၊ ကိုထက် ၊
အိမ်မှာနေရင်း ကိရိယာလွတ်လေ့ကျင့်နိုင်မယ့် လေ့ကျင့်ခန်းတွေကို မျှဝေလိုက်ပါတယ်။
– ဒူးကောက်ကြော သန်စွမ်းစေရန် လေ့ကျင့်ခန်း
ကြမ်းပြင်ပေါ်မှာ မှောက်လျက်အနေအထားနဲ့ ခြေနှစ်ဖက်ကို ဆန့်ထားပြီး လက်နှစ်ဖက်ကို ဘေးကပ်ထားပါ။ ဒူးမကွေးဘဲ ပေါင်ကြွက်သားတွေကို အားပြုပြီး ခြေတစ်ဖက်စီကို ၃၅-၄၀ ဒီဂရီခန့် မြှောက်ပေးပါ။ ခြေထောက်တစ်ဖက်ကို စက္ကန့် ၃၀-၃၅ကြာအောင်မြှောက်ပြီး တစ်ဖက်ပြောင်းလုပ်ပါ။
– တင်ပါးကြွက်သား သန်စွမ်းစေရန် လေ့ကျင့်ခန်း
ကြမ်းပြင်ပေါ်မှာ မှောက်လျက်အနေအထားနဲ့ ခြေနှစ်ဖက်ကို ဆန့်ထားပြီး လက်နှစ်ဖက်ကို ဘေး ကပ်ထားပါ။ ဒူးကိုကွေးပြီး ခြေထောက်ပေါင်ရင်းမှ မြှောက်နိုင်သလောက်မြှောက်ပေးပါ။ ခြေထောက် တစ်ဖက်ကို စက္ကန့် ၃၀-၃၅ ကြာအောင် မြှောက်ပြီး တစ်ဖက်ပြောင်းလုပ်ပါ။
– ခန္ဓာကိုယ်စောင်း လေ့ကျင့်ခန်း
ပက်လက်အိပ်ပြီး လက်နှစ်ဖက်ကို ဘေးသို့ ဆန့်တန်းထားပါ။ ခြေနှစ်ဖက်လုံးကို အစုံလိုက် ညာဖက်ကို ဆန့်ထုတ်လိုက်ပြီး ဘယ်ဖက်ခြေ ထောက်ကိုအပေါ်ကို မြှောက်လိုက်၊ ချလိုက်လုပ်ပေးပါ။
– ပေါင်ကြွက်သား လေ့ကျင့်ခန်း
ဘေးစောင်းအနေထားလှဲလျောင်းပြီး လက်နှစ် ဖက်နဲ့ ထောက်ပြီး ကိုယ်ကို ခပ်မြင့်မြင့်နေပါ။ ခြေနှစ်ဖက်ကို ထပ်ထားပြီး အပေါ်ခြေထောက်ကိ်ု ၃၅-၄၀ ဒီဂရီ မြောက်ပေးပါ။ ခြေထောက် တစ်ဖက်ကို စက္ကန့် ၃၀-၃၅ ကြာအောင် မြှောက်ပြီး တစ်ဖက်ပြောင်း လုပ်ပါ။
– လည်ပင်းကြွက်သား လေ့ကျင့်ခန်း
ပက်လက်အိပ်နေပြီး လက်နှစ်ဖက်ကို ဘေးကပ်ထားပါ။ ပခုံးတွေကို ကြမ်းနဲ့ကပ်ထားပြီး လည်ပင်းကို အားပြုရင်း ခေါင်းကို မြှင့်တင်ကာ တောင့်ထားပါ။ စက္ကန့် ၃၀-၃၅ ခန့် ခေါင်းကို မြှင့်ထားပြီးမှ ပြန်ချပါ။
– ဝမ်းဗိုက်ကြွက်သား လေ့ကျင့်ခန်း
ပက်လက်အိပ်အနေအထားနဲ့ လက်နှစ်ဖက်ကို ဦးခေါင်းနောက်မှာ ထားပြီး ခြေထောက်တွေကို ဒူး ကွေးပြီးထောင်ထားကာ ခြေဖဝါးကို ကြမ်းနဲ့ အညီ ကပ်ထားပါ။ အဲဒီနောက် လက်နှစ်ဖက်ကို ဒူးဆီသို့ ဆန့်ထုတ်လိုက်ကာ ဗိုက်ကြွက်သားကို အားပြုပြီး အပေါ်ကို ကုန်းထလိုက်ပါ။
– လက်မောင်း၊ ခြေထောက်နှင့် ခန္ဓာကိုယ်ကြွက်သား လေ့ကျင့်ခန်း
လူအများ သိပြီးသားဖြစ်တဲ့ လက်ထောက် မှောက် လေ့ကျင့်ခန်းလုပ်ပေးရမှာဖြစ်ပါတယ်။ ခြေထောက်နဲ့ ခါးကို ဆန့်ထားပြီး လက်မောင်းအားကိုပဲ အားပြုကာ ခန္ဓာကိုယ်ကို ပင့်တင်လိုက်ပြန်ချလိုက် စက္ကန့် ၃၀ လုပ်ပေးရပါမယ်။
– အပေါ်ပိုင်း ကျောရိုး လေ့ကျင့်ခန်း
မှောက်လျက်အနေအထားနဲ့ လက်နှစ်ဖက် ကို ဘေးကပ်ထားပါ။ လည်ပင်းကိုအားပြုပြီး ခေါင်းကို အပေါ်ကိုမြှင့်တင်ကာ ထိန်းထားပါ။ စက္ကန့် ၃၀ ပြုလုပ်ပေးရပါမယ်။
– အောက်ပိုင်း ကျောရိုးလေ့ကျင့်ခန်း
မှောက်လျက်အနေအထားနဲ့ လက်နှစ်ဖက် ကိုဘေးကပ်ထားပါ။ ခြေနှစ်ဖက်ကိုလည်း ဆန့်ထားပြီးကပ်ထားပါ။ လက်နှစ်ဖက်နဲ့ ကြမ်းကိုအားပြုပြီး ခြေနှစ်ဖက်ကို ကပ်လျက်အစုံလိုက် အပေါ် သို့ မြှောက်ပါ။ စက္ကန့် ၃၀ မြောက်ပြီးမှ ပြန်ချပါ။
– အလယ်ပိုင်း ကျောရိုး လေ့ကျင့်ခန်း
မှောက်လျက်အနေအထားနဲ့ ခြေတွေကိုဆန့် ပြီး ကပ်ထားပါ။ လက်နဲ့ခြေထောက်တွေကို ကြမ်းပေါ်သို့ အားမပြုစေဘဲ ခန္ဓာကိုယ်အလယ်ပိုင်းကြွက်သားတွေကိုအားပြုပြီး ပခုံးနှစ်ဖက်ကို မြှင့်တင်လိုက်ပါ။ စက္ကန့် ၃၀ခန့် မြှင့်ထားပြီးမှ ပြန်ချပေးပါ။
(Healthy Life ဂျာနယ်မှ စီစဉ်တင်ဆက်သည့် အပတ်စဉ် သောကြာနေ့ထုတ် Healthy Life ဂျာနယ်၊ https://www.facebook.com/healthylifejournalmyanmar/ နှင့် www.healthylifejournalmyanmar.com တို့တွင် ဖော်ပြပါရှိသမျှ ကျန်းမာရေးနှင့် အလှအပဆိုင်ရာ သတင်းများ၊ သတင်းဆောင်းပါးများ၊ အမေးအဖြေများ၊ ဘာသာပြန်ဆောင်းပါးများကို လွတ်လပ်စွာ မျှဝေနိုင်ပါသည်။ သို့ရာတွင် မည်သည့် Facebook စာမျက်နှာ၊ Website များတွင်မဆိုပြန်လည်ကူးယူဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။)
