ် ၂၀မှ ၃၀ ကြားပြုလုပ်ပေးပါ။
အိုးပုံစံ လေ့ကျင့်ခန်း
ကြမ်းပေါ်မှာ မှောက်လျက်အနေအထားနေပေးပါ။ လက်နှစ်ဖက်ကို ရှေ့သို့ဆန့်တန်းလိုက်ပါ။ အဲဒီ့နောက် ဝမ်းဗိုက်ကြွက်သားကို အားပြုပြီး ဦးခေါင်း၊ ရင်ဘတ်နဲ့ ခြေထောက်တွေကို အပေါ်သို့ ပင့်တင်လိုက်ပါ။ လက်နှစ်ဖက်နဲ့ ခြေထောက်တွေကို ဖမ်းကိုင်လိုက်ပြီး အသက်ကို ရှူသွင်းလိုက်ပါ။ ကြွက်သားတွေကို ဖြေလျှော့ထားဖို့လိုအပ်ပါတယ်။ စက္ကန့် ၂၀ မှ ၆၀ ခန့်နေပြီး မူလအနေအထားသို့ ပြန်နေပြီး အသက်ရှူထုတ်လိုက်ပါ။
မှောက်လျက် လေ့ကျင့်ခန်း
ကြမ်းပြင်ပေါ် မှောက်လျက်အနေအထားနေပေးပါ။ ခြေတွေ၊ လက်တွေကို ဆန့်ထုတ်လိုက်ပါ။ အဲဒီ့နောက် ခါးကော့ပြီး ခြေလက်တွေကို မြှင့်တင်လိုက်ပါ။ ဒီအနေအထားအတိုင်း ခဏနေပြီး မူလအနေအထားသို့ ပြန်ဖြေလျှော့လိုက်ပါ။ ဒီလေ့ကျင့်ခန်းကို ၁၅ ကြိမ်ပြုလုပ်ပေးရမှာ ဖြစ်ပါတယ်။
လေ့ကျင့်ခန်းဘောလုံးဖြင့် လေ့ကျင့်ခြင်း
လေ့ကျင့်ခန်းဘောလုံးပေါ်မှာ မှောက်လျက်အနေအထားနဲ့နေပေးပါ။ ခြေနှစ်ဖက်ကိုချဲထားပြီး ကြမ်းပေါ်ထောက်ထားပါ။ လက်နှစ်ဖက်ကို ဦးခေါင်းနောက်မှာ တင်ထားပါ။ လည်ပင်းကို တည့်တည့်ထားပြီး လက်မောင်းနဲ့ ပခုံးတွေကို အထက်အောက် နိမ့်လိုက်၊ မြင့်လိုက်ပြုလုပ်ပေးရမှာ ဖြစ်ပါတယ်။ ဒီလေ့ကျင့်ခန်းကို ၁၅ ကြိမ်ပြုလုပ်ပေးပါ။
နောက်ပြန်ကိုင်း လေ့ကျင့်ခန်း
ဒီလေ့ကျင့်ခန်းက ခါးအတွက် များစွာအကျိုး သက်ရောက်မှုရှိပေမယ့် အလေ့အကျင့်မရှိရင်၊ နည်းစနစ်မမှန်ရင် အန္တရာယ်လည်းရှိပါတယ်။ ရှေ့မှာဖော်ပြထားတဲ့ လေ့ကျင့်ခန်းတွေကို တစ်လခန့်မှန်မှန်ပြုလုပ်ပြီးမှ ဒီလေ့ကျင့်ခန်းကို စတင်လုပ်သင့်ပါတယ်။ ဦးစွာ ကြမ်းပေါ်မှာ လှဲလျက်အနေအထားနေပါ။ ဒူးနှစ်ဖက်ကိုကွေးထားရပါမယ်။ လက်နှစ်ဖက်ကို ဦးခေါင်းပေါ်မှကျော်ပြီး ကြမ်းပေါ်ကိုထောက်ထားပါ။ အဲဒီ့နောက် ခါးကိုဖြည်းဖြည်းချင်း နောက်သို့ကွေးကာ တင်ပါးကို အပေါ်သို့ မြှင့်တင်ပေးရမှာ ဖြစ်ပါတယ်။ မြင့်နိုင်သမျှ မြင့်မြင့်နေပြီး မူလပုံစံအနေအထားသို့ ဖြည်းဖြည်းချင်းပြန်ချရမှာ ဖြစ်ပါတယ်။ ဒီလေ့ကျင့်ခန်းကို ၅ ကြိမ်ပြုလုပ်ပေးပါ။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
